SKga soliqlarni garovsiz boʻlib-boʻlib toʻlash imkoniyati toʻgʻrisida normalar kiritildi

Bu 14.10.2021 yildagi “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi OʻRQ-722-son Qonunda nazarda tutilgan. Xususan:

1) SKning 99-moddasi 1-bandida belgilanishicha, Soliq qoʻmitasi SKning 17-moddasida koʻrsatilgan soliqlarni, shuningdek aylanmadan olinadigan soliqni mol-mulkni garovga bermagan holda, kafilliksiz yoki bank kafolatisiz boʻlib-boʻlib toʻlash imkoniyatini taqdim etishga haqli. Istisno: JShDS, ijtimoiy soliq, toʻlov manbaida olinadigan foyda soligʻi hamda soliq agenti sifatida toʻlanadigan QQSdan iborat.

 2) SKning 100-moddasi 2-qismi manfaatdor shaxs faoliyatni 3 yildan ortiq vaqtdan buyon amalga oshirayotganligi hamda hisoblangan soliqlarni oʻz vaqtida toʻlab kelganligi, ammo moliyaviy ahvoliga koʻra soliq qarzini belgilangan muddatlarda toʻlash imkoniyatiga ega boʻlmaganligi uchun soliqni toʻlash boʻyicha kechiktirish yoki boʻlib-boʻlib toʻlash imkoniyatini taqdim etuvchi 3-1-band bilan toʻldirildi. Bunda SKning 101-moddasi 10-qism bilan toʻldirildi, unga asosan soliq summasi oxirgi 3 yil davomida toʻlangan soliqlar summasining 50%idan oshmasligi kerak.

 3) SKning 243-moddasi 1-qismi 18-bandida belgilanishicha, boshqalar qatorida qimmatbaho metallarni ishlab chiqarish jarayonida hosil boʻladigan parchalarni va chiqindilarni, qimmatbaho metallarning oʻlchov plastinalari va granulalarini, qimmatbaho va yarim qimmatbaho toshlarni, shuningdek qimmatbaho metallardan va qimmatbaho toshlardan yasalgan yarim tayyor mahsulotlarni realizatsiya qilish boʻyicha aylanma ham soliq solishdan ozod etiladi.

 4) SKning 378-moddasi 16-bandi 2-xatboshiga asosan endi professional va oliy ta’lim tashkilotlarida (ilgari - faqat oliy ta’lim muassasalarida) ta’lim olish (oʻzining, shuningdek 26 yoshga toʻlmagan farzandlarining yoki erining (xotinining) ta’lim olishi) uchun toʻlovga yoʻnaltirilgan soliq toʻlovchining ish haqi va boshqa daromadlariga soliq solinmaydi.

 5) SKning 483-moddasi 7 va 8-qismlar bilan toʻldirildi, ularga asosan:

• «Hunarmand» uyushmasining a’zolariga berilgan soliq imtiyozlari «Oʻzbekzargarsanoati» uyushmasining a’zolari boʻlgan zargarlik buyumlarini ishlab chiqaruvchi yakka tartibdagi tadbirkorlarga nisbatan 2023 yil 1 martga qadar boʻlgan davr uchun tatbiq etiladi;
• Orolboʻyida innovatsiyalarni koʻllab-quvvatlash jamgʻarmasi uchun belgilangan tartibda shakllantiriladigan roʻyxatlar boʻyicha olib kiriladigan respublikada oʻxshashi ishlab chiqarilmaydigan ilmiy-laboratoriya asbob-uskunasi, reagentlar va sarflash materiallari 2024 yil 1 yanvarga qadar boʻlgan davr uchun QQSni toʻlashdan ozod etiladi.

 6) Bojxona kodeksining 329-moddasi 10-qism bilan toʻldirildi, u tovarlarni import qilish bilan uch yildan ortiq vaqtdan buyon shugʻullanayotgan, bojxona toʻlovlari boʻyicha majburiyatlarini yaxshi (yoki oʻz vaqtida) bajarib kelgan, lekin moliyaviy ahvoliga koʻra toʻlovlarni belgilangan muddatda toʻlash imkoniyatiga ega boʻlmagan TIF ishtirokchilariga bojxona toʻlovlarini boʻlib-boʻlib toʻlash huquqini beradi. Bojxona toʻlovlarini boʻlib-boʻlib toʻlash imkoniyati oxirgi 3 yil davomida toʻlangan bojxona toʻlovlari summasining 50% idan oshmaydigan summa miqdorida, 6 oy muddatga bojxona toʻlovlarini ta’minlash koʻllanilmagan holda berilishi mumkin.

Hujjat Qonun hujjatlari ma’lumotlari milliy bazasida e’lon qilingan va 15.10.2021 yildan kuchga kirdi.

Norma.uz materiallari asosida