2026 yilda mol-mulk soligʻida nimalar oʻzgaradi

preview

Soliq kodeksiga 25.12.2025 yildagi OʻRQ-1108-son Qonun bilan kiritilgan oʻzgartirishlarni oʻrganishda davom etamiz.

Mulk soligʻi qismidagi oʻzgarishlarni buxgalter.uz iltimosiga binoan Iqtisodiyot va moliya vazirligi Soliq-bojxona siyosati boshqarmasi boshligʻi Ashrafxon SALOHIDDINOV tushuntirdi:

Qonunchilikdagi muhim oʻzgarishlarni oʻtkazib yubormaslik uchun Telegram kanalimizga obuna boʻling.

 

Yuridik shaxslar uchun:

1. Bino va inshootlar boʻyicha eng kam qiymat oshirildi.

Davlat roʻyxatidan oʻtkazilishi lozim boʻlgan binolar va inshootlar boʻyicha soliq bazasi 1 kvadrat metr uchun mutlaq qiymatda belgilangan eng kam qiymatdan past boʻlishi mumkin emas.

2026 yildan boshlab eng kam qiymat oshirildi :

  • Toshkent shahrida – 3,3 mln soʻmdan 3,53 mln soʻmgacha;
  • Nukus shahri va viloyat markazlarida – 2,2 mln soʻmdan 2,35 mln soʻmgacha;
  • boshqa shaharlar va qishloq joylarda – 1,3 mln soʻmdan 1,39 mln soʻmgacha.

 

2. Kamaytirilgan soliq stavkasi oshirildi.

Quyidagilarga nisbatan soliq stavkasi 0,65%dan  0,7%gacha oshirildi :

  • umumiy foydalanishdagi temir yoʻllar, magistral quvurlar, aloqa va elektr uzatish liniyalari, shuningdek koʻrsatib oʻtilgan ob’yektlarning ajralmas texnologik qismi boʻlgan inshootlar;
  • Vazirlar Mahkamasining konservatsiya qilish toʻgʻrisidagi qarori qabul qilingan koʻchmas mulk va qurilishi tugallanmagan ob’yektlar.

 

3. Soliq imtiyozlarini qoʻllash shartlari joriy etildi.

Soliq imtiyozlari oʻtgan kalendar yil yakunlari boʻyicha quyidagi shartlar bir vaqtning oʻzida bajarilganda qoʻllaniladi :

  • tovarlarni (xizmatlarni) realizatsiya qilishdan olingan jami daromad mol-mulk soligʻi va (yoki) yer soligʻi boʻyicha foydalanilgan imtiyoz summasidan oshsa;
  • xodimlarning oʻrtacha yillik soni 3 kishidan kam boʻlmaganda har bir xodimga har oyda MHTEKMning 2 baravaridan kam boʻlmagan miqdorda ish haqi hisoblanadi.

Ushbu shartlarni belgilashda quyidagilar hisobga olinadi:

  • taqdim etilgan aniqlashtirilgan soliq hisoboti;
  • oxirgi 12 oy uchun tovarlarni (xizmatlarni) realizatsiya qilish boʻyicha aylanma (agar kalendar yil yakunlari boʻyicha hisobot taqdim etish muddati kelmagan boʻlsa).

E’tibor bering

Kalendar yili davomida yangidan tashkil etilgan tashkilotlarga va yangi imtiyozlarga nisbatan ushbu shartlar keyingi kalendar yil yakunlari boʻyicha qoʻllaniladi (qayta tashkil etilgan yuridik shaxslardan tashqari).

 

Bu shartlar qoʻllanilmaydi:

  • toʻgʻridan-toʻgʻri xususiy xorijiy investitsiyalar ishtirokidagi yuridik shaxslarga;
  • mahsulot taqsimoti toʻgʻrisidagi bitim ishtirokchilariga;
  • notijorat tashkilotlarga;
  • byudjet tashkilotlariga;
  • yagona ishtirokchilari nogironligi boʻlgan shaxslarning jamoat birlashmalari boʻlgan, xodimlarining umumiy sonida nogironligi boʻlgan shaxslar kamida 50 foizni, nogironligi boʻlgan shaxslar mehnatiga haq toʻlash fondi esa – umumiy mehnatga haq toʻlash fondining kamida 50 foizini tashkil etadigan yuridik shaxslarga;
  • 2026 yil 1 yanvarga qadar maxsus iqtisodiy zona ishtirokchisi maqomini olgan yuridik shaxslarga.

Qayd etilgan qoidalarni qoʻllash tartibini Vazirlar Mahkamasi qoʻshimcha ravishda belgilaydi. U 2027 yildan boshlab 2026 yil yakuniga qadar qoʻllaniladi (25.12.2025 y. OʻRQ-1108-son 9-m. 3-q.).

E’tibor bering

Yuridik shaxslarning mol-mulkiga solinadigan soliq boʻyicha hisobotlar soliq organlari tomonidan proaktiv tartibda – ularning axborot tizimida mavjud boʻlgan va soliq toʻlovchi (soliq agenti) tomonidan shaxsiy kabinetdagi interaktiv xizmatga kiritilgan ma’lumotlar asosida elektron shaklda shakllantiriladi.

Agar soliq organlari tomonidan shakllantirilgan hisobot ma’lumotlari soliq toʻlovchining (soliq agentining) hisobga olish hujjatlaridan farq qilsa, soliq toʻlovchi (soliq agenti) hisobotni 5 kun ichida, lekin uni topshirish muddatidan kechiktirmay tuzatadi va taqdim etadi.

Ushbu muddatda soliq organlari tomonidan shakllantirilgan hisobotga tuzatishlar kiritilmaganligi soliq toʻlovchining (soliq agentining) unga roziligini bildiradi. Hisobot soliq organlari tomonidan qanday shaklda tuzilgan boʻlsa, shunday taqdim etilgan hisoblanadi.

Hisobot taqdim etish tartibini ham Vazirlar Mahkamasi qoʻshimcha ravishda belgilaydi .

 

Jismoniy shaxslar uchun:

Soliq stavkalari oʻrtacha 7% ga oshirildi va quyidagi miqdorlarda belgilandi :

T/r

Soliq solish ob’yektlari

Soliq stavkalari, %

1.

Turar joylar va kvartiralar, dala hovli imoratlari (umumiy maydoni 200 kv. m gacha boʻlganlari ham kiradi), koʻp kvartirali uy bilan uzviy bogʻliq boʻlgan mashina-joy, shuningdek boshqa imoratlar, xonalar va inshootlar

0,36

2.

Shaharlarda joylashgan umumiy maydoni quyidagicha boʻlgan uylar va kvartiralar:



200 kv. m dan ortiq 500 kv. m gacha

0,48


500 kv.m dan ortiq

0,64

3.

Boshqa aholi punktlarida joylashgan, maydoni 200 kv. metrdan ortiq boʻlgan uylar va kvartiralar, dala hovli imoratlari

0,48

4.

Tadbirkorlik faoliyati uchun foydalaniladigan yoxud yuridik shaxsga yoki yakka tartibdagi tadbirkorga ijaraga beriladigan soliq solish ob’yektlari, shuningdek tadbirkorlik faoliyati va (yoki) daromadlar olish uchun moʻljallangan, yashash uchun moʻljallanmagan koʻchmas mulk ob’yektlari

1,5;

(stavka oʻzgarmadi)

 

 

Qonunchilikdagi yangiliklar. Normativ qonun hujjatlaridagi oʻzgarishlar. Qonunchilikdagi yangiliklar Qonunchilikdagi yangiliklar /oz/publish/doc/text212847_2026_yilda_mol-mulk_soligida_nimalar_uzgaradi