Комитент воситачи орқали автомобиль импорт қилса, ҚҚС тўлашга ўтиши керакми

«Айланмадан олинадиган солиқни тўловчи корхона (комитент) воситачилик шартномасини тузди, унга кўра воситачи ҳақ эвазига комитентнинг ўз эҳтиёжлари учун импорт автомобилни сотиб олиш ва етказиб бериш бўйича ўз номидан битим тузиши керак. Импорт шартномасини комиссионер тузган, олувчи сифатида эса БЮДнинг 8-устунида комиссионернинг топшириғига кўра комитент кўрсатилган. Бундай вазиятда комитент ҚҚС тўлашга ўтиши керакми?»

Buxgalter Pro обуначисининг илтимосига биноан саволга «Норма» эксперти, «Жавоб берамиз!» хизмати мутахассиси Азизахон ТОШХЎЖАEВА ойдинлик киритди:

– Ўзбекистон божхона чегараси орқали товарларни олиб кирувчи (импорт қилувчи) юридик шахслар айланмадан олинадиган солиқни тўлай олмайдилар . Улар импорт шартномаси тузилган ёки товарлар олиб кирилган (импорт қилинган) санадан бошлаб (қайси сана олдин келишига қараб) ҚҚС ва фойда солиғини тўлашга ўтади .

Импорт қилувчилар – товарлар (ишлар, хизматлар) импорти учун норезидентлар билан импорт шартномалари тузган Ўзбекистон резидентлари бўлган юридик ёки жисмоний шахслар .

Импорт шартномасини тузган ва товарни Ўзбекистоннинг божхона чегараси орқали олиб киришни амалга оширган импорт қилувчи воситачидир. Унинг товарни комитент топшириғи бўйича импорт қилиши эса ташқи иқтисодий операцияларда муҳим аҳамиятга эга эмас.

Демак, ушбу вазиятда комитент ҚҚС тўлашга ўтмаслиги керак.