Декабрь ойидаги бухгалтер учун фойдали ахборот:
Вазирлар Маҳкамасининг 04.08.2023 йилдаги “Ёнғинлар профилактикаси самарадорлигини ошириш ва ёнғин хавфсизлиги соҳасида давлат назоратини такомиллаштириш чора-тадбирлари тўғрисида”ги 332-сон Қарори қабул қилинди.
2023 йил 1 сентябрдан бошлаб давлат ёнғин назорати органларига қуйидаги ваколатлар берилади:
- ташкилий-ҳуқуқий шаклидан қатъи назар, юридик ва жисмоний шахсларга тегишли бўлган объектларда:
– бир йилда кўпи билан бир мартадан батафсил (дастлабки) текширув ва назорат текширувини ўтказиш;
– жисмоний ва юридик шахслар мурожаатлари, шунингдек, ОАВ ва бошқа манбалардан олинган маълумотлар асосида тезкор текширувлар ўтказиш;
- бир вақтнинг ўзида 50 нафардан кўп одам тўпланадиган объектларда (бозорлар, савдо-кўнгилочар мажмуалари, умумий овқатланиш корхоналари ва бошқалар) ФВВ тасдиқлаган режа-график асосида ҳар чоракда мониторинг ва профилактика тадбирларини ўтказиш.
2024 йил 1 январдан бошлаб жисмоний ва юридик шахсларга тегишли бўлган бино ва иншоотларнинг ёнғин мувофиқлигини мустақил баҳолаш тартиби (ёнғин аудити) ўтказилади. Ёнғин аудити ФВВда аккредитациядан ўтган ташкилотлар томонидан ўтказилиши мумкин. Ёнғин аудити хулосасининг амал қилиш муддати – 1 йил.
Ёнғин аудити бўйича ижобий хулоса олган, ёнғин ва бошқа хатарлардан ўзига тегишли бўлган бино ҳамда иншоотларни суғурталаган тадбиркорларга нисбатан 1 йил давомида давлат ёнғин назорати томонидан текширувлар ўтказилмайди.
Шунингдек, 2024 йил 1 январдан бошлаб бозорлар ва савдо комплексларига тегишли бино ва иншоотлар мулкдорларининг жавобгарлигини мажбурий суғурталаш тартиби жорий этилади.
Шу йилнинг 1 сентябридан “Ёнғиндан огоҳлик” умуммиллий кампанияси бошланади, унинг доирасида қуйидагилар амалга оширилади:
- давлат ташкилотлари, тадбиркорлик субъектлари ва бошқа ташкилотларда иш жойларида ёнғин хавфсизлиги бўйича ўқитиш ташкил этилади, жумладан, эвакуация режалари ўт ўчириш воситаларидан фойдаланиш қоидалари билан таништирилади;
- таълим ташкилотларида ёнғинларнинг олдини олиш ва ёнғин содир бўлган вазиятда ҳаракат қилиш бўйича батафсил услубий машғулотлар ўтказилади;
- аҳоли тарқатма материаллар билан таъминланади
- ОАВда ушбу йўналишдаги мақола, интервью ва кўрсатувлар намойиш этилади.
2024 йилдан бошлаб тадбиркорлар ўртасида “Ёнғин хавфсизлиги аълочиси” йиллик танлови ўтказилади. Ғолибга 100 млн сўм миқдорда пул мукофоти берилади ҳамда унинг фаолияти 2 йил давомида ёнғин назорати органлари томонидан текширилмайди.
2023 йил 1 ноябрдан бошлаб:
- давлат ёнғин назорати органларининг ижобий хулосасини олмасдан, қишлоқ хўжалигига мўлжалланмаган ер участкаларини аукционга чиқариш, қурилиш объектлари лойиҳа-смета ҳужжатларини келишиш ҳамда қурилиш-монтаж ишлари тугалланган объектлардан фойдаланиш учун рухсатнома бериш тақиқланади;
- давлат ёнғин назорати органлари қурилиш объектларида қурилиш- монтаж ишларини амалга ошириш жараёнида шаҳарсозлик нормалари ва қоидаларининг ёнғин хавфсизлиги талабларига риоя этилишини назорат қилади;
- аҳоли гавжум бўладиган объектларда мажбурий тартибда идоравий ёнғин назорати ўрнатилади.
