9 oyni xatolarsiz yopamiz:
Ta’til va dam olish huquqini himoya qiluvchi mehnat qonunchiligi normalariga qaramay, buxgalterlar Oʻzbekistonda boʻlmagan kunlarda ham xizmat vazifalarini bajarishga tayyor turishlari juda tez-tez kerak boʻladi. Ba’zida bosh buxgalter oʻrniga ishlaydigan odam boʻlmaydi. Ba’zida esa uning oʻzi ishiga begona odamlarni yaqinlashtirishdan choʻchiydi. Lekin ish uchun zarur boʻlgan barcha saytlarga chet eldan kirib boʻlmaydi.
Vuxgalter.uz iltimosiga koʻra, hududiy cheklovlarni aylanib oʻtishning ishlaydigan usuli haqida TA-VAT buxgalteriya autsorsi asoschisi, MHXS va boshqaruv hisobi boʻyicha trener Aleksandra TOLMAChEVA gapirib berdi:
Mutaxassisning muhim tushuntirishini oʻtkazib yubormaslik uchun bizning Telegram-kanalimizga obuna boʻling.
- Har bir buxgalter oʻz ta’tilini shunday rejalashtiradiki, dam olish kunlariga iloji boricha kamroq majburiy ishlar toʻgʻri kelsin. Bunda, aytgancha, «2024 yil avgust oyi uchun bosh buxgalter rejasi» yordam beradi. Muqarrar vaziyatlarda, ma’lum majburiyatlarni bajarishda, xususan - zarur ma’lumotlarni yigʻish, hujjatlarni tayyorlash va hokazolarda sizga yordam beradigan hamkasblaringiz koʻmagiga tayaning.
Agar siz chet elga ketmoqchi boʻlsangiz, ba’zi saytlardagi shaxsiy kabinetlarga kirishda muammolaringiz boʻlishi mumkinligini yodda tuting.
Chet elda siz quyidagilarda bemalol ishlay olasiz:
- didox.uz va boshqa koʻplab elektron hujjat aylanmasi operatorlarining saytlarida. Demak, siz zarur hisobvaraq-faktura yoki boshqa hujjatni elektron shaklda muammosiz taqdim etishingiz yoki imzolashingiz mumkin.
- hisobot.stat.uz. Bu resurs ta’til kunlarida statistik hisobot topshirish kerak boʻlganda juda muhim hisoblanadi.
Bu resurslarda ishlash uchun eng muhimi ERI va uning paroli, shuningdek zarur ma’lumotlar manbalari oʻzingizda boʻlishi kerak. Tabiiyki, ERI kaliti sertifikatini begona qurilmalarga yozmang va parolni ehtiyot qiling. Ish tugagach, shaxsiy kabinetdan "Chiqish" tugmasini bosishni unutmang.
Biroq, ba’zi hollarda ERI va parol yetarli boʻlmasligi mumkin. Ba’zi davlat organlarining saytlari Oʻzbekiston tashqarisida shunchaki ochilmaydi. Bu - faqat Oʻzbekistonning emas, balki koʻplab xorijiy mamlakatlarning, jumladan Rossiyaning ham xususiyati.
Xavfsizlik siyosati va sezgir ma’lumotlarga kirishni nazorat qilish tufayli davlat organlari chet el IP-manzillaridan foydalanuvchilar uchun oʻz saytlariga kirishni cheklaydi. Demak, chet el IP-manzilidan saytga kirib boʻlmaydi.
Bunday resurslarga quyidagi talab yuqori boʻlgan saytlar kiradi:
- my.soliq.uz, my3.soliq.uz, new.soliqservis.uz va Soliq qoʻmitasining boshqa resurslari;
- nps.xb.uz - ShJBPH boʻyicha hisobotlarni topshirish uchun Xalq bankining sayti.
Taqiqni chetlab oʻtishning sinalgan usuli bor:
1. Oʻz ish kompyuteringizga masofaviy kirish dasturini (Any Desk, TeamViewer va h.k.) oʻrnating.
2. Agar siz ofisdagi kompyuterda ishlasangiz, hamkasblaringizdan birortasi bilan oldindan kelishib olingki, u sizga ish kompyuteringiz bilan aloqa oʻrnatishga yordam bersin (vaqtida kompyuterni yoqsin va dastur yaratadigan masofaviy kirish parolini sizga yetkazsin). Shuningdek - siz ishlayotgan vaqtda sizning kompyuteringizga hech kim yaqinlashmasligini kuzatib tursin. Tushunarliki, bu siz toʻliq ishonadigan mas’uliyatli odam boʻlishi kerak.
Ehtimol, USB-tokendagi ERI bilan ishlashga toʻgʻri keladi. Agar davlat organlari resurslariga kirish uchun ikkinchi ERI olish va uni fleshkaga yozib olish mumkin boʻlsa, banklar bilan bu variant oʻtmaydi. Shuning uchun ERIli fleshkani hamkasbingizga ishonib topshirishga toʻgʻri keladi. U kerakli paytda uni USB-portga ulashi kerak boʻladi.
Agar siz ERIli USB-tokenni oʻz xodimingizga topshirsangiz, buni hujjat bilan rasmiylashtiring, toki rahbariyat ERIli USB-tokenning topshirilgani haqida bilsin.
Yana ikkita muhim maslahat:
1. Ishni tugatgach, davlat organi saytidagi shaxsiy kabinetdan chiqishni unutmang.
2. Hech qayerga ketmasdan oldin masofaviy kirish dasturi bilan barcha harakatlarni oldindan mashq qilib koʻring. Toki yoningizda yordam beradigan, koʻrsatadigan va maslahat beradigan IT-mutaxassis boʻlsin. Oʻzingiz tushunasiz, Bagam orollaridagi mehmonxonada tungi soat uchda notanish dasturiy ta’minotni oʻzlashtirish - eng yaxshi hikoya emas!
Sizga yoqimli dam olish tilayman!
