Ўзбекистон Республикаси Вазирлар Маҳкамасининг 17.11.1993 й. 559-сон "Айрим товарлар, материаллар ва хом ашё экспорти ва импорти учун божхона тўловларининг вақтинчалик ставкаларига ўзгартиришлар киритиш тўғрисида"ги Қарори

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

17.11.1993 й.

N 559

АЙРИМ ТОВАРЛАР, МАТЕРИАЛЛАР ВА

ХОМ АШЁ ЭКСПОРТИ ВА ИМПОРТИ УЧУН

БОЖХОНА ТЎЛОВЛАРИНИНГ ВАҚТИНЧАЛИК

СТАВКАЛАРИГА ЎЗГАРТИРИШЛАР КИРИТИШ

ТЎҒРИСИДА

Ўзбекистон Республикасидан автотранспорт воситаларини ва уларга эҳтиёт қисмларни олиб чиқиб кетишни тартибга солиш, шунингдек, ички истеъмол бозорини ҳимоя қилиш мақсадида Вазирлар Маҳкамаси ҚАРОР ҚИЛАДИ:

1. Ўзбекистон Республикаси Вазирлар Маҳкамасининг 1992 йил 21 октябрдаги 485-сон қарорига 2-иловада назарда тутилган айрим товарлар, материаллар ва хом ашё экспорти ва импорти учун божхона тўловларининг вақтинчалик ставкаларига ўзгартиришлар ва қўшимчалар киритилсин (илова қилинмоқда)*.

2. Белгилаб қўйилсинки:

автотранспорт воситалари ва уларга эҳтиёт қисмлар экспорти учун олинадиган божхона тўловлари автотранспорт воситалари ва уларга эҳтиёт қисмлар юридик ва жисмоний шахслар томонидан Ўзбекистон Республикаси божхона ҳудудидан олиб ўтилаётганда белгиланган тартибда ундирилади;

республика ҳудудида ишлаб чиқарилган ҳамда эркин алмаштириладиган валютага сотиладиган автотранспорт воситалари ва уларга эҳтиёт қисмларни юридик ва жисмоний шахслар томонидан олиб чиқиб кетишда экспорт божхона тўловлари ундирилмайди;

3. Доимий яшаш учун Ўзбекистон Республикаси чегарасидан ташқарига чиқиб кетаётган шахсларга шахсий фойдаланишидаги битта автомобилни, бу автомобиль ДАН органларида ҳисобдан чиқарилганлиги тўғрисида ҳужжат ва паспортда Ўзбекистон Республикаси ҳудудидаги яшаш жойидан чиқиб кетаётганлиги ҳақида тегишли белги бўлган тақдирда, божсиз олиб чиқиб кетишга рухсат берилсин.

4. Давлат божхона қўмитаси:

сотиш, вақтинчалик чиқиш ёки транзит ўтиш мақсадида республика божхона ҳудуди орқали ўтаётган автотранспорт воситаларини қаттиқ назорат қилиш ва ҳисобга олишни таъминласин;

ўн кун муддатда ўзининг норматив ҳужжатларини мазкур қарорга мувофиқ ҳолга келтирсин.

Вазирлар Маҳкамасининг Раиси                                                 И. Каримов

*) Илова рус тилидаги матнда берилган.