Ўзбекистон Республикаси Вазирлар Маҳкамасининг 22.07.1996 й. 261-сон "Халқаро валюта фонди ва жаҳон банки гуруҳи билан ҳамкорликни ривожлантиришга оид чора-тадбирлар тўғрисида"ги Қарори

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

22.07.1996 й.

N 261

ХАЛҚАРО ВАЛЮТА ФОНДИ ВА ЖАҲОН

БАНКИ ГУРУҲИ БИЛАН ҲАМКОРЛИКНИ

РИВОЖЛАНТИРИШГА ОИД ЧОРА-ТАДБИРЛАР

ТЎҒРИСИДА

Ўзбекистон Республикасининг халқаро молия ташкилотлари билан ҳамкорлигини янада мустаҳкамлаш ва ривожлантириш, шунингдек мавжуд қўшма лойиҳаларни амалга ошириш ҳамда янгиларини тайёрлашни жадаллаштириш мақсадида Вазирлар Маҳкамаси ҚАРОР ҚИЛАДИ:

1. Ўзбекистон Республикасининг Халқаро валюта фонди ва Жаҳон банки гуруҳи билан ҳамкорлигини ривожлантириш бўйича 1-иловага мувофиқ Мувофиқлаштирувчи кенгаш (кейинги ўринларда Мувофиқлаштирувчи кенгаш) тузилсин.

Мувофиқлаштирувчи кенгаш ҳузурида 2-иловага мувофиқ ишчи гуруҳи тузилсин, унга кенгаш котибияти функцияси юклансин.

2. Мувофиқлаштирувчи кенгашга:

Халқаро валюта фонди ва Жаҳон банки гуруҳи томонидан Ўзбекистон Республикасига кўрсатиладиган молиявий ва техник ёрдамдан фойдаланишнинг устувор йўналишлари;

макроиқтисодий ривожлантириш борасида хорижий ва миллий экспертлар томонидан ишлаб чиқиладиган ҳужжатлар бўйича таклифлар ишлаб чиқиш ва Вазирлар Маҳкамасига киритиш юклансин.

3. Молиявий ва техник ҳамкорлик лойиҳаларида иштирок этадиган вазирликлар ва идораларга:

Халқаро молия ташкилотлари билан ишлаш бўйича масъул шахсларни тайинлаш;

Ўзбекистон Республикаси Ҳукумати қарорлари билан тасдиқланган амалдаги лойиҳаларни бажаришнинг бориши тўғрисида Мувофиқлаштирувчи кенгашга йилнинг ҳар чорагида ҳисоботлар тақдим этиш юклансин.

4. Мазкур қарорнинг бажарилишини назорат қилиш Бош вазир, Мувофиқлаштирувчи кенгаш раиси Ў.Т. Султонов зиммасига юклансин.

Вазирлар Маҳкамасининг Раиси                            И. Каримов