Янги йил мукофотини хатоларсиз ҳисоблаш ва тўлашга доир йўриқнома

Янги йил – ходимларни мукофот билан хурсанд қилишнинг энг яхши сабаби. Бундай тўловларга қандай солиқлар солиниши ва улар бухгалтерия ҳисобида қандай акс эттирилиши ҳақида «Норма» эксперти Татьяна ЛИМАРЕВА гапириб берди. 

 

 

Иш берувчи ходимларни моддий рағбатлантиришга: мукофотлар, устамалар, бонуслар ва ҳоказо тўлашга ҳақли.

Қонун ҳужжатларида тижорат ташкилотлари ходимларини мукофотлаш бўйича бирор бир чекловлар мавжуд эмас. Компаниялар фаолиятнинг хусусиятлари, молиявий ҳолати ва ривожланиш мақсадларини ҳисобга олган ҳолда, ходимларни қизиқтириш тизимини мустақил равишда ишлаб чиқиш ва қўллашга ҳақли.

Ходимларни мукофотлаш тартибини – мукофотлар тури, уларни ҳисоб-китоб қилиш ва тўлаш тартибини – жамоа ёки меҳнат шартномаси ёхуд корхонанинг ички ҳужжатида белгиланг. Мукофотлаш тизимини мукофотлаш тўғрисидаги низомда батафсил ёзинг.

 

 

Мукофотлар учун бухгалтерия ўтказмалари

Бухгалтерия ҳисобида ҳисобланган ва тўланган мукофот суммасини бундай тарзда акс эттиринг:

 

Сана	Хўжалик операциясининг мазмуни	Счётлар корреспонденцияси
		Дебет	Кредит
28.12.2023 й.	Раҳбарнинг 28.12.2022 йилдаги буйруғи асосида Янги йилга мукофот ҳисобланди	9430	6710
28.12.2023 й.	Бўнак ва мукофот суммасининг бир қисми (раҳбарнинг буйруғига асосан) корхона кассасига нақд шаклда олинди (банк чекига асосан)	5010	5110
28.12.2023 й.	Бўнак ва мукофот суммасининг қолган қисми ҳисобрақамидан транзит ҳисобрақамига ўтказилди	5530	5110
28.12.2023 й.	Бўнак ва мукофотни ходимларнинг пластик картасига ўтказиш акс эттирилди	4210 (6710)	5530
28.12.2023 й.	Бўнак ва мукофот нақд пул маблағлари билан берилди	4210 (6710)	5010
28.12.2023 й.	Мукофот суммасига ЖШДС ҳисобланди	6710	6410
	Мукофот суммасига ЖШДС тўланди	6410	5110

 

Мукофотларга қандай солиқлар солинади

Меҳнатга ҳақ тўлаш тарзидаги даромадларга  бошқалар қаторида рағбатлантириш хусусиятига эга тўловлар  ҳам киради:

• йиллик иш якунлари бўйича пул мукофоти;
• мукофотлаш тўғрисидаги ички низомда назарда тутилган рағбатлантириш хусусиятига эга тўловлар;
• кўп йил ишлаганлик учун пул мукофоти ва тўловлар;
• рационализаторлик таклифи учун тўлов;
• меҳнат натижалари билан боғлиқ бўлмаган бир йўла бериладиган мукофотлар.

Байрамга мукофот меҳнатга ҳақ тўлаш тарзидаги даромад сифатида ходимларнинг жами даромадига киритилади ҳамда ЖШДС ва ижтимоий солиқ солинади .

Мукофотлар учун ЖШДС бўйича имтиёзлар назарда тутилмаган .

ЖШДСни солиқ тўловчига даромадларни тўлаш билан бир вақтда, лекин солиқ ҳисоботини тақдим этиш муддатларидан кечиктирмай бюджетга тўланг .

Иш ҳақи бўйича ойнинг биринчи ярми учун бўнак олиш учун ҳужжатлар тақдим этилганда солиқни тўлаш керак эмас.

Ижтимоий солиқни тўлаш ҳар ойда, солиқ ҳисоботини тақдим этиш муддатларидан кечиктирмай амалга оширилади .

 

Ҳисоботда мукофот қандай акс эттирилади

ЖШДС ва ижтимоий солиқ бўйича солиқ ҳисоботида ҳисобланган ва тўланган мукофот суммаси Ҳисоб-китобнинг 011-сатрида ва Ҳисоб-китобга 5-иловада – ходимлар кесимида ҳисобланган бошқа меҳнатга ҳақ тўлаш тарзидаги даромадлар билан бирга акс эттирилади.