Чет эллик ходим солиқ органларида қандай ҳисобга қўйилади

Материалда:

– Ўзбекистонда хорижий фуқаро учун ЖШШИР қандай расмийлаштирилади;

– чет эллик фуқаро солиқ тўловчи сифатида ҳисобда туриш-турмаслигини қандай текшириш мумкин.

2021 йил 1 июндан жисмоний шахсларни солиқ органларида ҳисобга олиш ЖШШИР бўйича амалга оширилади 23.03.2021 й. ПФ-6191-сон 5-б..

Шунинг учун, хорижликни ишга қабул қиларкансиз, унда ЖШШИР бор-йўқлигини текширинг. Агар ЖШШИР бўлмаса, сиз ходимга ҳисобланган даромадларни ЖШДС ва ижтимоий солиқ бўйича ҳисоботда акс эттира олмайсиз. Агар хорижий мутахассис Ўзбекистон компанияси билан биринчи марта шартнома тузаётган бўлса, унда ЖШШИР йўқ. Агар у аввал Ўзбекистонда ЖШШИР олган бўлса, Солиқ қўмитаси маълумотлар базасида у ҳақида маълумотлар аллақачон мавжуд.

Ўзбекистонда хорижлик учун ЖШШИР қандай расмийлаштирилади

Ўзбекистонда илгари ЖШШИР олмаган хорижий фуқаро Ички ишлар вазирлигининг миграция ва фуқароликни расмийлаштириш бўлимига (яъни «паспорт столи»га) ва яқин орадаги Давлат хизматлари марказига (ДХМ) ташриф буюриши керак. Агар мутахассис масофадан туриб ишлаётган бўлса ва яқин келажакда Ўзбекистонга келишни режалаштирмаган бўлса, у ДХМда ЖШШИР олиш учун нотариал тасдиқланган ишончнома юбориш орқали Ўзбекистондаги вакил орқали ҳаракат қилиши мумкин. Бундай вакил иш берувчининг ходими бўлиши мумкин.

ЖШШИР олиш учун чет эллик фуқарога қуйидагилар керак бўлади:

• паспорт – ДХМга шахсан ташриф буюрганда;
• паспорт сканери (электрон шаклда) ва ишончнома – агар хорижий фуқаро учун ЖШШИРни вакил олаётган бўлса.

ДХМ хорижий фуқарога берилган ЖШШИР кўрсатилган маълумотнома беради.

Адлия вазирлиги ҳузуридаги Персоналлаштириш агентлиги базасидаги маълумотлар автоматик равишда солиқ органлари маълумотлар базасида акс эттирилади. Шунинг учун ЖШШИР берилгандан сўнг хорижий фуқаро ҳақидаги маълумотлар автоматик равишда солиқ органлари маълумотлар базасида пайдо бўлади.

Хорижий фуқаро илгари Ўзбекистонда ЖШШИР олган, аммо my.soliq.uz сайтида «Ўз СТИР ёки ЖШШИРингизни билиб олинг» интерактив хизмати ёрдамида текширилганда, «Персоналлаштириш агентлиги маълумотлар базасида бу ЖШШИР бўйича маълумотлар мавжуд эмас» хабари чиқадиган ҳолатлар учрайди.

Бундай ҳолда, хорижий фуқаро ёки унинг вакили техник муаммони бартараф этишда ёрдам бериш илтимоси билан ИИВнинг миграция ва фуқароликни расмийлаштириш бўлимига ва яқин орадаги ДХМга мурожаат қилиши керак. Бунда шахсини тасдиқловчи ҳужжатни тақдим этиш керак.

Хорижлик солиқ тўловчи сифатида ҳисобда туриш-турмаслигини қандай текшириш мумкин

Бунинг учун:

• my.soliq.uz сайтига киринг;
• «Жисмоний шахслар учун» тоифасида «Хизматлар»га ўтинг;
• «Ўз СТИР ёки ЖШШИРингизни билиб олинг» вкладкасини босинг. Шундан сўнг сиз хизматни бевосита олиш учун автоматик равишда my3.soliq.uz сайтига ўтасиз;

• «Ўз СТИР ёки ЖШШИРингизни текшириш» бўлимида «Жисмоний шахс» сатрида «Хорижий фуқаро»ни танланг;
• хорижий фуқаронинг ЖШШИРини киритинг;
• расмдаги кодни киритинг;
• «Текшириш»ни босинг.

Тизим дарҳол Персоналлаштириш агентлиги маълумотлар базасига сўров юборади.

Агар экранда хорижий фуқаронинг Ф.И.Ш. пайдо бўлса, демак, унинг ЖШШИРи Персоналлаштириш агентлиги маълумотлар базасида тасдиқланган. Шунга кўра, у ҳақидаги маълумот Солиқ қўмитаси маълумотлар базасида ҳам шакллантирилган – хорижий фуқаро солиқ органларида ҳисобга олинган. Энди сиз солиқ ҳисоботида хорижлик ходимнинг иш ҳақи тўғрисидаги маълумотларни кўрсата оласиз.