Boshqa hisobraqamiga xato ravishda oʻtkazilgan pulni qanday qaytarish mumkin

preview

Buxgalter pul mablagʻlarini xato ravishda boshqa kontragentga oʻtkazdi. Pul mablagʻlarini qanday qaytarishni Norma eksperti Dilorom SAIDOVA tushuntirdi:

 

Mutaxassislarning tushuntirishlarini oʻtkazib yubormaslik uchun bizning telegram-kanalimizga obuna boʻling.

 

– Siz pul mablagʻlarini xato ravishda toʻlagan boʻlsangiz, ularni qaytarishni talab qilishga haqlisiz, sababi toʻlovni oluvchi oldida sizning hech qanday shartnoma yoki boshqa majburiyatlaringiz mavjud emas . Mol-mulkni asossiz olgan shaxs boylikning asossiz orttirilganligini bilgan yoki bilishi lozim boʻlgan vaqtdan boshlab shu mol-mulkdan chiqarib olgan yoki chiqarib olishi lozim boʻlgan barcha daromadlarni jabrlanuvchiga qaytarishi yoki toʻlashi shart .

Xato ravishda oʻtkazilgan mablagʻlarni qaytarishning bir nechta usullari mavjud. Xato qanchalik avvalroq aniqlansa va siz pulni qaytarish uchun harakatlarni tezroq boshlasangiz, pul mablagʻlarini qaytarish imkoniyati shunchalik yuqori boʻladi.

 

1. Xato ravishda oʻtkazilgan mablagʻlarni qaytarish toʻgʻrisidagi ariza bilan bankka murojaat qiling

Agar xato mablagʻlar oluvchining hisobraqamiga oʻtkazilgunga qadar aniqlangan boʻlsa, tezda bankka toʻlovni bekor qilish toʻgʻrisida ariza bilan murojaat qiling. Pul oluvchining hisobraqamiga oʻtkazilgunga qadar bank toʻlovni bekor qilishi mumkin. Agar  pul mablagʻlari oluvchining hisobraqamiga oʻtkazilgan boʻlsa, bank ularni faqat hisobraqami egasining roziligi yoki sud qarori boʻyicha hisobdan chiqarishi mumkin.

 

2. Bevosita pul mablagʻlarini oluvchiga murojaat qiling

Bu vaziyatda mablagʻlarni qaytarish oluvchining insofliligi va halolligi, uning moliyaviy imkoniyati va hokazoga bogʻliq boʻladi.

Xato ravishda oʻtkazilgan toʻlov rekvizitlari boʻyicha pulni oluvchining bogʻlanish ma’lumotlarini topish mumkin. Vaziyatni tushuntirgan holda unga ogʻzaki murojaat qilish va xato oʻtkazilgan summani qaytarishni iltimos qilish mumkin. Agar u 1–2 kun mobaynida mablagʻlarni qaytarmasa, mablagʻlar xato ravishda oʻtkazilgan oluvchining nomiga ushbu summani hisobraqamiga xatda koʻrsatilgan muddatda qaytarish iltimosi bilan talabnoma-xat yozish lozim. Talabnomani koʻrib chiqishning umumiy muddati – 30 kun.

 

 

Xoʻjalik yurituvchi sub’yekt talabnomani toʻliq yoki qisman tan olgan boʻlsa, u ariza beruvchiga tan olingan summani ixtiyoriy ravishda oʻtkazadi. Agar talabnomani tan olish toʻgʻrisidagi javobda tan olingan summa oʻtkazilishi haqida ma’lumot boʻlmasa, talabnoma bildirgan ariza beruvchi javob olingandan soʻng 20 kun oʻtgach, bankka qarzdor tan olgan summani soʻzsiz tartibda oʻtkazish toʻgʻrisidagi farmoyishni taqdim etishga haqli . Farmoyishga qarzdorning javobi ilova qilinadi.
Agar oluvchi xato ravishda kelib tushgan mablagʻlarni qaytarishni istamagan boʻlsa, 3-usuldan foydalanish lozim.

 

3. Sudga da’vo arizasi bilan murojaat qiling

Oluvchi bilan kelishishning iloji boʻlmadi. Oxirgi chora – bu sudga da’vo arizasi berish. Sudlashish koʻp vaqt, kuch va boj hamda yurist (advokat) xizmatlari uchun toʻlovni talab qiladi. Agar summa korxona uchun ahamiyatli boʻlsa, bundan ma’no boʻladi. Sud xarajatlarini da’vo arizasini berishda ma’naviy zararni kompensatsiya qilish miqdoriga kiritish mumkin.
Siz pul mablagʻlarini ixtiyoriy ravishda qaytarish uchun choralar koʻrganligingizni tasdiqlash uchun da’vo arizasiga albatta talabnoma-xatning nusxasini ilova qiling. Bu sudda ishning koʻrib chiqilishini tezlashtirishi mumkin.

Sud pul mablagʻlarini da’vogarga qaytarish toʻgʻrisida qaror qabul qilgandan soʻng, ular qaytarilishi lozim. Pul mablagʻlarini qaytarish muddati oluvchining moliyaviy holatiga bogʻliq boʻladi. Agar oluvchi bankrotlik bosqichida boʻlsa, pulning qaytarilmasligi ehtimoli mavjud.

Tavsiya

Toʻlovni oʻtkazishdan oldin xato ravishda oʻtkazish va pul mablagʻlarini qaytarish zaruriyatini istisno qilish uchun oluvchining rekvizitlarini tekshiring.

 

 

 

 

Yuridik yordamchi — maslahatlar Yuridik yordamchi Yuridik yordamchi — buxgalter.uz ekspertlarining maslahatlari: tushuntirishlar, misollar va koʻp beriladigan savollarga javoblar. /oz/publish/doc/text199886_boshqa_hisobraqamiga_hato_ravishda_utkazilgan_pulni_qanday_qaytarish_mumkin