2026 йилдан бошлаб ПҚ-87-сон қарор бўйича ипакчилик хўжаликлари қандай солиқ имтиёзларидан фойдаланиши мумкин

Президентнинг 6.03.2026 йилдаги ПҚ-87-сон қарорида ипакчилик кластерлари ва корхоналари учун янги солиқ имтиёзлари назарда тутилган.

Тафсилотлар – buxgalter.uz шарҳида:

2026 йил 1 январдан 2029 йил 1 январгача:

• ипакчилик кластерларининг ипак маҳсулотларини ишлаб чиқариш ва сақлаш учун фойдаланиладиган бино ва иншоотлари мол-мулк солиғидан, улар эгаллаган ер участкалари эса ер солиғидан озод этилади;
• ипакчилик фаолиятидан (сертификат асосида «4А» ва ундан юқори сифатли хом ипак, ипак жуни, ипак калаваси, ипак матоси ва тайёр ипак маҳсулотларидан) оладиган даромади жорий ҳисобот (солиқ) даври якуни бўйича жами даромадининг 70 фоизидан кам бўлмаган пиллачилик корхоналари учун фойда солиғи ставкаси 2 фоиз этиб белгиланади;
• шойи газлама ва тайёр ипак маҳсулотлари ишлаб чиқаришни йўлга қўйган корхоналар учун ижтимоий солиқ ставкаси 1 фоиз этиб белгиланади. Мазкур имтиёз қуйидагиларга эга бўлган корхоналарга берилади:

– ходимларнинг ўртача ойлик иш ҳақи энг кам ойлик иш ҳақининг камида 2 баравари миқдорида;

– мазкур маҳсулотни ишлаб чиқаришдан олинган даромад жорий ҳисобот (солиқ) даври охирида жами даромаднинг камида 60 фоизини ташкил этади;

• пилла қурти уруғини тайёрлаш ва пилла етиштириш бўйича мавсумий ишларда банд бўлган аҳоли даромадлари ЖШДС ва ижтимоий солиқ солиш объекти сифатида қаралмайди.

Солиқ кодексига тегишли ўзгартириш ва қўшимчалар киритилгандан кейин ушбу имтиёзларни қўллаш янада батафсил белгиланади.

Buxgalter.uz тавсия қилади

 

• Қишлоқ хўжалиги корхоналари қандай солиқларни тўлайди (барча солиқлар, уларни тўлаш шартлари ва муҳим нюанслари);
• Ижтимоий солиқ бўйича имтиёзни қандай қўллаш мумкин (хизмат кўрсатиш соҳаси мисолида).