Ишларни вахта усулида ташкил этиш тўғрисида Низом қабул қилинди

Вазирлар Маҳкамаси 09.10.2020 йилдаги “Узоқ масофада жойлашган ва муҳим аҳамиятга эга бўлган объектларда қурилиш-монтаж ишларини амалга оширишнинг вахта усули тўғрисидаги низомни тасдиқлаш ҳақида” 636-сон қарорни қабул қилди. Norma.uz портали ушбу ҳужжатнинг шарҳини тайёрлади.

Қабул қилинган Низом:

• узоқ масофада жойлашган ва муҳим аҳамиятга эга бўлган объектларда қурилиш-монтаж ишларини ташкил қилиш;
• вахта усулида ишлаётган ходимларнинг дам олиш вақтида ҳаёти ва иш фаолиятини таъминлаш учун вахта шаҳарчаларини ташкил қилиш;
• ишларни вахта усулида ташкил қилишда меҳнат ва дам олиш режими, иш вақти ҳисобини юритиш;
• вахта усулидаги ишларда банд бўлган ходимларнинг меҳнатига ҳақ тўлаш, имтиёзлар ва компенсациялар;
• ишларни вахта усулида ташкил қилишда қонун ҳужжатларида назарда тутилган кафолатлар тақдим этиш тартибини белгилайди.

Бунда:

• ходимларнинг меҳнат фаолияти амалга ошириладиган ишлаб чиқариш объектлари вахта усулида ишлаш жойи ҳисобланади;
• иш жойи ўзгаргани бошқа ишга ўтказилиши деб ҳисобланмайди;
• ходимнинг вахтага жўнатилиши хизмат сафари ҳисобланмайди;
• объект жойлашган ҳудудда ишларни бажариш ва сменалараро дам олиш даврлари вахта вақти ҳисобланади;
• вахтанинг давомийлиги бир календарь ойдан ошмаслиги лозим.

Агар ходимлар ишлар вахта усулида ташкил этилган жойгача етиб олиш ва у ердан қайтиш учун 3 соатдан кўпроқ вақт сарфлайдиган бўлса ёки фавқулодда вазиятларда, ташкилотларнинг раҳбарлари бу иқтисодий нуқтаи назардан мақсадга мувофиқ деб ҳисоблашса, қонуний ҳисобланади.

Шунингдек, Низомда қуйидагилар баён этилган:

• ишларни ташкил этиш;
• имтиёзлар ва компенсациялар;
• ижтимоий-маиший таъминот;
• тиббий ёрдамни ташкил этиш.

Ҳужжат Қонун ҳужжатлари маълумотлари миллий базасида эълон қилинган ва 10.10.2020 йилдан кучга кирди.

Norma.uz материаллари асосида