Ўзбекистон Республикасининг 03.03.2022 й. ЎРҚ-757-сон "Географик кўрсаткичлар тўғрисида"ги Қонуни (Қонунчилик палатаси томонидан 21.12.2021 й. қабул қилинган, Сенат томонидан 03.02.2022 й. маъқулланган)
ЎЗБЕКИСТОН РЕСПУБЛИКАСИНИНГ
ҚОНУНИ
03.03.2022 й.
N ЎРҚ-757
ГЕОГРАФИК КЎРСАТКИЧЛАР ТЎҒРИСИДА
Қонунчилик палатаси томонидан 2021 йил 21 декабрда қабул қилинган
Сенат томонидан 2022 йил 3 февралда маъқулланган
1-модда. Ушбу Қонуннинг мақсади
ва амал қилиш соҳаси
Ушбу Қонуннинг мақсади географик кўрсаткичларни ҳуқуқий жиҳатдан муҳофаза қилиш ва улардан фойдаланиш соҳасидаги муносабатларни тартибга солишдан иборат.
Ушбу Қонуннинг амал қилиши товар келиб чиққан жой номларини ҳуқуқий жиҳатдан муҳофаза қилиш ва улардан фойдаланиш соҳасидаги муносабатларга нисбатан татбиқ этилмайди.
2-модда. Географик кўрсаткичлар тўғрисидаги қонунчилик
Географик кўрсаткичлар тўғрисидаги қонунчилик ушбу Қонун ва бошқа қонунчилик ҳужжатларидан иборатдир.
Агар Ўзбекистон Республикасининг халқаро шартномасида Ўзбекистон Республикасининг географик кўрсаткичлар тўғрисидаги қонунчилигида назарда тутилганидан бошқача қоидалар белгиланган бўлса, халқаро шартнома қоидалари қўлланилади.
3-модда. Географик кўрсаткич тушунчаси
Товарни муайян географик объект ҳудудидан келиб чиққан товар сифатида идентификацияловчи белги географик кўрсаткич деб эътироф этилиб, унда товарнинг сифати, ном қозонганлиги ёки бошқа хусусиятлари (бундан буён матнда товарнинг хусусиятлари деб юритилади) унинг географик жиҳатдан келиб чиқишига сезиларли даражада боғлиқ бўлади. Мазкур географик объект ҳудудида товарни ишлаб чиқаришнинг товарнинг хусусиятларини шакллантиришга жиддий таъсир кўрсатадиган босқичларидан лоақал биттаси амалга оширилиши керак.
4-модда. Географик кўрсаткичларни
ҳуқуқий жиҳатдан муҳофаза қилиш
Географик кўрсаткичларни ҳуқуқий жиҳатдан муҳофаза қилиш уни ушбу Қонунда белгиланган тартибда рўйхатдан ўтказиш асосида, шунингдек Ўзбекистон Республикасининг халқаро шартномаларига мувофиқ амалга оширилади.
Чет эл географик кўрсаткичларини Ўзбекистон Республикаси ҳудудида муҳофаза қилиш фақат тегишли белги ўзи келиб чиққан мамлакатда муҳофаза қилинган тақдирдагина амалга оширилади.
5-модда. Географик кўрсаткичдан фойдаланиш ҳуқуқи
Агар географик кўрсаткични рўйхатдан ўтказган шахс муайян сифати, ном қозонганлиги ёки бошқа хусусиятлари сезиларли даражада унинг географик келиб чиқишига боғлиқ бўлган товарни ишлаб чиқараётган бўлса, мазкур шахс ушбу географик кўрсаткичдан фойдаланиш ҳуқуқини олади.
Ушбу Қонунда белгиланган тартибда рўйхатдан ўтказилган географик кўрсаткичдан фойдаланиш ҳуқуқи худди шу географик объектда жойлашган ва худди шундай хусусиятларга эга бўлган товар ишлаб чиқараётган бошқа юридик ёки жисмоний шахсга ҳам берилиши мумкин.
6-модда. Географик кўрсаткичларни ҳуқуқий жиҳатдан
муҳофаза қилиш соҳасидаги ваколатли давлат органи
Ўзбекистон Республикаси Адлия вазирлиги (бундан буён матнда Вазирлик деб юритилади) географик кўрсаткичларни ҳуқуқий жиҳатдан муҳофаза қилиш соҳасидаги ваколатли давлат органидир.
географик кўрсаткичларни ҳуқуқий жиҳатдан муҳофаза қилиш ва улардан фойдаланиш соҳасидаги ягона давлат сиёсатини шакллантириш ҳамда амалга оширишда иштирок этади;
географик кўрсаткичларни ва географик кўрсаткичдан фойдаланиш ҳуқуқини рўйхатдан ўтказишга доир талабномаларни кўриб чиқиш учун қабул қилади, улар юзасидан давлат экспертизаси ўтказилишини ташкил этади;
географик кўрсаткичларни ва географик кўрсаткичдан фойдаланиш ҳуқуқини рўйхатдан ўтказишни амалга оширади;
Географик кўрсаткичларнинг давлат реестрини (бундан буён матнда реестр деб юритилади) юритади;
географик кўрсаткичдан фойдаланиш ҳуқуқи тўғрисида гувоҳнома беради;
географик кўрсаткични рўйхатдан ўтказиш ва географик кўрсаткичлардан фойдаланиш ҳуқуқини бериш тўғрисидаги расмий маълумотларни эълон қилади;
қонунчиликка мувофиқ бошқа ваколатларни ҳам амалга оширади.
Ўзбекистон Республикаси Адлия вазирлиги ҳузуридаги "Интеллектуал мулк маркази" давлат муассасаси (бундан буён матнда Давлат муассасаси деб юритилади) географик кўрсаткичларни ва географик кўрсаткичдан фойдаланиш ҳуқуқини рўйхатдан ўтказишга доир талабномаларни кўриб чиқади ҳамда улар юзасидан давлат экспертизасини ўтказади.
РЎЙХАТДАН ЎТКАЗИШ
7-модда. Географик кўрсаткични
рўйхатдан ўтказиш шартлари
Географик кўрсаткич муайян географик объектда жойлашган ва ушбу объектнинг номидан ўзи ишлаб чиқараётган товарни белгилаш учун фойдаланаётган бир неча юридик ёки жисмоний шахснинг (алоҳида ҳолларда, агар бошқа шахслар мавжуд бўлмаса ёхуд улар талабномани беришда иштирок этиш истагини билдирмаса, битта шахснинг) талабномасига кўра рўйхатдан ўтказилиши мумкин.
Географик кўрсаткични рўйхатдан ўтказиш учун талабнома:
ушбу модданинг биринчи қисмида кўрсатилган юридик ва (ёки) жисмоний шахсларнинг манфаатларини ифодалаш учун ваколатли, бирлашма шаклида ташкил этилган нодавлат нотижорат ташкилоти (бундан буён матнда бирлашма деб юритилади) томонидан;
тегишли географик объект жойлашган ҳудуддаги маҳаллий ижро этувчи ҳокимият органи томонидан ҳам берилиши мумкин.
8-модда. Географик кўрсаткични ёки географик
кўрсаткичдан фойдаланиш ҳуқуқини рўйхатдан
ўтказиш учун талабнома бериш
Географик кўрсаткични ёки географик кўрсаткичдан фойдаланиш ҳуқуқини рўйхатдан ўтказиш учун талабнома (бундан буён матнда талабнома деб юритилади) юридик ёки жисмоний шахс (бундан буён матнда талабнома берувчи деб юритилади) томонидан бевосита ёхуд унинг патент вакили ёки ишончли вакили томонидан давлат ахборот тизимлари орқали берилади.
Талабнома берилган сана талабнома Вазирликка келиб тушган санага қараб белгиланади.
Талабнома берилганидан кейин Вазирлик талабнома ҳақидаги маълумотларни талабнома келиб тушган пайтдан эътиборан бир иш куни ичида ўз расмий веб-сайтига жойлаштиради.
9-модда. Товар келиб чиққан жой номи учун
талабномани ва рўйхатдан ўтказилган товар келиб
чиққан жой номини географик кўрсаткич этиб ўзгартириш
Талабнома берувчи товар келиб чиққан жой номи учун талабномани экспертиза натижалари бўйича қарор қабул қилингунига қадар географик кўрсаткичга доир талабнома этиб ўзгартиришга ҳақли.
Рўйхатдан ўтказилган товар келиб чиққан жой номи товар келиб чиққан жой номидан фойдаланиш ҳуқуқи тўғрисидаги гувоҳнома эгасининг (эгаларининг) аризасига кўра географик кўрсаткич этиб ўзгартирилиши мумкин.
Товар келиб чиққан жой номининг географик кўрсаткич этиб ўзгартириш билан боғлиқ ишларни юритиш товар келиб чиққан жой номидан фойдаланиш ҳуқуқи тўғрисидаги гувоҳнома эгаси (эгалари) томонидан мустақил равишда, патент вакили ёки ишончли вакил орқали амалга оширилиши мумкин.
10-модда. Патент вакиллари орқали вакиллик
Ўзбекистон Республикасидан ташқарида доимий яшайдиган жисмоний шахслар ва чет эл юридик шахслари географик кўрсаткичларни рўйхатдан ўтказишга ҳамда географик кўрсаткичдан фойдаланиш ҳуқуқи тўғрисидаги гувоҳномани беришга доир ишларни, шунингдек бу ишлар билан боғлиқ бўлган юридик аҳамиятга молик бошқа ҳаракатларни Вазирликда рўйхатдан ўтказилган патент вакиллари орқали амалга оширади.
Патент вакилининг ваколатлари ишончнома билан тасдиқланади.
Ўзбекистон Республикасида доимий яшайдиган, лекин вақтинчалик унинг ҳудудидан ташқарида бўлган жисмоний шахслар Ўзбекистон Республикаси доирасидаги ёзишмалар учун манзилни кўрсатган тақдирда, географик кўрсаткичларни рўйхатдан ўтказишга ва географик кўрсаткичдан фойдаланиш ҳуқуқи тўғрисидаги гувоҳномани беришга доир ишларни ҳамда бу ишлар билан боғлиқ бўлган юридик аҳамиятга молик бошқа ҳаракатларни патент вакилисиз олиб бориши мумкин.
11-модда. Талабномага доир талаблар
Талабнома битта географик кўрсаткичга тааллуқли бўлиши керак.
Талабномада қуйидагилар кўрсатилиши керак:
географик кўрсаткични ёки географик кўрсаткичдан фойдаланиш ҳуқуқини рўйхатдан ўтказиш тўғрисидаги ариза;
талабномада кўрсатилган белги ёки, агар реестрда рўйхатдан ўтказилган бўлса, географик кўрсаткич;
қайси товар тури учун географик кўрсаткични ёки географик кўрсаткичдан фойдаланиш ҳуқуқини рўйхатдан ўтказиш сўралаётган бўлса, ўша товар турининг номи;
географик объектнинг чегараларидаги товар ишлаб чиқариладиган жой;
товарнинг хусусиятлари у ишлаб чиқарилаётган жойга боғлиқ эканлигига тааллуқли маълумотлар;
товарнинг географик жиҳатдан келиб чиқишига, мазкур географик объект учун хос бўлган табиий шароитларга ва (ёки) инсон омилларига сезиларли даражада боғлиқ бўлган товар хусусиятларининг тавсифи, шу жумладан товарни ишлаб чиқариш учун фойдаланиладиган бошланғич материалнинг тавсифи, товарнинг физик, кимёвий, микробиологик, органолептик ёки бадиий хусусиятлари;
агар Ўзбекистон Республикаси Вазирлар Маҳкамаси томонидан тасдиқланадиган географик кўрсаткичларни рўйхатдан ўтказиш бўйича давлат хизмати кўрсатишга доир маъмурий регламентда (бундан буён матнда маъмурий регламент деб юритилади) назарда тутилган бўлса, талабномада баён этилган қоидаларга ва товарнинг аниқ хусусиятларига риоя этилганлигини тасдиқловчи ваколатли инспекция органларининг ҳамда лабораторияларнинг номи ва жойлашган ери (почта манзиллари).
Талабномага қуйидагилар илова қилиниши керак:
талабнома берганлик учун патент божи тўланганлигини тасдиқловчи ҳужжат;
талабнома патент вакили ёки ишончли вакил орқали берилган тақдирда талабнома берувчининг ишончномаси;
агар талабнома берувчи Ўзбекистон Республикаси ҳудудида товарлар ишлаб чиқараётган шахс бўлса, талабнома берувчининг мазкур географик объектда жойлашганлигини ва хусусиятлари ушбу географик объект билан сезиларли даражада боғлиқ бўлган товар ишлаб чиқараётганлигини тасдиқловчи ҳужжатлар;
агар талабнома берувчи Ўзбекистон Республикаси ҳудудидан ташқарида товарлар ишлаб чиқараётган шахс бўлса, географик объект жойлашган мамлакатда талабномада баён этилган географик кўрсаткичдан фойдаланиш ҳуқуқини тасдиқловчи ҳужжат.
Географик кўрсаткични рўйхатдан ўтказиш учун талабнома бирлашма томонидан берилган тақдирда, ушбу бирлашмага кирувчи шахслар тегишли хусусиятларга эга бўлган товарни ишлаб чиқараётганлигини тасдиқловчи ҳужжатлар илова қилинади.
Илгари рўйхатдан ўтказилган географик кўрсаткичдан фойдаланиш ҳуқуқини рўйхатдан ўтказишга доир талабномага талабнома берувчи реестрда кўрсатилган хусусиятларга эга бўлган товар ишлаб чиқараётганлигини тасдиқловчи ҳужжатлар илова қилинади.
Талабномани расмийлаштириш учун зарур бўлган ҳужжатларга доир талаблар маъмурий регламентда белгиланади.
12-модда. Географик кўрсаткичлар сифатида
рўйхатдан ўтказилмайдиган белгилар
Қуйидаги белгилар географик кўрсаткич сифатида рўйхатдан ўтказилмайди:
товар қайси географик объект чегарасида дастлаб ишлаб чиқарилган ёки фуқаролик муомаласига киритилган ва ишлаб чиқарилиш жойи билан боғлиқ бўлмаган муайян турдаги товарнинг белгиси сифатида Ўзбекистон Республикасида умумий истеъмолга киритилган бўлса, ўша географик объектнинг белгиси;
айни бир турдаги товарга нисбатан географик кўрсаткич ёки товар келиб чиққан жой номи сифатида рўйхатдан ўтказилган белги;
нисбатан илгарироқ устуворликка эга бўлган товар белгиси ёки хизмат кўрсатиш белгиси билан бир хил ёхуд унга айнан ўхшаш бўлган белги, агар бундай географик кўрсаткичдан фойдаланиш товар ёки уни тайёрловчи хусусида истеъмолчини чалғитса;
ўсимлик навининг ёки ҳайвон зотининг номини ифодаловчи белги, агар бундай географик кўрсаткичдан фойдаланиш товар хусусида истеъмолчини чалғитса;
товар ёки уни тайёрловчи хусусида истеъмолчини чалғитадиган белги;
ушбу Қонуннинг 11-моддасида назарда тутилган талабларга мувофиқ бўлмаган товарга нисбатан географик кўрсаткич сифатида рўйхатдан ўтказиш учун талабнома берилган белги.
13-модда. Талабноманинг давлат экспертизаси
Талабноманинг давлат экспертизаси Давлат муассасаси томонидан амалга оширилади ҳамда у расмий экспертизани ва талабномада ифодаланган белгининг экспертизасини ўз ичига олади.
Талабнома берувчи талабнома давлат экспертизасидан ўтказилиши даврида бу талабнома юзасидан қарор қабул қилингунига қадар ўз ташаббуси билан талабнома материалларини тузатишга, аниқлаштиришга ёки уларни талабномани моҳиятан ўзгартирмайдиган материаллар билан тўлдиришга ҳақли.
Давлат экспертизасини ўтказиш жараёнида қўшимча материалларсиз экспертиза ўтказиш мумкин бўлмаса, Давлат муассасаси талабнома берувчидан бундай материалларни сўраб олишга ҳақли.
Давлат экспертизасининг сўровига кўра қўшимча материаллар сўров талабнома берувчига жўнатилган санадан эътиборан уч ой ичида тақдим этилиши керак. Талабнома берувчининг илтимосига кўра мазкур муддат кўпи билан олти ойга узайтирилиши мумкин. Агар талабнома берувчи сўралаётган қўшимча материалларни ёки уларни тақдим этиш муддатини узайтириш тўғрисидаги илтимосномани кўрсатилган муддатда тақдим этмаса, талабнома чақириб олинган деб ҳисобланади.
Талабнома берувчи томонидан ўтказиб юборилган муддатлар талабнома берувчининг мазкур муддатлар тугаганидан икки ойдан кечиктирмай берган илтимосномасига биноан Давлат муассасаси томонидан тикланиши мумкин.
Талабномани давлат экспертизасидан ўтказиш тартиби маъмурий регламентда белгиланади.
14-модда. Талабноманинг расмий экспертизаси
Талабноманинг расмий экспертизаси талабнома Вазирликка берилган санадан эътиборан ўн беш кунлик муддатда амалга оширилади.
Расмий экспертиза чоғида талабноманинг мазмуни, зарур ҳужжатларнинг мавжудлиги, шунингдек уларнинг белгиланган талабларга мувофиқлиги текширилади.
Талабнома берувчига расмий экспертиза натижаларига кўра Давлат муассасасининг талабномани кўриб чиқиш учун қабул қилиш тўғрисидаги ёхуд уни рад этиш ҳақидаги қарори маълум қилинади.
15-модда. Талабномада ифодаланган белгининг экспертизаси
Талабномада ифодаланган белгининг экспертизаси талабнома кўриб чиқиш учун қабул қилинганлиги тўғрисидаги қарорга мувофиқ, мазкур қарор қабул қилинганидан кейин бир ой ичида Давлат муассасаси томонидан ўтказилади.
Талабномада ифодаланган белгининг экспертизаси чоғида талабномада ифодаланган белгининг ушбу Қонун 4, 5, 7 ва 11-моддалари қоидаларига мувофиқлиги текширилади.
Талабномада ифодаланган белгининг экспертизаси натижаларига кўра Давлат муассасасининг географик кўрсаткични ёки географик кўрсаткичдан фойдаланиш ҳуқуқини рўйхатдан ўтказиш ҳақидаги ёхуд уни рўйхатдан ўтказишни рад этиш тўғрисидаги қарори қабул қилинади, талабнома берувчи бу ҳақда хабардор қилинади.
16-модда. Давлат экспертизаси натижалари устидан шикоят бериш
Талабнома берувчи давлат экспертизаси натижалари устидан Ўзбекистон Республикаси Адлия вазирлигининг Апелляция кенгашига (бундан буён матнда Апелляция кенгаши деб юритилади) қарор қабул қилинган санадан эътиборан уч ой ичида шикоят беришга ҳақли.
Давлат экспертизаси натижалари устидан Апелляция кенгашига шикоят бериш тартиби Вазирлик томонидан белгиланади.
Талабнома берувчи Апелляция кенгашининг қарори устидан қарор қабул қилинган санадан эътиборан олти ой ичида судга шикоят беришга ҳақли.
17-модда. Талабномадан воз кечиш ёки уни чақириб олиш
Талабнома берувчи талабномадан уни кўриб чиқишнинг исталган босқичида, лекин географик кўрсаткични ёки географик кўрсаткичдан фойдаланиш ҳуқуқини рўйхатдан ўтказиш санасидан кечиктирмай воз кечиши ёки уни чақириб олиши мумкин.
18-модда. Географик кўрсаткични ёки географик
кўрсаткичдан фойдаланиш ҳуқуқини рўйхатдан ўтказиш
Давлат экспертизаси натижалари асосида Вазирлик географик кўрсаткични ёки географик кўрсаткичдан фойдаланиш ҳуқуқини реестрда рўйхатдан ўтказишни патент божи тўланганлиги ҳақидаги ҳужжат олинган санадан эътиборан уч иш куни ичида амалга оширади.
Реестрга киритиладиган маълумотлар таркиби маъмурий регламентда белгиланади.
19-модда. Географик кўрсаткич ёки географик кўрсаткичдан
фойдаланиш ҳуқуқи рўйхатдан ўтказилганлиги
тўғрисидаги маълумотларни эълон қилиш
Географик кўрсаткич ёки географик кўрсаткичдан фойдаланиш ҳуқуқи рўйхатдан ўтказилганлиги тўғрисидаги маълумотлар, шу жумладан товарнинг хусусиятлари тўғрисидаги ахборот Вазирликнинг ўз расмий веб-сайтига ҳам жойлаштириладиган расмий ахборотномасида эълон қилинади. Эълон қилинадиган маълумотларнинг таркиби Вазирлик томонидан белгиланади.
20-модда. Географик кўрсаткичдан фойдаланиш
ҳуқуқи тўғрисидаги гувоҳнома
Географик кўрсаткичдан фойдаланиш ҳуқуқи тўғрисидаги гувоҳнома (бундан буён матнда гувоҳнома деб юритилади) унинг эгасининг географик кўрсаткичдан гувоҳномада кўрсатилган товар турига нисбатан фойдаланиш ҳуқуқини тасдиқлайди.
Гувоҳнома географик кўрсаткичдан фойдаланиш ҳуқуқи реестрда рўйхатдан ўтказилганидан кейин уч иш куни ичида Вазирлик томонидан берилади. Гувоҳноманинг шакли ва унда кўрсатиладиган маълумотлар таркиби Вазирлик томонидан белгиланади.
21-модда. Географик кўрсаткични муҳофаза қилиш
муддати ҳамда гувоҳноманинг амал қилиш муддати
Географик кўрсаткич ушбу Қонун талабларига жавоб берадиган товарни ишлаб чиқариш имконияти мавжуд бўлган бутун вақт давомида муҳофаза қилинади.
Гувоҳнома талабнома берилган санадан эътиборан ўн йил давомида амал қилади.
22-модда. Гувоҳноманинг амал қилиш
муддатини узайтириш
Гувоҳноманинг амал қилиш муддати гувоҳнома амал қилаётган охирги йил ичида унинг эгаси томонидан берилган аризага кўра ҳар сафар ўн йилга узайтирилиши мумкин.
Ушбу модданинг биринчи қисмида кўрсатилган аризага қуйидагилар илова қилиниши керак:
патент божи тўланганлигини тасдиқловчи ҳужжат;
патент вакили ёки ишончли вакил орқали ариза берилган тақдирда талабнома берувчининг ишончномаси;
географик кўрсаткичдан фойдаланиш ҳуқуқига эга бўлган шахс мазкур географик объектда эканлигини ва реестрда кўрсатилган хусусиятларга эга бўлган товарни ишлаб чиқараётганлигини тасдиқловчи ҳужжат.
Гувоҳноманинг амал қилиш муддатини узайтириш ҳақидаги ёзув ариза берилган санадан эътиборан уч кун ичида реестрга киритилади.
Ариза беришнинг ушбу модда биринчи қисмида кўрсатилган муддати гувоҳноманинг амал қилиш муддати тугаганидан кейин олти ой ичида гувоҳнома эгаси берган илтимосномага кўра узайтирилади.
23-модда. Гувоҳномага ўзгартишлар киритиш
Гувоҳноманинг эгаси Вазирликни ўз номи, фамилияси, исми ёки отасининг исми ўзгарганлиги тўғрисида, географик кўрсаткичга тааллуқли бошқа ўзгартишлар тўғрисида хабардор қилади.
Ушбу ўзгартишлар тўғрисидаги ёзув Вазирлик томонидан гувоҳномага ва реестрга киритилади.
24-модда. Гувоҳномани ҳақиқий эмас деб топиш
Агар гувоҳнома ушбу Қонунда белгиланган талабларни бузган ҳолда берилган бўлса, ушбу гувоҳнома унинг бутун амал қилиш муддати ичида ҳақиқий эмас деб топилиши мумкин.
Гувоҳнома Апелляция кенгашининг ёки суднинг қарори асосида ҳақиқий эмас деб топилади.
25-модда. Географик кўрсаткичнинг рўйхатдан
ўтказилганлигини бекор қилиш, гувоҳноманинг
амал қилишини тугатиш
Географик кўрсаткичнинг рўйхатдан ўтказилганлиги:
товарни реестрда кўрсатилган хусусиятлар билан ишлаб чиқаришнинг имконияти йўқлиги муносабати билан;
чет эл юридик ёки жисмоний шахслари товар келиб чиққан мамлакатда мазкур географик кўрсаткичга доир ҳуқуқини йўқотганлиги муносабати билан Апелляция кенгашининг қарори асосида бекор қилинади.
Гувоҳноманинг амал қилиши унинг амал қилиш муддати ўтганлиги муносабати билан тугатилади.
Гувоҳноманинг амал қилиши:
гувоҳнома эгасининг Вазирликка берган аризаси;
гувоҳнома эгаси географик кўрсаткичдан фойдаланиш ҳуқуқини йўқотганлиги муносабати билан Апелляция кенгашининг қарори;
суднинг қарори асосида муддатидан илгари тугатилади.
26-модда. Географик кўрсаткичдан фойдаланиш
Гувоҳноманинг эгасига географик кўрсаткичдан қонунга зид бўлмаган ҳар қандай усулда фойдаланиш, шу жумладан:
ишлаб чиқарилаётган, сотувга тақдим этилаётган, сотилаётган, кўргазмаларда ва ярмаркаларда намойиш этилаётган ёки бошқача тарзда Ўзбекистон Республикаси ҳудудида фуқаролик муомаласига киритилаётган ёхуд шу мақсадда сақланаётган ёки ташилаётган ёхуд Ўзбекистон Республикаси ҳудудига олиб кирилаётган товарларда, товарларнинг ёрлиқларида, ўровларида;
товарларни фуқаролик муомаласига киритиш билан боғлиқ бўлган бланкаларда, ҳисобварақларда, бошқа ҳужжатларда ва босма нашрларда;
товарларни сотиш тўғрисидаги таклифларда, шунингдек эълонларда, пешлавҳаларда ва рекламада фойдаланиш ҳуқуқи тегишлидир.
Бирлашма томонидан географик кўрсаткич рўйхатдан ўтказилган тақдирда, бундай географик кўрсаткичдан фойдаланиш ҳуқуқи, башарти ушбу географик кўрсаткичдан реестрда кўрсатилган хусусиятларга эга бўлган товарга нисбатан фойдаланилса, ушбу бирлашма аъзоси бўлган ҳар бир шахсга берилади.
Лицензия шартномаси асосида географик кўрсаткичдан фойдаланиш ҳуқуқини бошқа шахсга беришга, бундай ҳуқуқдан ўзганинг фойдасига воз кечиш тўғрисида битимлар тузишга ва географик кўрсаткичдан фойдаланиш ҳуқуқини беришга йўл қўйилмайди.
Қуйидагилар географик кўрсаткичдан қонунга хилоф равишда фойдаланиш деб эътироф этилади:
рўйхатдан ўтказилган географик кўрсаткичдан фойдаланиш ҳуқуқига эга бўлмаган шахслар томонидан ундан фойдаланиш, ҳатто бунда, агар товар ишлаб чиқарилган ҳақиқий жой кўрсатилган бўлса ёки географик кўрсаткичдан уни таржима қилган ҳолда ёхуд "хилдаги", "турдаги", "ўхшатиб ишланган" деган ва бошқа шунга ўхшаш сўзлар билан қўшиб фойдаланилаётган бўлса ҳам;
рўйхатдан ўтказилган географик кўрсаткичдан ундан фойдаланиш ҳуқуқига эга бўлган шахсларнинг реестрда кўрсатилган хусусиятларга эга бўлмаган ёхуд географик объект чегарасидан ташқарида ишлаб чиқарилган товарга нисбатан фойдаланиши;
рўйхатдан ўтказилган географик кўрсаткичга ўхшаш белгидан товар ишлаб чиқарилган жой ёки товарнинг хусусиятлари хусусида истеъмолчиларни чалғитадиган тарзда ҳар қандай товарлар учун фойдаланиш.
Географик кўрсаткичдан қонунга хилоф равишда фойдаланилган ёки у билан адаштириб юбориш даражасида ўхшаш бўлган белгилардан фойдаланилган товарлар, товарларнинг ёрлиқлари, ўровлари контрафакт ҳисобланади.
27-модда. Огоҳлантирувчи тамғалаш
Гувоҳнома эгаси географик кўрсаткич билан бир қаторда товарда ёки унинг ўровида қўлланилган белги Ўзбекистон Республикасида рўйхатдан ўтказилган географик кўрсаткич эканлигини билдирадиган, айлана ичига олинган, лотин алифбосидаги "GI" ҳарфлари тарзидаги огоҳлантирувчи тамға қўйиши мумкин.
Географик кўрсаткичларни ёки географик кўрсаткичдан фойдаланиш ҳуқуқини рўйхатдан ўтказиш билан боғлиқ бўлган юридик аҳамиятга молик ҳаракатларни амалга оширганлик учун патент божлари олинади.
Патент божларининг миқдорлари ва уларни тўлаш муддатлари, уларни тўлашдан озод қилиш, тўловларнинг миқдорини камайтириш ёки уларни қайтариб бериш асослари, шунингдек патент божларидан фойдаланиш тартиби қонунчиликда белгиланади.
29-модда. Товарларнинг белгиланган
талабларга мувофиқлигини таъминлаш
Гувоҳномаларнинг эгалари товарларнинг реестрда кўрсатилган хусусиятларга мувофиқлигини таъминлаши шарт.
Ўзбекистон Республикаси Адлия вазирлиги ва (ёки) тегишли вазирлик, идора ёки бошқа ташкилот қайси товарларга нисбатан географик кўрсаткич рўйхатдан ўтказилган бўлса, ўша товарларнинг хусусиятлари сақлаб қолиниши устидан назоратни амалга оширади, шу жумладан мазкур географик объект учун хос бўлган шароитлар йўқолганлиги тўғрисида ҳамда географик кўрсаткич ўзига нисбатан рўйхатдан ўтказилган, реестрда кўрсатилган хусусиятларга эга бўлган товарларни ишлаб чиқариш мумкин эмаслиги ҳақида хулоса беради.
Бирлашмалар географик кўрсаткич билан тамғаланган ва ушбу бирлашмага кирувчи шахслар томонидан ишлаб чиқариладиган товарларнинг хусусиятларига риоя этилиши устидан назоратни амалга оширишга ҳақли. Давлат бундай бирлашмаларни қонунчиликда белгиланган тартибда қўллаб-қувватлаши мумкин.
Географик кўрсаткич билан тамғаланган товарларни сертификатлаштириш қонунчиликда белгиланган тартибда амалга оширилади.
30-модда. Географик кўрсаткични бошқа
давлатларда рўйхатдан ўтказиш
Ўзбекистон Республикасининг юридик ва жисмоний шахслари географик кўрсаткични белгиланган тартибда бошқа давлатларда рўйхатдан ўтказишга ҳақли.
31-модда. Чет эл юридик ва жисмоний
шахсларининг ҳуқуқлари
Чет эл юридик ва жисмоний шахслари ушбу Қонунда назарда тутилган ҳуқуқлардан Ўзбекистон Республикасининг юридик ва жисмоний шахслари билан тенг равишда ёки ўзаролик принципи асосида фойдаланади.
Географик кўрсаткичларни ҳуқуқий жиҳатдан муҳофаза қилиш ва улардан фойдаланиш билан боғлиқ низолар қонунчиликда белгиланган тартибда ҳал этилади.
33-модда. Географик кўрсаткичлар тўғрисидаги
қонунчиликни бузганлик учун жавобгарлик
Географик кўрсаткичлар тўғрисидаги қонунчиликни бузганликда айбдор шахслар белгиланган тартибда жавобгар бўлади.
34-модда. Ўзбекистон Республикасининг айрим
қонун ҳужжатларига ўзгартиш ва қўшимчалар киритиш
1. Ўзбекистон Республикасининг 2001 йил 30 августда қабул қилинган "Товар белгилари, хизмат кўрсатиш белгилари ва товар келиб чиққан жой номлари тўғрисида"ги 267-II-сонли Қонунига (Ўзбекистон Республикаси Олий Мажлисининг Ахборотномаси, 2001 йил, N 9-10, 178-модда; 2002 йил, N 9, 165-модда; Ўзбекистон Республикаси Олий Мажлиси палаталарининг Ахборотномаси, 2007 йил, N 9, 418-модда; 2011 йил, N 12/2, 364-модда; 2012 йил, N 12, 336-модда; 2017 йил, N 4, 137-модда, N 9, 510-модда; 2020 йил, N 1, 1-модда, N 10, 593-модда; 2021 йил, 4-сонга илова, N 8, 801-модда) қуйидаги ўзгартиш ва қўшимча киритилсин:
1) 10-модда биринчи қисми 13-бандининг тўртинчи хатбошиси қуйидаги таҳрирда баён этилсин:
"қонунга мувофиқ муҳофаза қилинадиган географик кўрсаткичлар ва товар келиб чиққан жой номлари бўлган белгилар билан адаштириб юбориш даражасида бир хил ёки уларга айнан ўхшаш бўлган белгилар, бу белгилар ҳар қандай товарларга нисбатан шундай кўрсаткичдан ёки номдан фойдаланиш ҳуқуқига эга бўлган шахс номига рўйхатдан ўтказилаётган товар белгисига муҳофаза қилинмайдиган қисм сифатида киритилган ҳоллар бундан мустасно".
2) 11-модда қуйидаги мазмундаги бешинчи хатбоши билан тўлдирилсин:
"шу турдаги товарга нисбатан товар келиб чиққан жой номи ёки географик кўрсаткич сифатида рўйхатдан ўтказилган белгилар".
2. Ўзбекистон Республикасининг 2004 йил 3 декабрда қабул қилинган "Ўзбекистон Республикаси Савдо-саноат палатаси тўғрисида"ги 712-II-сонли Қонуни (Ўзбекистон Республикасининг 2018 йил 9 июлда қабул қилинган ЎРҚ-483-сонли Қонуни таҳририда) (Ўзбекистон Республикаси Олий Мажлиси палаталарининг Ахборотномаси, 2018 йил, N 7, 428-модда; 2019 йил, N 11, 791-модда, N 12, 891-модда; 2020 йил, N 1, 1-модда; 2021 йил, 4-сонга илова) 21-моддаси биринчи қисмининг ўн иккинчи хатбошиси "хизмат кўрсатиш белгиларини" деган сўзлардан кейин "географик кўрсаткичларни" деган сўзлар билан тўлдирилсин.
3. Ўзбекистон Республикасининг 2006 йил 18 сентябрда қабул қилинган "Фирма номлари тўғрисида"ги ЎРҚ-51-сонли Қонуни (Ўзбекистон Республикаси Олий Мажлиси палаталарининг Ахборотномаси, 2006 йил, N 9, 493-модда; 2021 йил, 4-сонга илова) 4-моддаси иккинчи қисмининг бешинчи хатбошиси қуйидаги таҳрирда баён этилсин:
"белгиланган тартибда қонунчилик билан муҳофаза қилинадиган географик кўрсаткичлар ва товар келиб чиққан жойнинг номлари билан, шундай кўрсаткичдан ёки номдан фойдаланиш ҳуқуқига эга бўлган шахс номига рўйхатдан ўтказиш ҳоллари бундан мустасно, адаштириб юбориш даражасида бир хил ёки уларга ўхшаш бўлган белгилар ҳам кўрсатилмаслиги керак".
4. Ўзбекистон Республикасининг 2020 йил 6 январда қабул қилинган "Давлат божи тўғрисида"ги ЎРҚ-600-сонли Қонунига (Ўзбекистон Республикаси Олий Мажлиси палаталарининг Ахборотномаси, 2020 йил, N 1, 1-модда, N 3, 201-модда, N 5, 298-модда, N 10, 593-модда, N 12, 691-модда; 2021 йил, N 1, 13-модда, 4-сонга илова, N 7, 661-модда, N 8, 800, 803-моддалар, N 10, 968-модда) қуйидаги қўшимча ва ўзгартишлар киритилсин:
1) 3-модда иккинчи қисмининг учинчи хатбошиси "хизмат кўрсатиш белгиларига" деган сўзлардан кейин "географик кўрсаткичларга" деган сўзлар билан тўлдирилсин;
2) 5-модданинг 9-банди "хизмат кўрсатиш белгилари" деган сўзлардан кейин "географик кўрсаткичлар" деган сўзлар билан тўлдирилсин;
3) 23-модданинг:
биринчи қисми "хизмат кўрсатиш белгилари" деган сўзлардан кейин "географик кўрсаткичлар" деган сўзлар билан тўлдирилсин;
еттинчи қисми "хизмат кўрсатиш белгиларини" деган сўзлардан кейин "географик кўрсаткичларни" деган сўзлар билан тўлдирилсин;
4) илованинг:
а) 12-банди:
номи "хизмат кўрсатиш белгилари" деган сўзлардан кейин "географик кўрсаткичлар" деган сўзлар билан тўлдирилсин;
"а" кичик бандининг ўн бешинчи хатбошиси қуйидаги таҳрирда баён этилсин:
"географик кўрсаткични ва товар келиб чиққан жой номини, улардан фойдаланиш ҳуқуқини рўйхатдан ўтказишга талабнома, илгари рўйхатдан ўтказилган географик кўрсаткичдан ва товар келиб чиққан жой номидан фойдаланиш ҳуқуқини бериш учун талабнома бериш ва давлат экспертизасидан ўтказиш";
иккинчи хатбошиси қуйидаги таҳрирда баён этилсин:
"товар белгисини, географик кўрсаткични ва товар келиб чиққан жой номини рўйхатдан ўтказиш, географик кўрсаткичдан ва товар келиб чиққан жой номидан фойдаланиш ҳуқуқини бериш, товар белгисини Ўзбекистон Республикасида ҳаммага маълум товар белгилари рўйхатига киритиш";
бешинчи хатбошисидаги "товар келиб чиққан жой номлари" деган сўзлар "географик кўрсаткичлар ва товар келиб чиққан жой номлари" деган сўзлар билан алмаштирилсин;
"в" кичик бандининг ўн олтинчи хатбошисидаги "товар келиб чиққан жой номидан" деган сўзлар "географик кўрсаткичдан ва товар келиб чиққан жой номидан" деган сўзлар билан алмаштирилсин;
иккинчи хатбошисидаги "товар келиб чиққан жой номини" деган сўзлар "географик кўрсаткични ҳамда товар келиб чиққан жой номини" деган сўзлар билан алмаштирилсин;
бешинчи хатбошисидаги "товар келиб чиққан жой номидан" деган сўзлар "географик кўрсаткичдан ҳамда товар келиб чиққан жой номидан" деган сўзлар билан алмаштирилсин;
иккинчи хатбошисидаги "товар келиб чиққан жой номига" деган сўзлар "географик кўрсаткичга ва товар келиб чиққан жой номларига" деган сўзлар билан алмаштирилсин;
бешинчи хатбошисидаги "товар келиб чиққан жой номига" деган сўзлар "географик кўрсаткичга ва товар келиб чиққан жой номларига" деган сўзлар билан алмаштирилсин;
олтинчи хатбошисидаги "товар келиб чиққан жой номига" деган сўзлар "географик кўрсаткичга ва товар келиб чиққан жой номларига" деган сўзлар билан алмаштирилсин;
тўққизинчи хатбошисидаги "товар келиб чиққан жой номига" деган сўзлар "географик кўрсаткичга ва товар келиб чиққан жой номларига" деган сўзлар билан алмаштирилсин;
б) 14-банди:
бешинчи хатбошисидаги "товар келиб чиққан жой номидан" деган сўзлар "географик кўрсаткичдан ва товар келиб чиққан жой номидан" деган сўзлар билан алмаштирилсин;
саккизинчи хатбошисидаги "товарларнинг келиб чиқиш жойи номидан" деган сўзлар "географик кўрсаткичдан ва товар келиб чиққан жой номидан" деган сўзлар билан алмаштирилсин;
"г" кичик бандининг биринчи хатбошисидаги "товар келиб чиққан жой номини" деган сўзлар "географик кўрсаткични ва товар келиб чиққан жой номини" деган сўзлар билан алмаштирилсин.
35-модда. Ушбу Қонуннинг ижросини, етказилишини,
моҳияти ва аҳамияти тушунтирилишини таъминлаш
Ўзбекистон Республикаси Адлия вазирлиги ва манфаатдор ташкилотлар ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.
Қонунга мувофиқлаштириш
Ўзбекистон Республикаси Вазирлар Маҳкамаси:
ҳукумат қарорларини ушбу Қонунга мувофиқлаштирсин;
давлат бошқаруви органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин.
37-модда. Ушбу Қонуннинг кучга кириши
Ушбу Қонун расмий эълон қилинган кундан эътиборан кучга киради.
Ўзбекистон Республикасининг Президенти Ш. Мирзиёев
Қонун ҳужжатлари маълумотлари миллий базаси (www.lex.uz),
2022 йил 4 март
"Халқ сўзи", 2022 йил 4 март
Бизнинг Facebook
Телеграм канали @uz_buxgalter
