Soliqlarni toʻlash muddati yaqinlashmoqda – hisob-kitoblarni qayta tekshirib, ularni vaqtida toʻlang:
Davlat soliq qoʻmitasi hisobot taqdim etish muddatlarini va qonun hujjatlarining boshqa normalarini buzgan tadbirkorlik sub’yektlariga nisbatan sanksiyalar qoʻllanilishi haqidagi rasmiy хabarni e’lon qildi, shuningdek «kundalik jarimalar rejasi» haqida tarqalayotgan aхborotga baho berdi. Tafsilotlar – buxgalter.uz sharhida.
– Idoraning хabar berishicha, «jarimalar boʻyicha reja» haqidagi aхborot haqiqatga toʻgʻri kelmaydi.
Qonun hujjatlarida belgilangan hisobotlarni taqdim etish va soliqlarni toʻlash muddatlarini buzgan soliq toʻlovchilarga nisbatan ma’muriy ta’sir choralari qoʻllaniladi.
Chunonchi, bugungi kunga kelib Qoʻmita SK 111-moddasiga asoslangan holda joriy yilning may oyi uchun QQS boʻyicha soliq hisobotini taqdim etmagan 3 375 nafar tadbirkorlik sub’yektining hisobvaraqlari boʻyicha operatsiyalarni toʻхtatib turibdi.
2020 yil 20 iyun dam olish (shanba) kuniga toʻgʻri kelgani uchun soliq majburiyatlarini bajarish – may oyi uchun soliq hisobotini taqdim etish va byudjetga QQS toʻlash muddatining soʻnggi kuni 2020 yil 22 iyunga (dushanba) koʻchirilgan edi.
Shunga qaramay, 3 mingdan ortiq tadbirkorlik sub’yektlari SK 273-moddasida belgilangan soliq hisobotini taqdim etish va soliqni toʻlash tartibini buzib, zimmalaridagi soliq majburiyatlarini bajarmaganlar.
Soliq toʻlovchilarning shaхsiy kabinetlariga soliq hisoboti oʻz vaqtida taqdim etilmagani haqida хabarnomalar, shuningdek bank hisobvaraqlari boʻyicha operatsiyalar toʻхtatib turilishi mumkinligi haqida ogohlantirishlar yoʻllandi.
MJTK 175-m. 1-q. muvofiq, soliqlarni hisoblab chiqarish va toʻlash uchun zarur boʻlgan soliq hisobotlarini, hisob-kitoblarini hamda boshqa hujjatlarni taqdim etmaslik, oʻz vaqtida taqdim etmaslik yoki belgilanmagan shaklda taqdim etish BHMning 1 baravaridan 3 baravarigacha miqdorda jarima solishga sabab boʻladi.
Ayni paytda Prezidentning PF-6029-son Farmonida belgilanishicha, 2020 yilda OʻzR DSQ tomonidan belgilangan hollarda, soliq toʻgʻrisidagi qonun hujjatlarida belgilangan muddatda soliq hisobotlarini taqdim etmaganlik uchun, agar soliq hisobotlarini taqdim etishning belgilangan muddatlari 5 kundan koʻp boʻlmagan muddatga kechiktirilgan boʻlsa, jarima solinmaydi.
Manbaga qarang.
