Экспедитор харажатларини қоплаш бухгалтерия ҳисобида қандай акс эттирилади

15 декабря 2022 г.

Корхона авиатранспортда юк ташиш бўйича транспорт-экспедиторлик хизматларидан фойдаланди. Экспедитор хизматлар учун қопланадиган суммага ва ўз ҳақи суммасига ЭҲФ тақдим этди.

«Норма» эксперти Татьяна ЛИМАРЕВА юзага келадиган операцияларни хизматларни олувчи ва ижрочининг бухгалтерия ҳисобида қандай акс эттириш лозимлигини тушунтириб берди:

– Транспорт экспедицияси шартномаси бўйича экспедитор ҳақ эвазига ва мижоз ҳисобидан шартномада белгиланган юк ташиш билан боғлиқ хизматларни бажариш ёки бажаришни ташкил этиш мажбуриятини олади .

Қопланадиган сарф-харажатлар экспедиторда харажатларни ҳисобга олувчи ҳисобварақларда акс эттирилмайди, балки мижозда (юк жўнатувчида ёки юк олувчида) харажатлар сифатида ҳисобга олинади.

Транспорт-экспедиторлик хизматларини кўрсатиш ҚҚС ва фойда солиғи бўйича оқибатларга олиб келади.

Мисол:

Экспедитор хизматлар учун қопланадиган суммага ва ўз ҳақи суммасига ЭҲФ тақдим этди, шу жумладан:

авиахавфсизликни таъминлаш ва юкка ишлов бериш – 782 762,30 сўм ҚҚС билан;
юкларни ташишни ташкил этиш – 4 314 133,00 сўм, ҚҚС – 0%;
экспедиторга тўланадиган ҳақ – 3 753 104,70 сўм ҚҚС билан;
шартнома бўйича тўланадиган жами сумма – 8 850 000,00 сўм.

Проводкалар:

Хўжалик операциясининг мазмуни	Сумма, минг сўм	Ҳисобварақлар корреспонденцияси
Хўжалик операциясининг мазмуни	Сумма, минг сўм	дебет	кредит
Хизматларни олувчида (мижозда – юк жўнатувчида ёки юк олувчида):
Юк ташиш бўйича қопланадиган харажатлар акс эттирилди (экспедитордан ЭҲФ олинганда)	4 314,13	9410	6990
Авиация хавфсизлиги ва юкка ишлов бериш бўйича қопланадиган харажатлар акс эттирилди (экспедитордан ЭҲФ олинганда)	680,66	9410	6990
Қопланадиган харажатлар бўйича ҚҚС акс эттирилди (782,76 х 15 : 115)	102,10	4410	6990
Экспедиторнинг комиссион ҳақи бўйича харажатлар суммаси акс эттирилди (экспедитор тақдим этган ЭҲФга асосан)	3 263,57	9410	6010
Комиссион ҳақ суммасига ҳисобга олинадиган ҚҚС акс эттирилди (экспедитор тақдим этган ЭҲФга асосан) (3 753,11 х 15 : 115)	489,54	4410	6010
Экспедиторга комиссион ҳақнинг тўланиши ва харажатларни қоплаш суммаси акс эттирилди	3 753,11	6010	5110
	5 096,89	6990	5110
Экспедиторда:
Юк ташишни ташкил этиш бўйича хизматлардан олинган даромадлар акс эттирилди	3 263,57	4010	9030
Ҳисобланган ҚҚС акс эттирилди	489,54	4010	6410
Юк жўнатувчи қоплайдиган харажатлар акс эттирилди (4 314,13 + 782,76)	5 096,89	4890 (мижоз – хизматларни олувчи)	6990 (учинчи шахс)
Юк жўнатувчи томонидан харажатлар қопланди	5 096,89	5110	4890 (мижоз – хизматларни олувчи)
Комиссион ҳақ олинди	3 753,11	5110	4010 (мижоз – хизматларни олувчи)
Учинчи шахсга қарз сўндирилди	5 096,89	6990 (учинчи шахс)	5110

Яна саволларингиз бўлса, ушбу тавсияларга эътибор беринг: