Меҳнат таътилининг давомийлигини қандай ҳисоблаб чиқариш керак

Тавсияда:

– таътилнинг календарь кунларини қандай ҳисоблаш керак;
– агар ходим таътил вақтида касал бўлиб қолса.

Таътилнинг календарь кунларини қандай ҳисоблаш керак

Ҳар йилги асосий ва қўшимча меҳнат таътилларининг давомийлиги календарь кунларда ҳисоблаб чиқарилади . Бу таътилнинг давомийлиги ҳисоб-китобига дам олиш кунлари, шу жумладан якшанба кунлари ҳам киритилишини англатади. Таътил даврига тўғри келадиган ишланмайдиган байрам кунлари эса унинг давомийлигини аниқлашда ҳисобга олинмайди.

Қуйидагилар иш куни ҳисобланмайдиган байрам кунлари ҳисобланади :

• 1 январь – Янги йил;
• 8 март – Хотин-қизлар куни;
• 21 март – Наврўз байрами;
• 9 май – Хотира ва қадрлаш куни;
• 1 сентябрь – Мустақиллик куни;
• 1 октябрь – Ўқитувчи ва мураббийлар куни;
• 8 декабрь – Ўзбекистон Республикаси Конституцияси куни;
• Рўза ҳайит (Ийд ал-Фитр) диний байрамининг биринчи куни;
• Қурбон ҳайит (Ийд ал-Адҳа) диний байрамининг биринчи куни.

Шу тариқа, агар ушбу байрам кунларидан қайси бири таътил даврига тўғри келса, у таътил давомийлиги ҳисоб-китобига киритилмайди.

Агар таътилдан чиқиш дам олиш кунига тўғри келса, ходим ундан кейин келадиган иш кунида ишга тушиши керак.

Меҳнат кодексининг 218-моддасида назарда тутилган ҳар йилги асосий узайтирилган таътиллар ҳам календарь кунларда ҳисоблаб чиқарилади (масалан, I ва II гуруҳ ногиронлиги бўлган ходимлар ва 18 ёшгача бўлган шахсларга – 30 календарь кун).

Ҳатто ходим иш йилида тўлиқ ишлаб бермаган бўлса ҳам, тўлиқ давомийликдаги ва тўлиқ ҳақ тўлаш билан ҳар йилги меҳнат таътилини олади. Аммо, баъзан таътилнинг давомийлигини ишлаб берилган вақтга мутаносиб равишда ҳисоблаб чиқариш зарурати юзага келади. Бу ҳақда батафсил «Қачон ва қандай қилиб таътилнинг давомийлиги ишлаб берилган вақтга мутаносиб равишда ҳисоблаб чиқарилади» тавсиясига қаранг.

Агар ходим қўшимча таътиллар олишга ҳақли бўлса, кадрлар бўйича мутахассис уларнинг умумий давомийлигини тўғри ҳисоблаб чиқариши керак. Бу ерда ўзига хос жиҳат мавжуд. Батафсил «Асосий ва қўшимча меҳнат таътиллари қандай жамланади» тавсиясига қаранг.

Агар ходим таътил вақтида касал бўлиб қолса

Ходим вақтинча меҳнатга қобилиятсизлик даврида таътилни узайтириш ёки уни кўчириш ҳуқуқига эга .

Масалан, ходимга 2023 йил 1 августдан 21 августгача 21 календарь кун таътил тақдим этилган. 10 августдан бошлаб ходим касал бўлиб қолди ва 14 августга қадар вақтинча меҳнатга лаёқатсизлик варақасини тақдим этди. Яъни вақтинча меҳнатга қобилиятсизлик даври 5 кунни ташкил этди.

Касал бўлган кунларини айирган ҳолда, ходим томонидан 1 августдан 21 августгача қанча таътил кунларидан фойдаланилганлигини ҳисоблаб чиқариш лозим. Бу 16 календарь кун. Ходимда 5 кун таътилнинг фойдаланилмаган қисми қолди. Шундан сўнг иккита вариантнинг эҳтимоли мавжуд:

• таътил ушбу 5 кунга узайтирилади;
• ходим билан иш берувчининг келишувига кўра 5 кунлик қолдиқ бошқа муддатга кўчирилади .

Биринчи вариант: таътил 22 августдан 26 августга қадар узайтирилади. Чунки ишга чиқиш куни якшанба, 27 августга тўғри келади, ходим душанба, 28 августда ишга тушади.

Қуйидаги мазмундаги буйруқ чиқарилади:

«Бухгалтер Ш.Б. Нормуродованинг меҳнат таътили даврида содир бўлган вақтинча меҳнатга лаёқатсизлиги муносабати билан, унинг аризасига кўра, меҳнат таътили 2023 йил 26 августга қадар узайтирилсин.

Ишга чиқиш – 2023 йил 28 августда.

Асос: сер-43, 222222-сон вақтинча меҳнатга лаёқатсизлик варақаси;

Ш.Б. Нормуродованинг 2023 йил 22 августдаги аризаси.»

Иккинчи вариант: касаллик муносабати билан таътилнинг фойдаланилмаган қисми бошқа вақтга кўчирилади. Ходим вақтинча меҳнатга лаёқатсизлик варақаси ва меҳнат таътилининг фойдаланилмаган кунларини бошқа вақтга кўчириш илтимоси билан ариза тақдим этган ҳолда 2023 йил 22 августдан ишга тушади. Бу ҳолда қуйидаги мазмундаги буйруқ чиқарилади:

«Бухгалтер Ш.Б. Нормуродова 2023 йил 22 августда навбатдаги меҳнат таътилидан қайтган ва ишга тушган деб ҳисоблансин.

Ходимнинг меҳнат таътили даврида содир бўлган вақтинча меҳнатга лаёқатсизлиги муносабати билан, таътилнинг фойдаланилмаган 5 календарь куни қўшимча аризага биноан бошқа вақтда тақдим этилсин.

Асос: сер-43, 222222-сон вақтинча меҳнатга лаёқатсизлик варақаси;

Ш.Б. Нормуродованинг 2023 йил 22 августдаги аризаси.»