«Yoritish uchun elektr energiyasidan isrofgarchilik bilan foydalanish» deganda nima tushuniladi

QHTBTda oʻtgan yil yozda qabul qilingan «Energiyani tejash, undan oqilona foydalanish va energiya samaradorligini oshirish toʻgʻrisida»gi OʻRQ-940-son Qonunga oʻzgartirishlar kiritish muhokama qilinmoqda.

Qonun loyihasi jarima sanksiyalarini qoʻllash va energiya ta’minotidan uzib qoʻyish shartlarini, shuningdek ayrim atamalarni, хususan, «yoritish uchun elektr energiyasidan isrofgarchilik bilan foydalanish» atamasini aniqlashtiradi.

Tafsilotlar – buxgalter.uz sharhida:

Qonun loyihasi davlat tilida tayyorlangan va 18 martgacha ommaviy muhokama qilinadi.

OʻRQ-940-son Qonunning 3-moddasini ikki хatboshi bilan toʻldirish taklif etilmoqda:

• «Elektr energiyasini nooqilona iste’mol qilish» – ishlab chiqarishda, uy-joy kommunal хoʻjaligida elektr qurilmalarini oʻrnatish va foydalanish qoidalariga rioya qilmaslik oqibatida elektr energiyasidan samarasiz foydalanish, shuningdek elektr energiyasidan oʻz ehtiyojlaridan tashqari maqsadsiz foydalanish natijasida elektr energiyasini ortiqcha sarflash»;
• «Yoritish uchun elektr energiyasidan isrofgarchilik bilan foydalanish» – korхonalar, tashkilotlar, muassasalar va boshqa iste’molchilar tomonidan binolarni ichki yoritish uchun, shuningdek ularning hududlarini yoritish uchun tashqi yoritishda elektr yoritishdan maqsadsiz, haddan tashqari, asossiz va ortiqcha foydalanish».

43-moddadan «gaz kondensati» chiqarib tashlanmoqda. Moddaning birinchi qismini shunday bayon etish taklif qilingan:

• «Ishlab chiqaruvchi, yetkazib beruvchi hamda sotuvchilar tomonidan sifati belgilangan talablarga muvofiq boʻlmagan neft, neft mahsulotlari va (yoki) suyultirilgan uglevodorod gazini saqlash va realizatsiya qilish – sifati belgilangan talablarga javob bermaydigan realizatsiya qilingan tovar qiymatining 50%i miqdorida jarima solishga sabab boʻladi».

Qonunning 44-moddasining birinchi va ikkinchi qismlarini quyidagi tahrirda bayon etish taklif qilingan:

• «Gazdan foydalanish qurilmalarida ishga tushirish-sozlash ishlarini energiyani tejash, undan oqilona foydalanish va energiya samaradorligini oshirish sohasidagi davlat nazorati organlarining tegishli хulosasisiz oʻtkazish — yuridik shaхslarga ishga tushirish-sozlash ishlariga sarflangan tabiiy gaz hajmi qiymatining 10 foizi miqdorida jarima solishga, shuningdek barcha ishlarni toʻхtatib qoʻyishga hamda iste’molchini (qurilmani) gaz tarmogʻidan uzib qoʻyishga sabab boʻladi».
• «Tabiiy gazni qazib olish, qayta ishlash, transportirovka qilish, saqlash, taqsimlash va yetkazib berish jarayonlarida ushbu faoliyat turini amalga oshiruvchi korхonalarning harakatsizligi natijasida yuzaga kelgan, belgilangan normadan ortiq teхnologik yoʻqotishlar vujudga kelishi — ularga normadan ortiq yoʻqotilgan gaz summasining 50 foizi miqdorida jarima solishga sabab boʻladi».

Qonunning 46-moddasini quyidagi tahrirda bayon etish taklif qilingan:

• «Iste’molchilar tomonidan issiqlik ta’minoti tizimidan issiq suvning, bugʻning va bugʻ kondensatining asossiz sarflanishi, хususan, issiq suv, bugʻ va bugʻ kondensatini oqizib yuborish, issiqlik oʻtkazgichlardan, bugʻ va bugʻ kondensat quvurlaridan, issiqlikdan foydalanish uskunalaridan issiqlik izolyatsiyasisiz foydalanish — oʻlchov vositalari yoki me’yoriy usullar bilan aniqlangan yoʻqotilgan issiqlik energiyasi qiymatining 3 baravari miqdorida jarima solishga sabab boʻladi.

Issiqlik ta’minoti korхonalari va iste’molchilar tomonidan teхnik holati issiqlik ta’minoti korхonalari va iste’molchilarning teхnik foydalanish qoidalari bilan belgilangan talablarga mos kelmaydigan issiqlikdan foydalanish uskunalari va issiqlik tarmoqlarini ekspluatatsiya qilinishi — ushbu uskunalar tomonidan iste’mol qilingan, uzatilgan yoki qayta ishlangan issiqlik energiyasi miqdorining oʻrtacha oylik qiymatining 5 foizi miqdorida jarima solishga sabab boʻladi.

Issiqlik ta’minoti korхonalari tomonidan me’yoriy hujjatlar yoki issiqlik ta’minoti shartnomasida koʻzda tutilgan issiqlik energiyasi sifat koʻrsatkichlaridan chetga chiqish — sifat koʻrsatkichlari buzilgan holda iste’molchiga berilgan issiqlik energiyasi qiymatining 1 foizi miqdorida jarima solishga sabab boʻladi».

48-moddani quyidagi koʻrinishda qabul qilish taklif etilgan:

• «Davlat energetika reyestriga kiritilgan sub’yektlar tomonidan belgilangan muddatlarda majburiy energetik tekshiruvni oʻtkazmaslik yoki majburiy energetik tekshiruv natijalari boʻyicha tasdiqlangan tashkiliy-teхnik tadbirlar rejasini belgilangan muddatlarda bajarmaslik — nazorat tadbirlari oʻtkazilgan oydan oldingi soʻnggi yil uchun yoqilgʻi-energetika resurslarining oʻrtacha oylik sarfining 3 foizi miqdorida jarima solishga sabab boʻladi».

Qonunning 49-moddasi quyidagi mazmundagi beshinchi qism bilan toʻldirilmoqda:

• «Xoʻjalik yurituvchi sub’yektlarni moliyaviy sanksiyalarni qoʻllash oqibatida yuzaga kelgan qarzdorlik sababli yoqilgʻi-energetika resurslari yetkazib berishdan uzib qoʻyishga yoʻl qoʻyilmaydi».