Мувофиқликни баҳолаш органларини аккредитациядан ўтказиш тартиби тўғрисида Низом (ЎзР ВМ 24.04.2019 й. 349-сон қарорига 1-илова)

Вазирлар Маҳкамасининг

2019 йил 24 апрелдаги

349-сон қарорига

1-ИЛОВА

Мувофиқликни баҳолаш органларини

аккредитациядан ўтказиш тартиби тўғрисида

НИЗОМ

1-БОБ. УМУМИЙ ҚОИДАЛАР

1. Ушбу Низом "Ўзбекистон аккредитация маркази" давлат муассасасида (кейинги ўринларда Марказ деб аталади) қонунчиликка мувофиқ аккредитациядан ўтадиган мувофиқликни баҳолаш органлари ва метрология хизматлари фаолиятини аккредитациядан ўтказиш ва даврий баҳолашни амалга ошириш тартибини белгилайди.

2. Ушбу Низомда қуйидаги асосий тушунчалар қўлланилади:

аккредитация белгиси - аккредитациядан ўтказилган мувофиқликни баҳолаш органлари ва метрология хизматларининг аккредитация мақомини кўрсатиш мақсадида улар томонидан қўлланиши учун мўлжалланган Марказ томонидан бериладиган белги;

аккредитация бўйича баҳоловчи - мувофиқликни баҳолаш органини баҳолаш учун аккредитация органи томонидан тайинланган, мазкур фаолиятни мустақил равишда ёки баҳолаш гуруҳи таркибида амалга оширадиган жисмоний шахс;

аккредитация бўйича техник эксперт - аккредитация органи томонидан тайинланган, аккредитация бўйича баҳоловчи раҳбарлиги остида ишлайдиган, баҳоланаётган аккредитация соҳасида махсус билимларга ёки кўникмаларга эга бўлган ва баҳолашни мустақил равишда амалга оширмайдиган жисмоний шахс;

аккредитация комиссияси - баҳоловчилар, жалб қилинадиган техник экспертлар, шу жумладан баҳолашда иштирок этмаган халқаро экспертлардан иборат Марказ ҳузурида ташкил этиладиган комиссия бўлиб, аккредитация ва даврий баҳолаш бўйича ишлар натижаларини кўриб чиқиш ҳамда ушбу Низомда назарда тутилган тегишли қарорларни қабул қилиш унинг асосий вазифаси ҳисобланади;

аккредитация қилинган субъект - миллий аккредитация тизимида аккредитация қилинган мувофиқликни баҳолаш органи ва метрология хизмати;

аккредитация соҳаси - фаолиятнинг муайян соҳаси бўлиб, унда аккредитация учун аккредитация объектининг ёхуд аккредитация қилинган субъектнинг ваколатлилиги тасдиқланади ёки тасдиқланган бўлади;

аккредитация тўғрисидаги гувоҳнома - аккредитация қилинган субъектнинг аккредитациянинг белгиланган соҳасидаги ишларни бажаришга ваколатлилигини тасдиқловчи ҳужжатдир;

аккредитация учун ариза берувчи (кейинги ўринларда аккредитация объекти деб аталади) - аккредитация учун ариза берган мувофиқликни баҳолаш органи ва метрология хизмати;

аккредитация - мувофиқликни баҳолаш органларининг муайян фаолият соҳасида мувофиқликни баҳолашга доир ишларни бажаришга ваколатлилигини аккредитация органи томонидан расман тасдиқлаш;

апелляция комиссияси - аккредитация органининг аккредитацияни амалга оширишга, аккредитация қилишни рад этишга, аккредитациянинг амал қилишини тўхтатиб туришга ёки тугатишга, аккредитация соҳасини кенгайтиришга ва қисқартиришга доир қарорлари бўйича апелляцияларни кўриб чиқиш ҳамда қарорлар қабул қилиш мақсадида аккредитация органи ҳузурида тузиладиган комиссия ҳисобланади;

баҳолаш гуруҳи раҳбари - зиммасига баҳолаш жараёнига раҳбарлик қилиш учун умумий масъулият юкланган ва Марказ томонидан ваколат берилган баҳоловчи;

баҳолаш - аккредитациянинг аниқ бир соҳаси учун техник жиҳатдан тартибга солишга доир норматив ҳужжатлар асосида аккредитация объекти ёки аккредитация қилинган субъект ваколатли эканини аниқлаш мақсадида Марказ томонидан амалга ошириладиган жараён;

даврий баҳолаш - аккредитация қилинган субъект фаолиятининг аккредитация даврида белгиланган талабларга мувофиқлигини аккредитация циклида қайта баҳолаш тартиб-таомили;

Миллий аккредитация тизими реестри - аккредитация қилинган субъектлар тўғрисидаги, шунингдек, аккредитация тўғрисидаги гувоҳномаларнинг жорий мақоми ҳақидаги расмий ахборот базасидир;

мувофиқликни баҳолаш органи - мувофиқликни баҳолашга оид фаолиятни амалга оширувчи юридик шахс.

2-БОБ. АККРЕДИТАЦИЯ ТАЛАБЛАРИ ВА ШАРТЛАРИ

3. Қуйидагилар аккредитациянинг умумий талаблари ва шартлари ҳисобланади:

аккредитация объектларнинг ваколати ва баҳолашга қўйилган талабларни тартибга солувчи норматив-ҳуқуқий ҳужжатларга шунингдек, техник жиҳатдан тартибга солиш соҳасидаги ҳужжатларга мажбурий риоя қилиш;

аккредитация объекти ёки аккредитация қилинган субъектларининг нормал ва самарали фаолиятини амалга ошириш учун зарур бўлган мулк ҳуқуқи ёки бошқа ашёвий ҳуқуқ асосида (шу жумладан, ижара ҳуқуқлари асосида) тааллуқли бўлган бино ва иншоотлар, техник-технологик ҳамда аппарат-дастурий воситалар мавжудлиги;

жорий этилган ва амалдаги сифат менежменти тизими мавжудлиги ҳамда аккредитация объекти ёки аккредитация қилинган субъект фаолиятида унинг талабларига риоя этиш;

малакаси аккредитация жараёнида Марказ томонидан баҳоланадиган ва аккредитациянинг ариза берилган соҳасида белгиланган тартибда малака оширган ва аттестациядан ўтган мутахассисларнинг мавжудлиги, уларнинг ўзаро алмашинувчанлигини таъминлаш;

аккредитациянинг ариза берилган соҳасига мувофиқ техник жиҳатдан тартибга солиш соҳасида норматив ҳужжатларнинг мавжудлиги;

аккредитация объектлари ва аккредитация қилинган субъектлар томонидан ушбу Низомнинг 17-бандида, шунингдек, 9, 10 ва 11-бобларида кўрсатилган тартибларга ўз вақтида риоя қилиш.

Аккредитация қилишда аккредитация соҳасидаги халқаро қоидалар, Аккредитация бўйича халқаро форум талаблари (IAF) ва Лабораториялар аккредитацияси бўйича халқаро ташкилот (ILAC) талаблари ҳисобга олинади.

4. Қуйидагилар аккредитация объектини аккредитациядан ўтказиш учун қўшимча шартлар ҳисобланади:

а) маҳсулотларни сертификатлаштириш органи органи сифатида:

аккредитация объектининг ишлаб чиқарувчилар, сотувчилар ва истеъмолчилардан мустақиллиги;

баҳоланаётган объектнинг техник жиҳатдан тартибга солиш соҳасидаги норматив ҳужжатида белгиланган мажбурий кўрсаткичларининг аксарият қисми аниқлашини таъминлайдиган, белгиланган тартибда аккредитациядан ўтказилган ўз синов лабораториясининг (маркази) мавжудлиги ва профессионал жавобгарлиги суғурта қилинганлиги (пахта маҳсулотларини сертификатлаш хизматлари учун);

баҳоланаётган объект мажбурий кўрсаткичларининг етишмаётган қисми аниқлашини таъминловчи аккредитациядан ўтказилган бошқа синов лабораториялари (марказлари) билан ҳамкорлик тўғрисидаги битимларнинг мавжудлиги;

аккредитация объектини маҳсулотнинг мувофиқлик декларацияларини рўйхатдан ўтказиш учун сертификатлаштириш органи сифатида аккредитациядан ўтказишда мазкур банднинг "а" кичик банди учинчи ва тўртинчи хатбошларида кўрсатилган шартларнинг бажарилиши талаб этилмайди;

б) юкларни ортишдан олдин ва/ёки тушириш вақтидаги инспекцияни ўтказиш бўйича инспекция орган сифатида аккредитациянинг ариза берилган соҳасида, маҳсулотнинг мувофиқлигини баҳолаш учун тегишли техника воситалари ва асбоб ускуналар ёки лабораториянинг мавжудлиги;

в) хизматлар, менежмент тизимлари, ходимларни сертификатлаш органининг баҳоланаётган тарафдан мустақиллиги;

г) синов, калибрлаш ва тиббиёт лабораториялари (марказлар), метрологик хизматлар сифатида (ўлчашларнинг ягона бирликда бўлишини таъминлашга доир норматив ҳужжатларнинг метрологик экспертизасини ўтказадиган метрология хизматлари бундан мустасно):

техник жиҳатдан тартибга солиш соҳасида норматив ҳужжатлар талабларига мувофиқ бўлган ишлаб чиқариш бинолари ва атроф-муҳит шароитларининг мавжудлиги;

аккредитациянинг ариза берилган соҳасига мувофиқ синовлар ўтказилишини ва/ёки ўлчашларнинг бажарилишини таъминлайдиган синов, ўлчаш воситалари, стандарт намуналар ва синаш асбоб-ускуналарининг мавжудлиги.

6. Аккредитациядан ўтказилган синов, калибрлаш, тиббиёт лабораториялари (марказлари) ва метрологик хизматлар, амалдаги аккредитация соҳасига мувофиқ ўзи қўллаётган синов ва ўлчов воситаларидан, стандарт намуналардан ва синаш асбоб-ускуналаридан фойдаланиш ва/ёки уларни қўллаш ҳуқуқларининг, аккредитациядан ўтишга талабгор бўлган аккредитация объектлари фойдасига берилишига йўл қўйилмайди, Ўзбекистон Республикаси Президенти ва/ёки Ўзбекистон Республикаси Вазирлар Маҳкамасининг қарорларида назарда тутилган ҳоллар бундан мустасно.

3-БОБ. АККРЕДИТАЦИЯ ЎТКАЗИШ ТАРТИБИ

7. Аккредитация объектларини аккредитациядан ўтказиш ушбу Низомга 1-иловада келтирилган схемага мувофиқ амалга оширилади.

Аккредитация объекти Марказ томонидан белгиланган шакл бўйича Марказга ушбу Низомнинг 8-бандида кўрсатилган ҳужжатлар ва маълумотларни илова қилган ҳолда, ёзма ёки электрон шаклда аккредитация ўтказиш учун ариза (кейинги ўринларда буюртма деб аталади) беради.

8. Аккредитация объектилар буюртмага қуйидаги ҳужжатларни ва маълумотларни илова қилади:

аккредитация қилиниши сўралаётган аккредитация соҳасини аниқловчи мувофиқликни баҳолаш объектлари ёки синов усуллари (методикалари) ва/ёки ўлчаш турларининг рўйхати;

сифат бўйича қўлланма ва сифат менежменти тизими тартиб-тамоил ҳужжатлари;

маҳсулот, хизматлар, менежмент тизимлари, ходимларни сертификатлаш органлари ва инспекция органи учун қўшимча равишда - ходимлар тўғрисидаги маълумотлар, сертификатлашни (инспекцияни) ўтказиш тартиби тўғрисидаги хужжат ва инспекция органи томонидан қўлланиладиган (зарур ҳолларда) техника воситалари ва асбоб ускуналар тўғрисидаги хужжат;

синов, калибирлаш ва тиббиёт лабораториялари (марказлари), метрология хизматлари учун қўшимча равишда - лаборатория, ходимлар ва улар томонидан қўлланиладиган синов, ўлчаш воситалари ҳамда синов ускунаси тўғрисидаги маълумотлар;

метрология хизматлари учун "Метрология тўғрисида"ги Ўзбекистон Республикаси Қонунининг 8-моддасига асосан ушбу метрология хизматининг ҳуқуқ ва мажбуриятлари Ўзбекистон техник жиҳатдан тартибга солиш агентлиги билан келишиб олинганлиги тўғрисидаги маълумот.

9. Аккредитация объектидан ушбу Низомнинг 8-бандида назарда тутилмаган ҳужжатлар ва маълумотлар тақдим этилишини талаб қилишга йўл қўйилмайди.

Ариза берувчи ўз ихтиёрига кўра, аккредитация объектига алоқадор қўшимча ҳужжатлар ва маълумотларни тақдим қилиши мумкин.

10. Марказ, тақдим этилган ҳужжатлар ва маълумотларни тўлиқлиги юзасидан буюртмани ўрганади. Буюртмани ўрганиш ижобий натижа берса, у рўйхатдан ўтказилади ва икки иш кунидан кечикмай аккредитация хизматларини кўрсатиш бўйича шартнома (кейинги ўринларда шартнома деб аталади) тайёрланади ва аккредитация объектига юборилади.

Ушбу Низомнинг 8-бандида назарда тутилган барча ҳужжатлар ва маълумотлар тақдим этилмаган тақдирда, Марказ бир иш кунидан кечикмай аккредитация объектига ҳужжатларни пухта ишлаб чиқиш учун қайтариш ҳақида хабар қилади.

Аккредитация органи аккредитацияни берилган ариза асосида, шунингдек, башарти аккредитацияга оид ишларни бажаришга доир шартнома тузилган бўлса, амалга оширади.

11. Аккредитация объекти томонидан тўлов тўлангач, Марказ тақдим этилган аккредитация объекти ҳужжатларини экспертизадан ўтказади. Экспертиза натижалари бўйича камчиликлар аниқланган тақдирда, уларни бартараф этиш учун Марказ жойида баҳолаш ўтказишга қадар бу ҳақда аккредитация объектини хабардор қилади. Экспертизадан ўтказиш муддати ўн беш иш кунидан ошмаслиги керак.

Аккредитация объекти аниқланган камчиликлар тўғрисида хабарни қабул қилгандан сўнг жойнинг ўзида баҳолашни ўтказиш учун шартнома имзолашни ва кейинги аккредитация жараёни ўтказишни рад этиш хуқуқига эга ва бу ҳақда Марказни ёзма хабардорқилади.

12. Тақдим этилган ҳужжатларни экспертизадан ўтказиш тугалланганидан сўнг ва аккредитация объекти жойининг ўзида баҳолашни ўтказиш учун тўлов тўлангач, Марказ уч иш куни давомида миллий ва/ёки халқаро баҳоловчилар ва техник экспертлардан иборат баҳолаш гуруҳини шакллантиради.

13. Баҳолаш гуруҳи таркиби ва баҳолаш ўтказиладиган сана аккредитация объектининг асосланган таклифларини инобатга олган ҳолда, у билан келишиб олинади.

Баҳолаш гуруҳи раҳбари ва таркиби Марказ раҳбарининг ёки у томонидан ваколат берилган шахснинг буйруғи билан тайинланади.

14. Аккредитация объектининг аккредитация талаблари ва шартларига мувофиқлигини, техник жиҳатдан тартибга солиш соҳасидаги норматив ҳужжатлар талабларига мувофиқлигини ва аккредитация объекти сўралган функцияларни бажара олиш қобилиятини баҳолаш гуруҳининг асосий вазифалари ҳисобланади.

15. Аккредитация объектини жойнинг ўзида баҳолаш муддатлари унинг фаолияти хусусиятларини, шунингдек, уларни ихтисослаштирилган (лаборатория, ташхис, метрология, методологик, ишлаб чиқариш ва технологик) баҳолаш заруратини ҳисобга олган ҳолда Марказ томонидан аниқланади. Бунда аккредитация объектини баҳолаш муддати ўн иш кунидан ошмаслиги керак.

16. Баҳолаш тасдиқланган режага мувофиқ ўтказилади. Баҳолаш режаси Марказ раҳбари ёки у томонидан ваколат берилган шахс томонидан тасдиқланади. Буйруқ ва баҳолаш режаси аккредитация объектига жойнинг ўзида баҳолаш ўтказишга қадар танишиш учун тақдим этилади.

17. Баҳолаш гуруҳи аккредитация объектининг аккредитация соҳасига киритилган ҳар бир сўралган фаолият йўналишини баҳолайди.

Аккредитация объекти жойнинг ўзида баҳолаш ўтказиш учун шарт-шароитлар, шу жумладан баҳолаш гуруҳига зарур маълумот, ёзувлар ва ҳужжатлардан (шу жумладан, ички аудит натижаларидан) фойдаланиш, биноларга кириш ҳамда ходимлар малакасини баҳолаш имкониятини яратади.

Ходимлар малакасини баҳолаш уларнинг шахсий карталарини ўрганган ҳолда сўралган соҳадаги малакаси, тайёргарлиги, маълумотини, мувофиқликни баҳолаш бўйича кўникмаларини намойиш қилишини кузатиш ва суҳбатдан ўтказиш орқали амалга оширилади.

Баҳолаш гуруҳи лабораториялар аро қиёсий синовлар натижаларини ва ўлчов воситаларини калибрлаш ҳамда таққослаш текширув натижалари, шунингдек, сўралган соҳаларда назорат синовлари ўтказилишини талаб қилишга ҳақлидир.

Таркибига аккредитация қилинган субъект кирадиган юридик шахсда сифат менежментининг сертификатланган тизимини мавжудлиги аккредитация қилинган субъект учун бу борадаги аккредитация талаблари ва шартлари бажарилганининг тасдиғи бўла олмайди.

18. Жойнинг ўзида баҳолаш ўтказиш учун шарт-шароит яратиб берилмаган ҳолатда, баҳолаш гуруҳи раҳбари Марказга тегишли рапорт тақдим этиши шарт, Марказ унинг асосида баҳолаш ишларини бир ойдан ошмайдиган муддатга тўхтатиб туриш тўғрисида қарор қабул қилади.

Аккредитация объекти кўрсатилган муддатда жойнинг ўзида баҳолаш ўтказиш учун шарт-шароит яратиб бермаса, аккредитация қилишга берилган буюртма бекор қилинади.

19. Баҳолаш якунлари бўйича баҳолаш гуруҳининг баҳолаш давомида аниқланган номувофиқликларни (улар мавжуд бўлганда) ўз ичига олган ҳисоботи (кейинги ўринларда ҳисобот деб аталади) тузилади.

Ҳисобот баҳолаш гуруҳи аъзолари, шунингдек, ўзининг алоҳида фикрини (зарурат бўлганда) ифодалашга ҳақли бўлган аккредитация объектининг ваколатли вакили томонидан имзоланади.

Ҳисобот икки нусхада тузилади, унинг бир нусхаси аккредитация объектининг ваколатли вакилига берилади.

20. Баҳолаш гуруҳи ижобий ҳисобот расмийлаштирган тақдирда (номувофиқлик мавжуд бўлмаганда), уч иш куни мобайнида ҳисоботни Аккредитация комиссиясининг тегишли қарорини қабул қилиш учун Марказга тақдим этади.

21. Баҳолаш вақтида номувофиқликлар бартараф этилмаса (шу жумладан, ҳужжатларни экспертизадан ўтказиш натижасида аниқланган номувофиқликлар), аккредитация объекти номувофиқликларни бартараф этишга доир ҳаракатлар режасини ишлаб чиқади ва Марказга тақдим этади. Бунда номувофиқликларни бартараф этиш муддати баҳолаш бўйича ҳисобот расмийлаштирилган санадан бошлаб икки ойдан ошмаслиги керак.

Аккредитация объекти асосланган сабабларни ёзма равишда Марказга тақдим этган тақдирда, номувофиқликларни бартараф этиш муддати Марказ томонидан бир маротаба бир ойдан кўп бўлмаган муддатга сурилиши мумкин.

22. Аккредитация объекти томонидан ҳаракатлар режасини бажариш тўғрисидаги маълумотлар ва номувофиқликлар бартараф этилганлигини тасдиқловчи ҳужжатлар белгиланган муддатда тақдим этилмаса, баҳолаш гуруҳи раҳбари ҳисоботни илова қилган ҳолда, аккредитация бўйича ишларни тугатиш тўғрисида Марказга рапорт тақдим этиши шарт.

23. Марказ ҳаракатлар режасини бажариш тўғрисидаги маълумот ва номувофиқликлар бартараф этилганлигини тасдиқловчи ҳужжатларни қабул қилган санадан бошлаб, беш иш куни мобайнида аккредитация объекти томонидан номувофиқликлар амалда бартараф этилганлиги ҳолатини, зарур бўлса, жойнинг ўзига борган ҳолда ўрганиш учун буйруқ билан баҳолаш гуруҳига ваколат беради.

Баҳолаш гуруҳи беш иш куни мобайнида қабул қилинган ҳаракатларни кўриб чиқишни таъминлайди. Агар тақдим этилган маълумот ва тасдиқловчи ҳужжатлар номувофиқликларни бартараф этиш учун етарли бўлмаса, баҳолаш гуруҳи қўшимча маълумот сўрашга ҳақли.

Номувофиқликларнинг амалда бартараф этилганлик ҳолатини ўрганиш муддати ҳаракатлар режасини бажариш тўғрисидаги маълумот ва номувофиқликлар бартараф этилганлигини тасдиқловчи ҳужжатлар тақдим этилган санадан бошлаб ўн иш кунидан ошмаслиги керак.

24. Баҳолаш гуруҳи, номувофиқликларнинг амалда бартараф этилганлик ҳолатини ўрганиш натижалари бўйича якуний ҳисоботни расмийлаштиради ва уч иши куни мобайнида Марказга тақдим этади.

25. Марказ, ҳисоботни қабул қилган санадан бошлаб, беш иш куни мобайнида аккредитация комиссияси мажлисида унинг кўриб чиқилишини таъминлайди. Аккредитация комиссияси таркиби Марказ директорининг буйруғи билан тасдиқланади.

26. Қуйидагилар Аккредитацияни рад этиш тўғрисида қарор қабул қилиш учун асос ҳисобланади:

аккредитациядан ўтказиш тартибида белгиланган барча зарур ҳужжатлар ва маълумотлар тақдим этилмаганда;

аккредитация объекти томонидан кўрсатилган маълумотларда нотўғри маълумот мавжудлиги;

аккредитация объектининг аккредитация натижаларига кўра, ариза берилган аккредитация соҳасидаги мувофиқликни баҳолаш ишларини бажаришга ваколатлилиги тасдиқланмаган тақдирда;

аниқланган номувофиқликларни белгиланган муддатларда бартараф этмаслик.

Аккредитацияни рад этиш тўғрисида бошқа асослар, шу жумладан мақсадга мувофиқсизлик сабаблари бўйича қарор қабул қилишга йўл қўйилмайди.

Мазкур банднинг учинчи хатбошига мувофиқ аккредитация объекти томонидан тақдим этилган ҳақиқий ҳолатлар тўғрисидаги ҳужжатлар ва маълумотлар акси исботланмагунига қадар ишончли ҳисобланади.

Марказда тақдим этилган ҳужжатлар ва маълумотларнинг ҳақиқийлигига шубҳа пайдо бўлган тақдирда, аккредитация объектидан қўшимча маълумотлар талаб этмаган ҳолда, Марказ уларнинг ишончлилигини мустақил равишда ва ўз ҳисобидан текшириш учун чоралар кўради.

27. Аккредитация комиссияси томонидан ижобий қарор қабул қилинса, Марказ ва аккредитация объекти ўртасида аккредитациядан кейинги шартнома тузилади ҳамда уч иш куни мобайнида аккредитация тўғрисида гувоҳнома берилади.

Аккредитациядан кейинги шартномада қуйидагилар акс этади:

Марказ ва аккредитация қилинган субъект ўртасидаги ўзаро муносабатлар, шу жумладан, гувоҳлик баҳолаш, мувофиқликни баҳолаш ишлари якунлангандан кейинги уларнинг натижадорлигини ўрганиш ҳамда огоҳлантиришсиз ташриф орқали баҳолаб бориш шартлари ҳамда томонларнинг ҳуқуқлари, мажбуриятлари ва жавобгарлиги;

аккредитация белгисини қўллаш шартлари ва Миллий аккредитация тизими реестри рақамидан фойдаланиш;

аккредитация қилинган субъектни даврий баҳолашни амалга ошириш шартлари.

29. Марказ ўзининг расмий веб-сайтида Миллий аккредитация тизими реестри (кейинги ўринларда реестр деб аталади), шунингдек, баҳоловчилар ва техник экспертлар реестрини юритади.

Аккредитация тўғрисидаги гувоҳнома мувофиқликни баҳолаш органларининг реестрда рўйхатдан ўтказилади.

Реестр танишиш учун очиқ ҳисобланади.

Реестрни шакллантириш ва юритиш тартиби Марказ томонидан белгиланади.

30. Аккредитация тўғрисидаги гувоҳнома бланкалари қатъий ҳисобот юритиладиган бланкалар ҳисобланади, уларни рўйхатга олиш ва сақлаш тартиби қонун ҳужжатларда белгиланган тартибда амалга оширилади.

31. Аккредитация тўғрисидаги гувоҳнома беш йил муддатга берилади.

32. Аккредитация комиссияси салбий қарор қабул қилганда, Марказ аккредитацияни рад этиш тўғрисидаги қарор қабул қилинган санадан бошлаб, уч иш куни мобайнида аккредитация қилинган субъектга ёзма шаклда хабарнома юборади.

33. Аккредитация қилинган субъект аккредитация комиссиясининг аккредитациядан ўтказишни рад этиш тўғрисидаги қарори устидан Марказ ҳузуридаги аппеляция комиссиясига ёки суд тартибида шикоят қилиш ҳуқуқига эга.

34. Қуйидаги ҳолларда аккредитация қилинган субъект такрорий аккредитацияга буюртма тақдим этиши керак:

аккредитация тўғрисидаги гувоҳноманинг амал қилиш муддати тугашидан камида уч ой олдин;

аккредитация қилинган субъектнинг ваколатини баҳолашга қўйиладиган талабларни тартибга солувчи техник жиҳатдан тартибга солиш соҳасидаги янги ёки янгидан қабул қилинган норматив ҳужжат амалга киритилган вақтдан бошлаб уч ойдан кўп бўлмаган муддатда.

35. Ушбу Низом 34-бандининг учинчи хатбошисидан мустасно ҳолда такрорий аккредитация, башарти аккредитация қилинган субъект аккредитациянинг амал қилиш муддати тугашидан камида уч ой олдин ариза берган бўлса, ушбу субъектнинг аввалги фаолияти натижалари ҳисобга олинган ҳолда мазкур Низомнинг 3-бобида белгиланган тартибда ўтказилади.

Бунда тегишли халқаро стандарт талаблари бўйича аввал баҳоланган амалдаги менежмент тизимига ва аккредитация соҳасига ўзгартиришлар киритмаганлиги юзасидан маълумотлар тақдим этилганида, такрорий аккредитациядан ўтказиш мазкур Низомнинг 8-бандида назарда тутилган ҳужжатларни экспертизадан ўтказмасдан, жойининг ўзида баҳолаш амалга оширилади.

4-БОБ. АККРЕДИТАЦИЯ СОҲАСИНИ

КЕНГАЙТИРИШ ВА ҚИСҚАРТИРИШ

36. Аккредитация соҳасини кенгайтириш ишлари аккредитация қилинган субъект аризаси бўйича ушбу Низомнинг 7-25, 32 ва 33-бандларида назарда тутилган тартибда амалга оширилади.

37. Аккредитация қилинган субъектнинг аккредитация соҳасини қисқартириш аккредитация комиссиясининг қарори билан қуйидагилар асосида амалга оширилади:

аккредитация соҳасини қисқартириш тўғрисида аккредитация қилинган субъектнинг аризаси;

аккредитация қилинган субъект фаолиятининг даврий баҳолаш натижаларига кўра.

38. Аккредитация соҳаси қисқартирилса, Марказ томонидан аккредитация қилинган субъектнинг аккредитация соҳасига тегишли ўзгартиришлар киритилади.

Аккредитация соҳасини кисқартириш учун ҳақ олинмайди.

5-БОБ. ДАВРИЙ БАҲОЛАШ

39. Даврий баҳолаш аккредитациядан кейинги шартнома асосида ушбу Низомга 2-иловада келтирилган схемага мувофиқ жойнинг ўзига бориб амалга оширилади.

Биринчи даврий баҳолаш аккредитация санасидан кейин ўн икки ойдан кечикмай ўтказилади. Кейинги даврий баҳолаш ҳар йили Марказ раҳбари томонидан тасдиқланадиган даврий баҳолаш режа-жадвалига мувофиқ даврий, бироқ аввалги даврий баҳолаш ўтказилган вақтдан бошлаб йигирма тўрт ойдан кечикмай (маҳсулотни сертификатлаш органлари учун - ўн икки ойдан кечикмай) ўтказилади.

40. Йигирма тўрт ой даврийлик муддати қуйидаги шартлар бажарилса белгиланади:

жойнинг ўзида аввалги баҳолаш ўтказилганда номувофиқликлар бўлмаган бўлса;

аккредитация қилинган субъект фаолияти бўйича шикоятлар бўлмаган бўлса;

аккредитация қилинган субъект фаолияти бўйича ўтказилган мониторинг ижобий натижалар берган бўлса.

41. Аккредитация қилинган субъект фаолияти бўйича режадан ташқари даврий баҳолаш аккредитация талаблари ва шартлари, шу жумладан аккредитация белгисидан фойдаланиш бузилганлиги тўғрисида ҳужжатлар билан тасдиқланган ёзма мурожаат Марказга тушган тақдирда ўтказилади.

42. Даврий баҳолашни ўтказиш тартиби ушбу Низомнинг 13-17, 19-бандларига мувофиқ амалга оширилади.

Даврий баҳолаш давомида Марказ мувофиқликни баҳолаш органлари ва метрология хизматлари томонидан аккредитация белгисини ва/ёки аккредитацияга матнли ҳаволалар қўлланилишининг тўғрилигини ҳам ўрганади. Мувофиқликни баҳолаш органлари ва метрология хизматлари томонидан аккредитация белгисини қўллаш қоидалари Марказ томонидан ISO/IEC 17011 халқаро стандарти талабларига мувофиқ белгиланади.

43. Баҳолаш гуруҳи уч иш куни мобайнида Марказга ўтказилган даврий баҳолаш тўғрисида ҳисобот тақдим этиши керак.

44. Марказ ўтказилган даврий баҳолаш тўғрисидаги ҳисоботни қабул қилгандан кейин беш иш куни мобайнида унинг аккредитация комиссияси мажлисида кўриб чиқилишини таъминлайди.

Аккредитация комиссияси:

аккредитация тўғрисидаги гувоҳноманинг амал қилишини тасдиқлаш;

аккредитация тўғрисидаги гувоҳноманинг амал қилишини тўхтатиб туриш;

аккредитация тўғрисидаги гувоҳноманинг амал қилишини тугатиш;

аккредитация соҳасини қисқартириш (ўтказилган охирги баҳолаш давомида аниқланган номувофиқликлар, такроран аниқланганда номувофиқликлар такрор йўл қўйилган соҳа аккредитация соҳасидан чиқарилади);

комиссия аъзоларининг катта қисми баҳолаш гуруҳи ҳисоботига қўшилмаган тақдирда, аккредитация қилинган субъект аккредитация талаблари ва шартларига мувофиқлигини хақ олмасдан қўшимча баҳолашни ўтказиш тўғрисида қарор қабул қилади.

Аккредитация комиссиясининг қарори у қабул қилингандан кейин аккредитация қилинган субъектга бир иш кунидан кечикмай етказилади.

45. Аккредитация тўғрисидаги гувоҳноманинг амал қилишини тўхтатиб туриш (тиклаш) ёки тугатиш ушбу Низомнинг 6-7-бобларида белгиланган тартибда амалга оширилади.

46. Аккредитация комиссиясининг аккредитация тўғрисидаги гувоҳноманинг амал қилишини тўхтатиб туриш ёки тугатиш тўғрисидаги қарори юзасидан Марказ ҳузуридаги аппеляция комиссиясига ёки суд тартибида шикоят қилиш мумкин.

6-БОБ. АККРЕДИТАЦИЯ ТЎҒРИСИДАГИ

ГУВОҲНОМАНИНГ АМАЛ ҚИЛИШИНИ

ТЎХТАТИБ ТУРИШ (ТИКЛАШ)

47. Аккредитация тўғрисидаги гувоҳноманинг амал қилиши қуйидаги ҳолларда тўхтатиб турилиши мумкин:

аккредитация қилинган субъект аккредитация тўғрисидаги гувоҳноманинг амал қилишини тўхтатиб туриш тўғрисида ариза билан мурожаат қилганида;

аккредитация талаблари ва шартлари бузилиши аниқланганда;

аккредитация қилинган субъект томонидан аккредитациядан кейинги шартнома қоидаларига риоя этилмаганда.

48. Аккредитация тўғрисидаги гувоҳноманинг амал қилишини тўхтатиб туриш ушбу Низом 47-бандининг учинчи ва тўртинчи хатбошиларида назарда тутилган ҳолларда Марказ томонидан аккредитация комиссияси қарорига кўра, уч ойдан ошмайдиган муддатда амалга оширилади.

Аккредитация тўғрисидаги гувоҳноманинг амал қилишини тўхтатиб туриш ушбу Низом 47-бандининг иккинчи хатбошида назарда тутилган ҳолда Марказ томонидан амалга оширилади.

Аккредитация тўғрисидаги гувоҳноманинг амал қилишини тўхтатиб туриш тўғрисидаги маълумот қарор қабул қилинган кундан бошлаб бир иш кунидан кечикмай, Марказнинг веб-сайтида жойлаштирилади ва аккредитация қилинган субъектга ёзма равишда хабар юборилади.

Аккредитация тўғрисидаги гувоҳноманинг амал қилиши аккредитация комиссиясининг қабул қилган қарори тўғрисида маълумот Марказнинг веб-сайтида жойлаштирилган санадан бошлаб тўхтатиб турилади.

Аккредитация қилинган субъект аккредитация тўғрисидаги гувоҳноманинг амал қилиши тиклангунга қадар мувофиқликни баҳолаш фаолиятини тўхтатиб туриши шарт.

49. Аккредитация қилинган субъект номувофиқликларни бартараф этиш бўйича ҳаракатлар режасини ишлаб чиқади ва Марказга тақдим этади. Бунда номувофиқликларни бартараф этиш муддати аккредитация комиссиясининг қарорига асосан Марказ томонидан белгиланган муддатдан ошмаслиги керак.

50. Аккредитация қилинган субъект томонидан ҳаракатлар режасини бажариш тўғрисидаги маълумот ва номувофиқликлар бартараф этилганлигини тасдиқловчи ҳужжатлар белгиланган муддатда тақдим этилмаса, баҳолаш гуруҳи раҳбари Марказга аккредитация тўғрисидаги гувоҳномани амал қилишини тугатиш кераклиги тўғрисида рапорт тақдим этади.

51. Номувофиқликларни бартараф этилганлиги ҳолатларини ўрганиш, ушбу Низомнинг 23 ва 24-бандларига мувофиқ амалга оширилади.

52. Марказ баҳолаш гуруҳи томонидан якуний ҳисобот тақдим этилганидан сўнг беш иш куни мобайнида тегишли қарор қабул қилиш учун аккредитация комиссиясининг мажлисида унинг кўриб чиқилишини таъминлайди.

53. Аккредитация комиссиясининг қарори у қабул қилинган кундан эътиборан уч иш кундан кечикмай Марказ томонидан аккредитация қилинган субъектга етказилади.

54. Аккредитация тўғрисидаги гувоҳноманинг амал қилишини тўхтатиб туриш ва тиклаш тўғрисидаги маълумотлар аккредитация соҳасидаги тегишли реестрга киритилиши ва Марказнинг веб-сайтида жойлаштирилиши лозим.

7-БОБ. АККРЕДИТАЦИЯ ТЎҒРИСИДАГИ

ГУВОҲНОМАНИНГ АМАЛ ҚИЛИШИНИ

ТУГАТИШ

55. Аккредитация тўғрисидаги гувоҳноманинг амал қилиши қуйидаги ҳолларда тугатилиши мумкин:

аккредитация қилинган субъект аккредитация тўғрисидаги гувоҳноманинг амал қилишини тугатиш тўғрисида ариза билан мурожаат қилса;

юридик шахс (аккредитация қилинган субъект) тугатилса;

аккредитация қилинган субъект томонидан гувоҳнома амал қилишининг тўхтатиб турилишига сабаб бўлган ҳолатлар Марказ томонидан белгиланган муддатда бартараф этилмаса;

аккредитация соҳаси бузилса;

гувоҳнома сохта ҳужжатлар ва маълумотлардан фойдаланган ҳолда олинганлиги аниқланган бўлса.

56. Аккредитация тўғрисидаги гувоҳноманинг амал қилиши аккредитация комиссиясининг қарорига кўра Марказ томонидан тугатилади.

Аккредитация тўғрисидаги гувоҳноманинг амал қилишини тугатиш тўғрисидаги маълумот қарор қабул қилинган кундан бошлаб бир иш кунидан кечикмай Марказнинг веб-сайтида жойлаштирилади ва аккредитация қилинган субъектга ёзма равишда хабар юборилади.

Аккредитация тўғрисидаги гувоҳномасинг амал қилиши аккредитация комиссиясининг қабул қилган қарори тўғрисида маълумот Марказнинг веб-сайтида жойлаштирилган санадан бошлаб тугатилади.

55-банднинг тўртинчи-олтинчи хатбошиларига мувофиқ аккредитация тўғрисидаги гувоҳноманинг амал қилиши тугутилгандан кейин аккредитация учун такрорий ариза камида олти ойдан кейин берилиши мумкин.

57. Аккредитация тўғрисидаги гувоҳноманинг амал қилишини тугатиш тўғрисидаги маълумотлар аккредитация соҳасидаги тегишли Давлат реестрларига киритилиши лозим.

8-БОБ. АККРЕДИТАЦИЯ БЕЛГИСИДАН

ФОЙДАЛАНИШ МОНИТОРИНГИНИ

АМАЛГА ОШИРИШ

58. Аккредитация белгисидан фойдаланиш мониторинги мувофиқликни баҳолаш органлари ва метрологик хизматлар томонидан аккредитация белгисидан фойдаланиш қоидаларига (аккредитацияга матнли ҳаволалар) риоя қилишнинг ҳолатини ўрганиш мақсадида аккредитациядан кейинги шартнома асосида амалга оширилади.

Мониторинг:

Марказ томонидан мувофиқликни баҳолаш органлари ва метрология хизматларидан вақти-вақти билан сўраладиган аккредитация қилинган соҳада уларнинг фаолияти тўғрисидаги ахборот;

истеъмолчиларнинг мувофиқликни баҳолаш органлари ва метрология хизматлари сифатидан қониқиши тўғрисидаги сўров натижаларини истеъмолчилар билан қайта алоқа орқали;

Марказнинг сўрови бўйича назорат органлари томонидан тақдим этиладиган маълумотларни таҳлил қилиш орқали амалга оширилади.

59. Мониторинг натижалари бўйича Марказ уч иш куни мобайнида мувофиқликни баҳолаш органи ва метрология хизматини улар томонидан тегишли чора-тадбирлар кўриш учун мониторинг натижалари тўғрисида хабардор қилади.

Бунда мониторинг натижалари бўйича Марказ томонидан мувофиқликни баҳолаш органи ва метрология хизмати органига нисбатан бирон-бир чора кўрилишига йўл қўйилмайди.

Мониторинг натижаларидан даврий баҳолаш давомида фойдаланилиши мумкин.

9-БОБ. АККРЕДИТАЦИЯ СОҲАСИДАГИ

МАРКАЗ ХИЗМАТЛАРИГА ҲАҚ

ТЎЛАШ ТАРТИБИ

60. Марказ томонидан аккредитация соҳасидаги қуйидаги хизматлар учун ҳақ ундирилади:

ҳужжатлар экспертизаси учун;

аккредитация объекти ёки аккредитация қилинган субъектни баҳолаш учун (шу жумладан, гувоҳлик баҳолаш, мувофиқликни баҳолаш ишлари якунлангандан кейинги уларнинг натижадорлигини ўрганиш);

тасдиқланган режа-жадвалга мувофиқ ўтказилган аккредитация қилинган субъектни даврий баҳолаш учун;

аккредитация соҳасини долзарблаштириш учун.

Аккредитация объектлари объект ёки аккредитация қилинган субъектлар томонидан аккредитация соҳасидаги Марказ хизматларига ҳақ тўлаш уларнинг натижаларидан қатъи назар амалга оширилади.

61. Марказ томонидан аккредитация соҳасидаги қуйидаги хизмат турлари бўйича ҳақ ундирилмайди:

ариза кўриб чиқиш;

олдин берилган (амалдаги) аккредитация тўғрисидаги гувоҳномани қайта расмийлаштириш;

аккредитация тўғрисидаги гувоҳноманинг амал қилишини тўхтатиб туриш (тиклаш) ёки тугатиш;

аккредитация соҳасини қисқартириш;

аккредитация қилинган субъект фаолиятининг режадан ташқари даврий баҳолашни ва огоҳлантиришсиз ташрифни амалга ошириш;

ушбу Низомнинг 69-банди учинчи ва тўртинчи хатбошиларида назарда тутилган материаллар долзарблаштирилганлиги учун.

62. Ушбу Низомда назарда тутилган хизматлар учун тўловлар Марказнинг сарфланган вақт ва хизмат сафарлари харажатларидан келиб чиққан ҳолда белгиланади.

Сарфланган вақтни ҳисоблаб чиқиш методикаси Марказ томонидан белгиланади ва унинг расмий веб-сайтига жойлаштирилади.

63. Мувофиқликни баҳолаш органлари ва меторология хизматлари томонидан аккредитация белгиси қўлланиши учун қонун ҳужжатларида белгиланган миқдори ҳақ ундирилади.

10-БОБ. АККРЕДИТАЦИЯ ТЎҒРИСИДАГИ

ГУВОҲНОМАНИ ҚАЙТА РАСМИЙЛАШТИРИШ

64. Аккредитация қилинган субъект қайта ташкил этилса, номи, юридик манзили ёки жойлашган жойи (почта манзили) ўзгарса, йигирма иш куни мобайнида мазкур ўзгартишлар ҳақида олдин берилган (амалдаги) аккредитация тўғрисидаги гувоҳноманинг асл нусхасини илова қилиб, уни қайта расмийлаштириш учун Марказни ёзма равишда хабардор қилиши керак.

65. Агар аккредитация қилинган субъект илгари аккредитациядан ўтказилган аккредитация қилинган субъектнинг ҳуқуқий вориси бўлмаса, ҳужжатларни кўриб чиқиш билан боғлиқ кейинги тартиб-таомиллар ушбу Низомнинг 3-бобида назарда тутилган тартибда ўтказилади.

66. Аккредитациядан ўтган маҳсулотлар, хизматлар, менежмент тизимлари, ходимларни сертификатлаш органи ва инспекция органининг номи ёки жойлашган жойи (почта манзили) ўзгарса, янги аккредитация тўғрисидаги гувоҳнома аккредитация ўтказилмай, амалдаги аккредитация муддатига расмийлаштирилади.

67. Синов, калибрлаш ва тиббий лаборатория (марказ) ёки метрология хизмати жойлашган жой ўзгарса, ушбу Низомнинг 3-бобида назарда тутилган тартибда улар такрорий аккредитациядан ўтказилади.

68. Янги аккредитация тўғрисидаги гувоҳнома Марказ томонидан уч иш куни мобайнида расмийлаштирилади.

11-БОБ. АККРЕДИТАЦИЯ ҚИЛИНГАН СУБЪЕКТ

МАТЕРИАЛЛАРИНИ ДОЛЗАРБЛАШТИРИШ

69. Аккредитация қилинган субъект материаллари қуйидаги ҳолларда долзарблаштирилади:

аккредитация қилинган субъектнинг аккредитация соҳасида кўрсатилган техник жиҳатдан тартибга солиш соҳасидаги норматив ҳужжатлар ўрнига янгиси амалга киритилса, уларга ўзгартишлар, қўшимчалар киритилса (бундан қабул қилинаётган норматив ҳужжатда маҳсулотларнинг янги турлари, синов (ўлчов) усуллари кўрсатилган ҳоллар мустасно);

сифат бўйича қўлланмага ва сифат менежменти тизими тартиб-таъмоил ҳужжатларига ўзгартиришлар киритилса;

аккредитация қилинган субъектнинг ходимлари таркиби ўзгарса.

70. Аккредитация материаллари долзарблаштирилса, аккредитация қилинган субъектлари бунинг сабабларини кўрсатган ҳолда, ўзгартиришлар киритилган ҳужжатларни, шунингдек, киритилаётган ўзгартишлар юзасидан қиёсий таҳлилни илова қилиб Марказга ариза тақдим этади.

71. Марказ ўн беш иш куни мобайнида тақдим этилган ҳужжатларни кўриб чиқади ва аввал тасдиқланган ҳужжатларга тегишли ўзгартиришлар киритади. Ушбу Низомнинг 69-банди иккинчи хатбошига мувофиқ материаллар долзарблаштирилган тақдирда, аккредитация қилинган субъектнинг аккредитация соҳаси янги таҳрирда тасдиқланади.

12-БОБ. АППЕЛЯЦИЯЛАРНИ КЎРИБ ЧИҚИШ

72. Аккредитация объекти ёки аккредитация қилинган субъект аккредитация ёки даврий баҳолаш натижалари бўйича аккредитация комиссиясининг салбий қарори чиқарилган аккредитация объекти аккредитация комиссиясининг қарори қабул қилинган санадан бошлаб ўттиз календарь куни мобайнида Марказга ёзма шаклда апелляция бериш ҳуқуқига эга.

Аккредитация объекти ёки аккредитация қилинган субъект аккредитация ёки даврий баҳолаш натижалари бўйича аккредитация комиссиясининг унга нисбатан салбий қарори чиқарилса, аккредитация комиссиясининг қарори қабул қилинган санадан бошлаб ўттиз календарь куни мобайнида Марказга ёзма шаклда апелляция бериш ҳуқуқига эга.

Апелляция комиссиясининг қарори қабул қилинган санадан бошлаб ўн календарь кундан ортиқ муддатда берилган апелляциялар кўриб чиқилмайди.

73. Апелляция комиссияси ҳар бир апелляцияни кўриб чиқиш учун заруратга кўра шакллантирилади. Апелляция комиссияси таркиби Марказ директорининг буйруғи билан тасдиқланади. Апелляция комиссияси таркибини шакиллантириш ва тасдиқлаш муддатлари апелляция олинган кундан бошлаб уч кундан ортиқ бўлмаслиги керак.

74. Апелляция комиссиясининг таркиби, баҳоловчилар, жалб қилинадиган техник экспертлар, шу жумладан халқаро экспертлар орасидан аппеляция берган аккредитация объектини ёки аккредитация қилинган субъектни баҳолашда иштирок этмаган ва аккредитация комиссияси таркибида бўлмаган Марказнинг камида уч вакилидан шакллантирилади.

75. Марказ апелляция берган аккредитация объектини ёки аккредитация қилинган субъектни ва баҳолашни ўтказган гуруҳ раҳбарини апелляция кўриб чиқиладиган сана ҳақида хабардор қилади. Апелляция берган аккредитация объекти ёки аккредитация қилинган субъект вакили ва гуруҳ раҳбари апелляцияни кўриб чиқишда иштирок этишлари мумкин.

76. Апелляция комиссияси берилган апелляцияни кўриб чиқади ва қабул қилинган қарор тўғрисида аккредитация объектига ёки аккредитация қилинган субъектга ёзма равишда маълум қилади. Аппеляцияни кўриб чиқиш муттади у берилган санадан бошлаб ўн календарь кундан ошмаслиги керак.

77. Кўриб чиқилган апелляция натижалари бўйича апелляция комиссияси қуйидаги қарорлардан бирини қабул қилади:

аккредитация комиссиясининг қарорини ўзгаришсиз қолдириш ва апелляцияни қаноатлантиришни рад этиш;

апелляцияни қаноатлантириш.

78. Аккредитация комиссиясининг қарорини ўзгаришсиз қолдириш ва апелляцияни қаноатлантиришни рад этиш тўғрисидаги қарор агар:

апелляция ушбу Низом талаблари бузилган ҳолда тақдим этилган бўлса;

апелляцияда келтирилган сабаблар тасдиқланмаса қабул қилинади.

79. Апелляцияни қаноатлантириш тўғрисидаги қарор қабул қилинса, Марказ томонидан аккредитация тўғрисидаги гувоҳномани бериш ёки аккредитация тўғрисидаги гувоҳноманинг амал қилишини тасдиқлаш хақида қарор қабул қилинади.

80. Марказ икки иш кунидан ортиқ бўлмаган муддатда қабул қилинган қарор тўғрисидаги хабарномани апелляция берган аккредитация объектига ёки аккредитация қилинган субъектга ёзма шаклда юборади.

81. Айнан бир масала бўйича апелляцияни такроран беришга йўл қўйилмайди.

82. Апелляция комиссиясининг қарори юзасидан қонун ҳужжатларида белгиланган тартибда судга шикоят қилиш мумкин.

13-БОБ. ЯКУНЛОВЧИ ҚОИДА

83. Ушбу Низом талаблари бузилишида айбдор бўлган шахслар қонун ҳужжатларига мувофиқ жавоб берадилар.

Низомга

1-ИЛОВА

Аккредитацияни ўтказиш

СХЕМАСИ

*) 3-босқич белгиланган талабларга номувофиқлик аниқланганда ва номувофиқликларни бартараф этиш учун муддат берилиши тўғрисида қарор қабул қилинганда бажарилади.

Низомга

2-ИЛОВА

Даврий баҳолашни ўтказиш

СХЕМАСИ

Қонун ҳужжатлари маълумотлари миллий базаси (www.lex.uz),

2019 йил 25 апрель