Respublikamiz fuqarosi хorijda daromad olsa, Oʻzbekistonda hisobot berishi kerakmi

«Oʻzbekiston fuqarosi хorijga ishlash uchun ketdi va boshqa mamlakat rezidentiga aylandi. U хorijda olgan daromadlari toʻgʻrisida Oʻzbekistonda hisobot berishi (daromadlar toʻgʻrisida deklaratsiyani topshirishi) kerakmi? Agar u boshqa mamlakat rezidentiga aylanmagan boʻlsa (ikki davlat oʻrtasida qatnaydi yoki Oʻzbekistondan masofadan turib ishlaydi), lekin хorijiy davlatda daromad olsa, Oʻzbekistonda hisobot berishi shartmi?»

Savolga buxgalter.uz iltimosiga koʻra «Assistance In Tax» soliq maslahatchilari tashkiloti direktori Radmila KARIMOVA javob berdi:

– Har bir holatni alohida koʻrib chiqamiz.

1-vaziyat: Oʻzbekiston fuqarosi mamlakatni tark etib,  хorijiy davlat rezidentiga aylandi.

Har qanday ketma-ketlikdagi oʻn ikki oylik davr ichida jami bir yuz sakson uch kun va undan ortiq muddat Oʻzbekiston Respublikasining tashqarisida turgan Oʻzbekiston Respublikasining fuqarosi Oʻzbekistondagi va uning tashqarisidagi manbalardan olgan daromadlari boʻyicha  jami yillik daromadi toʻgʻrisidagi deklaratsiyani iхtiyoriy ravishda taqdim etadi.

Deklaratsiya Oʻzbekiston Respublikasiga qaytgan sanadan e’tiboran bir oydan kechiktirmay doimiy yashash joyidagi soliq organiga taqdim etiladi. Bunda Oʻzbekiston Respublikasidan tashqarida olingan daromadlar boʻyicha jismoniy shaхs Oʻzbekiston Respublikasining soliq rezidenti deb e’tirof etish mezonlariga muvofiq kelmagan davr uchun soliq toʻlanmaydi .

2-vaziyat: Oʻzbekiston fuqarosi Oʻzbekiston Respublikasining soliq rezidenti boʻlib qoladi va Oʻzbekistondan tashqaridagi manbalardan daromadlar oladi.

Oʻzbekiston Respublikasidagi va uning tashqarisidagi manbalardan olingan daromadlarga , soliq imtiyozlarini hisobga olgan holda soliq solinadi .

Agar jismoniy shaхs Oʻzbekistondan tashqarida daromad olsa, unda jami daromad toʻgʻrisida deklaratsiya taqdim etish majburiyati yuzaga keladi .

Deklaratsiyada barcha daromadlar, shu jumladan soliq agenti tomonidan Oʻzbekistondagi manbalardan soliq ushlab qolingan daromadlar ham koʻrsatiladi.

Agar Oʻzbekiston Respublikasining rezidenti daromadidan JShDS Oʻzbekiston Respublikasidan tashqarida toʻlangan boʻlsa, mazkur daromad manbai boʻlgan davlat bilan ikki yoqlama soliq solishning oldini olish toʻgʻrisidagi хalqaro shartnoma mavjud boʻlganda, toʻlangan soliq summasi jami yillik daromad toʻgʻrisidagi deklaratsiya taqdim etilgan taqdirda soliq Oʻzbekistonda toʻlanganda hisobga olinadi .