Jismoniy shaхslardan olinadigan mol-mulk soligʻini toʻlash muddatlari yaqinlashmoqda

15 aprelga qadar jismoniy shaхslar mol-mulk soligʻi va yer soligʻining birinchi qismini toʻlaydilar. Buxgalter.uz buni qanday amalga oshirish mumkinligini eslatib oʻtadi:

Soliqni :

• yarim yilda 1 marta teng qismlarda – joriy yilning 15 apreliga va 15 oktyabriga qadar

yoki

• bir yilda 1 marta yagona toʻlov bilan – 15 aprelga qadar toʻlash mumkin.

Qanday toʻlash mumkin

Bir nechta variantlar mavjud:

1) shaхsan borib – har qanday bankning kassasida, pochtada yoki tuman soliq inspeksiyasining ofisida. Agar bank yoki pochta orqali toʻlasangiz, oldindan toʻlov summasini bilib oling va kvitansiyani toʻgʻri toʻldiring. Kvitansiyada ob’yektning kadastr raqami, manzili, egalik qiluvchining JShShIRi va F.I.Sh., davr, summani koʻrsating;

2) Yagona interaktiv davlat хizmatlari portali orqali (“Mol-mulk va yer soliqlari” хizmati);

3) Soliq, Payme, Click yoki Upay mobil toʻlov ilovalari orqali. Soliq bazasi bilan integratsiya qilingan ilovalar JShShIR va ob’yektning kadastr raqami boʻyicha foydalanuvchilarga oʻtgan yildan buyon qoldiq yoki qarzdorlik summasini, joriy yil uchun hisoblangan summani koʻrsatadi.

Soliq idorasining saytida “Koʻp uchraydigan savollar” boʻlimida mol-mulk soligʻini toʻlashdan qisman yoki toʻliq ozod etilgan soliq toʻlovchilar toʻgʻrisida tushuntirishlarni topish mumkin.

Saida JONIZOQOVA tayyorladi