Ўзини ўзи банд қилган шахслар қандай фаолият турларидан фойдалана олишмайди

Президентнинг 19.03.2025 йилдаги ПФ-50-сон Фармони билан 2026 йил 1 январдан ўзини ўзи банд қилган шахслар шуғулланиши мумкин бўлган фаолият (ишлар ва хизматлар) турларининг янгиланган рўйхати тасдиқланди. Тафсилотларни norma.uz портали келтириб ўтади.

Ҳозирги вақтда 104 бандни ўз ичига олган рўйхат январдан 72 бандга қисқартирилади.

Янгиланган рўйхатни ҳавола орқали юклаб олиш мумкин >>>

Ўзини ўзи банд қилган шахслар шуғулланиши мумкин бўлган фаолият (ишлар, хизматлар) турларининг амалдаги рўйхати Президентнинг 08.06.2020 йилдаги «Тадбиркорлик фаолияти ва ўзини ўзи банд қилишни давлат томонидан тартибга солишни соддалаштириш чора-тадбирлари тўғрисида»ги ПҚ-4742-сон қарори билан тасдиқланган.

Қайси фаолият тури рўйхатдан чиқариб ташланди

1 январдан рўйхатдан (Фармоннинг 2-иловасидан) қуйидагилар чиқарилади: чакана савдо, сартарошлик ва косметология хизматлари, фото ва видеотасвирга олиш, қандолат маҳсулотлари, салатлар ва тузланган маҳсулотлар, ичимликлар тайёрлаш, гид хизматлари, риэлторлик хизматлари, автотранспортни таъмирлаш, ёғоч ўймакорлиги, бижутерия, галантерея маҳсулотлари ишлаб чиқариш, уйда репетиторлик, тўгараклар олиб бориш, тил таржима хизматлари (ёзма, оғзаки) ва таҳрир ишлари (матн билан ишлаш хизматлари, копирайтинг, стенография) ва бошқалар.

Ушбу фаолият турлари билан шуғулланишни давом эттириш учун ўзини ўзи банд қилган шахсларга якка тартибдаги тадбиркор сифатида рўйхатдан ўтиш зарур бўлади. Ёки мақбул бўлса, ёлланма ишчи бўлиш лозим бўлади.

Қайси фаолият тури қўшилди

Янгиланган рўйхатга янги фаолият тури - маркетплейсларда товарлар ва хизматларни сотиш киритилган.

Ҳужжат 2025 йил 25 мартда кучга кирди.

Манбага қаранг.