2025 yilda aksiz soligʻida nimalar oʻzgaradi

2025 yilda aksiz soligʻi boʻyicha oʻzgarishlar haqida buxgalter.uz iltimosiga koʻra Iqtisodiyot va moliya vazirligi mutaхassislari ma’lumot berishdi:

 

1. Mobil aloqa хizmatlariga soliq bekor qilindi

Ilgari u 10% ni tashkil etardi.

 

2. Soliq stavkalari oshirildi 

Tamaki mahsulotlari boʻyicha filtrli, filtrsiz sigaretlar, papiroslar, sigarillalar (sigaritlar), bidi, kreteklar uchun soliq stavkasining advalor qismi (10%) bekor qilindi. 1000 dona uchun quyidagi stavkalar belgilandi:

• 2025 yil 1 yanvardan ishlab chiqariladigan mahsulotlar uchun – 300 000 soʻm, import qilinadiganlar uchun – 330 000 soʻm;
• 2025 yil 1 iyuldan ikkalasi uchun ham – 340 000 soʻm (stavkalar tenglashtiriladi).

Bundan tashqari, boshqa tamaki mahsulotlariga stavkalar oshirildi.

Etil spirti boʻyicha 2025 yil 1 yanvardan ishlab chiqariladigan va import qilinadigan spirt uchun stavka tenglashtirildi, u bir litr uchun 15 000 soʻmni tashkil etadi. Bunda don distillyati etil spirti uchun belgilangan stavka boʻyicha soliqqa tortiladi (teхnik spirt olish uchun foydalanilgan etil spirtining bosh fraksiyasi bundan mustasno).

2025 yil 1 yanvardan:

• ishlab chiqariladigan aroq, konyak va boshqa alkogol mahsulotlari boʻyicha stavka 10% ga indeksatsiya qilinib, bir litr uchun 44 000 soʻm miqdorida, import tovarlar uchun esa 75% ga pasaytirilib, bir litr uchun 76 000 soʻm miqdorida belgilandi;
• ishlab chiqariladigan va import qilinadigan ichimliklar stavkalarini bosqichma-bosqich tenglashtirish maqsadida vino va pivo boʻyicha stavkalar oʻzgartirildi. Shuningdek, import pivo uchun advalor stavka bekor qilindi.

 

3. Neft mahsulotlariga stavkalar indeksatsiya qilindi

2025 yil 1 apreldan neft mahsulotlari (benzin, dizel yoqilgʻisi, aviakerosin, motor moyi), shuningdek yakuniy iste’molchilarga benzin, dizel yoqilgʻisi va gaz realizatsiyasi boʻyicha stavkalar 10%ga oshiriladi.

 

Tabiiy gazga soliq unifikatsiya qilindi

Oʻzbekistonda qazib olingan tabiiy gazni realizatsiya qilishda soliq stavkasi 20% dan 12% gacha tushirildi. Bunda import gazni realizatsiya qilishda ham shunday stavka – 12% joriy etildi. Bunda gazni olib kirishda soliq qoʻllanilmaydi.

 

Shirin gazlanmagan ichimliklarga soliq joriy etildi 

2025 yil 1 apreldan gazlanmagan shakar tarkibli ichimliklar (salqin choylar, meva sharbatlari, kompotlar va boshqalar) uchun bir litriga 500 soʻm miqdorida aksiz soligʻi joriy etiladi.

Bunda tabiiy shirin boʻlgan va qoʻshimcha shakar hamda boshqa shirinlashtiruvchi yoki хushboʻy moddalar qoʻshilmagan meva va (yoki) sabzavotlardan tayyorlangan sharbatlarga soliq qoʻllanilmaydi.

Eslatib oʻtamiz, hozirda gazlangan ichimliklar boʻyicha ham shunday 500 soʻm stavkada soliq toʻlanadi.