Marketpleys va toʻlov ilovalari onlayn-NKM tizimiga integratsiya qilinadi

preview

Marketpleys orqali sotuvlar endi soliq toʻlovchi shaxsiy kabinetining “Onlayn-NKM va virtual kassalar toʻgʻrisida axborot” interaktiv xizmatining menyusida va aylanmadan olinadigan soliq va QQS hisob-kitoblarida avtomatik tarzda aks ettiriladi. Ushbu qurilma qanday tuzilganligi haqida buxgalter.uz iltimosiga binoan DSQ huzuridagi “Yangi texnologiyalar” IAM boʻlim boshligʻi Elnor FOZILOV soʻzlab berdi:

 

– Elektron savdo platformalari (marketpleys), turli toʻlov tizimlari, bank toʻlov ilovalari va internet-doʻkonlar masofadan turib toʻlovlarni qabul qilish yoki oʻtkazish chogʻida elektron chek beradi. PQ-5252-son qarorning 5-bandiga asosan ushbu cheklarda ham soliq organlari axborotlar tizimlari tomonidan generatsiya qilingan fiskal belgi aks ettirilishi kerak. Boʻnak toʻlovlari va boʻlib-boʻlib toʻlashni (kreditni) soʻndirish cheklari bundan mustasno.

Mohiyatiga koʻra, bu mazkur cheklar haqiqatda onlayn-NKM va virtual kassalar cheklariga tenglashtirilishini anglatadi. Hozirgi vaqtda biz ushbu texnologiyalarni joriy qilish bosqichidamiz.

– Click va PayME toʻlov tizimlarining mobil ilovalaridan joylarda toʻlovni amalga oshirish uchun faol foydalanilmoqda. Masalan - supermarketlar, dorixonalar, brend doʻkonlarida toʻlov uchun. Bu hollarda sotuvchi onlayn-NKM yoki virtual kassa chekini beradi. Bunda soliqlar boʻyicha hisobotlarda summalar “ikkilanmaydimi”? 

– “Ikkilanmaydi”. Elektron toʻlov tizimlarida ikkita tushuncha mavjud: joylarda toʻlovni amalga oshirish va masofadan turib hisob-kitob qilish.

Joylarda toʻlovni amalga oshirishda hammasi ilgaridek tarzda qoladi. Ya’ni sotuvchi xaridorga bank kartasi (terminal) yordamida hisob-kitobda boʻlgani kabi onlayn-NKM (virtual kassa) chekini berishi shart. Ba’zi sotuvchilar bunday cheklarda hatto qoʻshimcha tarzda hisob-kitob amalga oshirilgan toʻlov tizimini koʻrsatadilar. Ushbu hisob-kitoblar boʻyicha summalar my.soliq.uz da sotuvchining shaxsiy kabinetida “Kassa cheklari boʻyicha tushumlar”da, soliqlar boʻyicha hisob-kitoblarda esa - “Tovarlarni (xizmatlarni) onlayn-NKM orqali realizatsiya qilish” satrida aks ettiriladi.

Sizga eslatib oʻtaman: tovarlar va xizmatlar uchun toʻlovlarni mablagʻlarni xaridorning kartasidan  tadbirkorlik sub’yektining kartasiga oʻtkazish yoʻli bilan qabul qilish taqiqlanadi. Toʻlovlarni toʻlov ilovalari orqali qabul qilish uchun tadbirkor toʻlov tizimi bilan tegishli shartnoma tuzishi kerak.

Masofadan turib hisob-kitoblarni amalga oshirish deganda, asosan sotuvchi va xaridorning bevosita uchrashishini nazarda tutmaydigan vaziyatlarda toʻlovni amalga oshirish tushuniladi. Misol uchun - kommunal xizmatlar, telefon va uyali aloqa, internet, televideniye va hokazolar xizmatlari uchun toʻlov. Qonunga muvofiq, ilgari ham ushbu hollarda xizmatlarni yetkazib beruvchilar onlayn-NKM cheklarini berishlari kerak boʻlgan. Biroq texnik jihatdan buni amalga oshirishning imkoni boʻlmagan. Mijoz mobil ilovadan tranzaksiya chekini olgan.

Endi ushbu cheklar  onlayn-NKM chekiga tenglashtiriladi. Xususan, ularda majburiy tartibda (boʻnak toʻlovlari va boʻlib-boʻlib toʻlashga/kreditga hisob-kitoblar bundan mustasno) onlayn-NKM tizimida generatsiya qilinadigan fiskal belgi va QR-kod aks ettiriladi. Shu tufayli mazkur summalar yetkazib beruvchining soliq boʻyicha Hisob-kitobidan - “Market place orqali tovarlarni (xizmatlarni) realizatsiya qilish” satridan avtomatik tarzda oʻtadi.

– Qoidaga koʻra, marketpleys va toʻlov ilovalari - bu vositachilar boʻlib, ular oʻz tovarlarini sotmaydi va oʻzlari xizmat koʻrsatmaydi, balki haq evaziga axborot tizimlari yordamida ular uchun toʻlovni amalga oshirish imkoniyatini taqdim etadi.  My.soliq.uz da qaysi tadbirkorlik sub’yektining shaxsiy kabinetida  marketpleys orqali sotish cheklari aks ettiriladi?

– Ular fiskal ma’lumotlar operatoriga chekni joʻnatgan, unga fiskal modul roʻyxatdan oʻtkazilgan tashkilotning shaxsiy kabinetida aks ettiriladi. Hammasi xuddi hisob-kitob onlayn-NKM yoki virtual kassa yordamida amalga oshirilgandek boʻladi.

Bu yerda summalar toʻgʻri aks ettirilishini kuzatib borish muhimdir. Chekda vositachilik shartnomasi boʻyicha sotilgan tovarning boshqa rekvizitlari orasida, komitentning STIRi koʻrsatilgan boʻlishi kerak. Bunda komitent my.soliq.uz dagi oʻzining shaxsiy kabinetida oʻz vositachilarining roʻyxatiga  marketpleys yoki toʻlov ilovasiga egalik qiluvchi tashkilotni kiritishi kerak. Bu “Tashkilotning vositachilari roʻyxatini shakllantirish” interaktiv xizmati yordamida amalga oshiriladi. Aks holda barcha summa sotishdan olingan tushum sifatida vositachida aks ettiriladi.

Komitent (tovarni sotayotgan tashkilot) tushumni faqat soliq boʻyicha Hisob-kitobda - “Market place orqali tovarlarni (xizmatlarni) realizatsiya qilish” satrida koʻradi. Ma’lumotlarni har bir chek kesimida koʻrish imkoniyati hozircha yoʻq.

– Televideniye va internet-provayderlar xizmatlariga toʻlov uchun, bir nechta  tizimlarda amalga oshirilgan toʻlov uchun berilgan yangilangan cheklarni koʻrib chiqdim. Rekvizitlarda faqat fiskal belgi va QR-kod yangilik ekan va ular ham hammada emas. Agar ushbu cheklar endi onlayn-NKM cheklariga tenglashtirilsa, ular onlayn-NKM cheklari uchun belgilangan rekvizitlarning toʻliq roʻyxatini oʻz ichiga olishi kerakmi?

– Ha, xaridorlar va sotuvchilar oʻrtasida masofadan turib amalga oshirilgan hisob-kitoblar fakti boʻyicha berilgan marketpleysning elektron cheklari onlayn-NKM va virtual kassalar cheklari uchun majburiy boʻlgan barcha rekvizitlarni oʻz ichiga olishi kerak.

Har bir rekvizit soliq organlarining axborot tizimlarida ma’lumotlar toʻgʻri qayta ishlanishi, xususan - soliqlar boʻyicha hisob-kitoblarda realizatsiya toʻgʻri aks ettirilishi uchun oʻz qiymatiga ega.

Toʻgʻri ta’kidlanganidek, hozircha elektron tranzaksiyalar cheklari onlayn-NKM cheklarining hamma rekvizitlarini ham oʻz ichiga olmagan. Gap shundaki, birinchi bosqichda soliq organlarining axborot tizimlari va toʻlov tizimlarini integratsiyalash vazifasi qoʻyilgandi. Fiskal ma’lumotlar operatoriga - bozorda Payme, Click, Apelsin, Oson, Upay, Pay Way, Paynet, Multicard kabi mashhur savdo rusumlari bilan taqdim etilgan jami 84 ta shunday tashkilotlar ulangan. Ularning soni oshib bormoqda.

Parallel ravishda ularning cheklari bosqichma-bosqich onlayn-NKM va virtual kassalar cheklariga qoʻyiladigan talablarga muvofiq keltirilmoqda.

– Hisob-kitoblarda imtiyozli tovarlarni toʻgʻri aks ettirish,  onlayn-NKM tizimi cheklari ma’lumotlariga toʻgʻri tuzatish kiritish my.soliq.uz dagi shaxsiy kabinetlarning “Onlayn-NKM va virtual kassalar toʻgʻrisida axborot” interaktiv xizmati bilan uzviy bogʻliqdir. Ushbu funksionalni market-pleys cheklariga nisbatan ham qoʻllasa boʻladimi?

– Albatta, ushbu barcha imkoniyatlar onlayn-NKM uchun mavjud funksional doirasida yoki maxsus yechimlar yordamida - marketpleys uchun ham roʻyobga chiqariladi. Hozircha faqat ishlab chiqaruvchi va tashkilotdan qat’i nazar, tovarlarga tatbiq qilinadigan imtiyozni, ya’ni - MXIKga bogʻlangan imtiyozni qoʻllash boʻyicha funksional ishlayapti. Biroq faqat toʻlov tizimi oʻz cheklarida toʻgʻri MXIKni aks ettirgan taqdirda ishlaydi.

Marketpleys bilan ishlashda birinchi navbatdagi vazifalardan biri - vositachilik savdosida, boʻnak toʻlovlariga va kredit boʻyicha hisob-kitoblarga cheklarni toʻgʻri shakllantirish va berishni yoʻlga qoʻyish.

– Mijozlar bilan masofadan turib hisob-kitob qilishda marketpleys va elektron toʻlovlar tizimi xizmatlaridan foydalanuvchilar oʻtish davrida soliq boʻyicha Hisob-kitobni qanday topshiradi? Xususan - aprel oyi uchun?

– Zarurat boʻlganda, barcha summalar soliqlar boʻyicha hisob-kitoblarda toʻgʻri aks ettirilishi uchun soliq organlari manzilli yordam koʻrsatadi. Sizda yuzaga kelayotgan muammolar va fikr-mulohazalar haqida quyidagi tarzda xabar berish mumkin:

Onlayn-NKM tizimi, shu jumladan marketpleys orqali realizatsiya qilish boʻyicha yigʻma axborot soliq toʻlovchi shaxsiy kabinetining “Onlayn-NKM va virtual kassalar toʻgʻrisida axborot” interaktiv xizmatining “Tushumlar boʻyicha hisobot” menyusida mavjud.

Manbaga qarang.

Oleg GAYeVOY tayyorladi


Naqdsiz hisob-kitob Naqdsiz hisob-kitob Naqdsiz hisob-kitob /oz/publish/doc/text180377_marketpleys_va_tulov_ilovalari_onlayn-nkm_tizimiga_integraciya_qilinadi