Тўловчиларнинг қайси тоифаларига ижтимоий солиқ 6 баравар камайтирилди

Якка тартибдаги тадбиркорлар ўз ходимлари учун (cавдо мажмуалари ва бозорларда фаолиятни амалга ошираётган  ЯТТлардан ташқари) тўлаши лозим бўлган ҳар йилги ижтимоий солиқ микдори БҲМнинг 6 бараваридан БҲМнинг 1 бараваригача миқдорга камайтирилмоқда. Бу 16.06.2023 йилдаги ЎРҚ-847-сон Қонунда назарда тутилган.

Шу ҳужжат билан “Томорқа хўжалиги тўғрисида”ги Қонунга – ижтимоий солиқни ҳисоблаб чиқариш қисмида ўзгартиришлар киритилди.

Шахсий томорқа ер участкасида банд бўлган ёки мазкур майдонда:

– чорвачилик;

– иссиқхона хўжалиги;

– паррандачилик;

– қуёнчилик;

– асаларичилик;

– балиқчилик;

– боғдорчилик;

– лимончилик;

– гулчилик билан шуғулланаётган:

• шахсий томорқа ер участкасининг эгаси;
• шахсий томорқа ер участкасида банд унинг оила аъзолари;
• фуқаролар – уларга тегишли томорқа ер участкасининг майдонидан ёки улар томонидан парвариш қилинаётган уй ҳайвонлари ва паррандаларнинг сонидан қатъи назар, меҳнат стажини ҳисоблаб чиқариш учун ихтиёрий асосда ижтимоий солиқ тўлаши мумкин.

ЎРҚ-681-сон Қонуннинг илгариги таҳририда қуйидагилар меҳнат стажини ҳисоблаб чиқариш учун ихтиёрий асосда ижтимоий солиқ тўлашнинг шарти бўлган:

1) камида 0,04 гектар ер участкаси;

2) қорамол ёхуд 50 бошдан кам бўлмаган хонаки парранда.

Ҳужжат 2023 йил 17 июндан кучга кирди.

Саида ЖОНИЗОҚОВА тайёрлади