Юридик шахсларнинг ваколатхона ва филиалларини ҳисобга олиш бўйича давлат хизматларини кўрсатиш учун регламент тасдиқланди

Тадбиркорлик субъектлари ягона давлат реестридан маълумотлар берилганлиги учун ундириладиган йиғимлар миқдорлари ўзгарди. Юридик шахсларнинг ваколатхона ва филиалларини ташкил этиш ёки тугатиш ҳақида давлат рўйхатидан ўтказувчи органни хабардор қилиш тартиби тасдиқланди. Реклама жойининг паспортини янги шаклдагисига алмаштириш учун ариза топшириш муддати Тошкент шаҳрида 2024 йил 1 июнга қадар ва қолган ҳудудларда 2024 йил 1 июлга қадар узайтирилди. Бу ҳақда – 28.03.2024 йилдаги 165-сон ВМҚда.

Тадбиркорлик субъектлари ягона давлат реестридан маълумотлар берилганлиги учун ундириладиган аксарият йиғимларнинг миқдорлари камайтирилди. Сумма кўчирма ёки ҳужжатга боғлиқ. Уларни ЯИДХП орқали олишда йиғимлар миқдори оширилди, бироқ улар Давлат хизматлари марказига шахсан бориб тўловни амалга оширишга нисбатан арзонроқ. Энг катта йиғим БҲМнинг 20%идан ошмайди.

Тадбиркорлик субъектлари ягона давлат реестрида тадбиркорлик субъектлари тўғрисидаги ахборот йиғилган: ташкил этилган, қайта ташкил этилган, тўхтатиб турилган, фаолиятини тугатган юридик шахслар, ЯТТ ва улар билан боғлиқ бошқа маълумотлар, бундан банклар ва кредит бюроларига тааллуқли ахборот мустасно. Кўчирма шакли янгиланди. Унга кредиторлар учун керак бўлган юридик шахс тўғрисидаги ахборот  қўшилди. Хусусан: қайта рўйхатдан ўтказишга тақиқлар, қайта рўйхатдан ўтказиш тарихи, юридик шахснинг раҳбари, ваколатхоналари ва филиаллари, солиқ қарзи тўғрисида ва бошқалар.

Реклама жойининг паспортини янги шаклдаги реклама жойининг паспортига алмаштириш учун ариза топшириш муддати Тошкент шаҳрида 2024 йил 1 июнга қадар ва қолган ҳудудларда 2024 йил 1 июлга қадар узайтирилди. Агар тадбиркорда ташқи реклама бўйича тўлов ва йиғимлардан охирги 5 йил муддат учун қарздорлик мавжуд бўлса, у қарздорликни 9 ой муддатга тенг миқдорда бўлиб тўлаш шарти билан паспортни янгисига алмаштириши мумкин.

Тадбиркорлик субъектлари бўлган юридик шахсларнинг ваколатхона ва филиалларини ҳисобга олиш бўйича давлат хизматини кўрсатишнинг маъмурий регламенти тасдиқланди. Хизмат давлат хизматлари маркази томонидан кўрсатилади. Ариза топширилган пайтдан бошлаб давлат рўйхатидан ўтказишга қадар 2 соат талаб қилинади. Регламент тижорат банклари ва кредит бюролари, хорижий тижорат ташкилотлари, шунингдек, нодавлат нотижорат ташкилотларининг ваколатхона ҳамда филиалларини ҳисобга олишга татбиқ этилмайди. Шу тариқа, жараёнлар автоматлаштирилганлиги туфайли ваколатхоналар ёки филиалларни ташкил этиш ёки тугатиш ҳақида хабардор этиш соддалаштирилади.