Ўзбекистон Республикаси Олий Мажлисининг 30.04.1998 й. 605-I-сон "Деҳқон хўжалиги тўғрисида"ги Ўзбекистон Республикасининг Қонунини амалга киритиш тартиби ҳақида"ги Қарори

ЎЗБЕКИСТОН РЕСПУБЛИКАСИ

ОЛИЙ МАЖЛИСИНИНГ

ҚАРОРИ

30.04.1998 й.

N 605-I

"ДЕҲҚОН ХЎЖАЛИГИ ТЎҒРИСИДА"ГИ

ЎЗБЕКИСТОН РЕСПУБЛИКАСИНИНГ

ҚОНУНИНИ АМАЛГА КИРИТИШ

ТАРТИБИ ҲАҚИДА

Ўзбекистон Республикаси Олий Мажлиси ҚАРОР ҚИЛАДИ:

1. Ўзбекистон Республикасининг "Деҳқон хўжалиги тўғрисида"ги Қонуни 1998 йил 1 июлдан амалга киритилсин. Мазкур Қонуннинг амалга киритилиши Ўзбекистон Республикаси Президентининг 1998 йил 18 мартдаги Фармони билан тасдиқланган "1998-2000 йиллардаги даврда қишлоқ хўжалигидаги иқтисодий ислоҳотларни чуқурлаштириш дастурида" назарда тутилган муддатлар ва тадбирларга мувофиқ равишда таъминлансин.

2. Ўзбекистон Республикаси Вазирлар Маҳкамаси:

ҳукумат қарорларини "Деҳқон хўжалиги тўғрисида"ги Қонунга мувофиқ ҳолга келтирсин;

амалдаги шахсий ёрдамчи хўжаликларни деҳқон хўжаликларига айлантириш тартибини тасдиқласин;

вазирликлар ва идоралар мазкур Қонунга зид бўлган ўз норматив ҳужжатларини қайта кўриб чиқишлари ва бекор қилишларини таъминласин.

3. 1998 йилнинг 1 июлидан эътиборан Ўзбекистон Республикасининг қуйидаги қонун ҳужжатлари бутунлай ёки қисман ўз кучини йўқотган деб ҳисоблансин:

Ўзбекистон Республикасининг 1992 йил 3 июлда қабул қилинган "Деҳқон хўжалиги тўғрисида"ги Қонуни (Ўзбекистон Республикаси Олий Кенгашининг Ахборотномаси, 1992 йил, N 10, 403-моддада);

Ўзбекистон Республикаси Олий Кенгашининг 1992 йил 3 июлда қабул қилинган "Деҳқон хўжалиги тўғрисида"ги Ўзбекистон Республикаси Қонунини амалга киритиш тартиби ҳақидаги Қарори (Ўзбекистон Республикаси Олий Кенгашининг Ахборотномаси, 1992 йил, N 10, 404-модда);

Ўзбекистон Республикасининг 1997 йил 30 августда қабул қилинган "Ўзбекистон Республикасининг айрим қонун ҳужжатларига ўзгартишлар ва қўшимчалар киритиш тўғрисида"ги Қонуни IV бўлими (Ўзбекистон Республикаси Олий Мажлисининг Ахборотномаси, 1997 йил, N 9, 241-модда).

Ўзбекистон Республикаси

Олий Мажлисининг Раиси                                                          Э. Халилов