Mol-mulk va yer soliqlarining oshirilgan stavkalari yil yakuniga qadar qoʻllanilmaydi

2020 yil yakuniga qadar foydalanilmayotgan ishlab chiqarish maydonlari va yashash uchun moʻljallanmagan inshootlarga nisbatan mol-mulk soligʻi va yer soligʻining oshirilgan soliq stavkalari qoʻllanilmaydi. Buxgalter.uz iltimosiga binoan “Norma” eksperti Oleg SOY koʻrsatilgan ob’yektlarga soliq solish toʻgʻrisida batafsil gapirib berdi:

- Eslatib oʻtamiz, quyidagilarga nisbatan soliq toʻlovchilarga oshirilgan soliq stavkalarini belgilash yoʻli bilan ta’sir choralari qoʻllanilishi mumkin:

• boʻsh turgan binolar, foydalanilmayotgan ishlab chiqarish maydonlari, yashash uchun moʻljallanmagan inshootlar, shuningdek tugallanmagan qurilish ob’yektlariga nisbatan – mol-mulk soligʻi boʻyicha ;
• bunday ob’yektlar band qilgan yer uchastkalariga nisbatan – yer soligʻi boʻyicha .

Bunda soliq imtiyozlari ushbu ob’yektlarga nisbatan tatbiq etilmaydi.

Oshirilgan stavkalarni qoʻllash tartibi 13.08.2019 yildagi 666-son VMQ bilan oʻrnatilgan.

PF-5978-son Farmonga muvofiq korхona oʻz faoliyatini pandemiyaga qarshi kurashish uchun kiritilgan cheklov choralari tufayli toʻхtatishga majbur boʻlgan hollarda, quyidagilar 2020 yil 1 apreldan 31 dekabrga qadar toʻхtatilgan:

• foydalanilmayotgan ishlab chiqarish maydonlari, yashash uchun moʻljallanmagan inshootlarga (shu jumladan 2020 yil 1 aprelga qadar aniqlanganlarga) nisbatan mol-mulk soligʻi va yer soligʻining oshirilgan stavkalarini qoʻllash;
• ushbu soliqlar boʻyicha oshirilgan stavkalarni qoʻllash natijasida yuzaga kelgan qarzdorlikka nisbatan penya hisoblash va majburiy undirish choralarini koʻrish.

Soliq organlari mazkur normani mustaqil ravishda qoʻllaydilar . Soliqlar hisoblanishining toʻgʻriligini soliq toʻlovchining shaхsiy kartochkasida tekshirishingiz mumkin.