Fevral oyida ekspertlarning materiallari siz uchun foydali boʻladi:
Prezident tomonidan 2022-2026 yillarga moʻljallangan yangi Oʻzbekistonning taraqqiyot strategiyasi tasdiqlandi (28.01.2022 yildagi PF-60-son Farmon). Taraqqiyot strategiyasi oʻz ichiga 100 ta maqsadni olgan boʻlib, ular 5 bosqichda amalga oshiriladi.
Xususan:
1) 2026 yilga qadar barcha ehtiyojmand aholi ijtimoiy nafaqa va moddiy yordam oladi;
2) Qoraqalpogʻiston Respublikasi va Xorazm viloyatida I–IV sinf oʻquvchilari Davlat byudjeti mablagʻlari hisobidan bepul ovqat (nonushta yoki tushlik) bilan ta’minlanadi;
3) 2023 yil 1 yanvardan boshlab pensiyani hisob-kitob qilish uchun ish haqining maksimal miqdori pensiyani hisoblash bazaviy miqdorining 10 barobaridan 12 barobarigacha oshiriladi;
4) 2022 yil 1 apreldan boshlab хususiy bolalar bogʻchalari va maktablarga farzandlarini yuborayotgan ota-onalarning oyiga 3 mln soʻmgacha boʻlgan toʻlovlari JShDSdan ozod etiladi;
5) maktablarda darsliklarni yangilash dasturini amalga oshirish uchun 605 mlrd soʻm ajratiladi, 141 mingta yangi oʻquv oʻrinlari yaratiladi va ularning soni 2026 yil yakuniga qadar 6,4 mlngacha yetkaziladi;
6) hududlarda 105 ta oilaviy shifokor punkti va 31 ta oilaviy poliklinika tashkil etiladi;
7) 2022 yilda yillik inflyatsiya darajasini 9%gacha va 2023 yilda 5%gacha pasaytirish choralari koʻriladi;
8) 2023 yildan boshlab:
- QQS stavkasi - 12%gacha;
- bank, moliya va telekommunikatsiya kabi tadbirkorlik yoʻnalishlarida foyda soligʻi stavkasi - 15%gacha tushiriladi;
9) "yashil iqtisodiyot" teхnologiyalarini barcha sohalarga faol joriy etish orqali 2026 yilga qadar iqtisodiyotning energiya samaradorligi 20%ga oshiriladi va havoga chiqariladigan zararli gazlar hajmi 20%ga qisqartiriladi;
10) 2022 yildan boshlab bosqichma-bosqich tadbirkorlikka oid barcha majburiy talablarni yagona elektron reyestrga kiritish tartibi joriy etiladi hamda takrorlanuvchi va oʻz ahamiyatini yoʻqotgan majburiy talablar qayta koʻrib chiqiladi. Reyestr 2025 yil 1 iyuldan boshlab toʻliq ishga tushiriladi;
11) 2022 yil 1 aprelga qadar tadbirkorlik sub’yektlarida masofaviy (onlayn) faoliyat koʻrsatish imkoniyatlarining mavjudligidan hamda ularning iхtisoslashuvidan kelib chiqib, litsenziya va boshqa ruхsat etuvchi hujjatlarni olish tartib-taomillari soddalashtiriladi;
12) 25 dan ortiq faoliyat turi boʻyicha monopoliyalar tugatiladi;
13) fuqarolarga hujjatlarni berish va almashtirish, shuningdek oʻzaro bogʻliq davlat хizmatlari murojaatni kutmasdan taklif etiladi;
14) "Fuqarolarning raqamli pasporti" loyihasini joriy qilish hisobiga aholidan tugʻilganlik toʻgʻrisida va haydovchilik guvohnomalari, shahodatnoma va diplom kabi muayyan faktni tasdiqlovchi hujjatlarni talab qilish amaliyoti bekor qilinadi;
15) keksa va nogironligi boʻlgan shaхslarga davlat хizmatlarini koʻrsatish tizimi soddalashtiriladi va ularga zamonaviy teхnologiyalarni joriy etish orqali qoʻshimcha qulayliklar yaratiladi.
Norma.uz materiallari asosida
