Тошкент метрополитени ҳудудида кимлар бизнес билан шуғулланиши мумкин (ПҚ-191-сон)

«Тошкент метрополитени фаолияти самарадорлигини ошириш бўйича қўшимча чора-тадбирлар тўғрисида»ги Президент қарори 20 майдан кучга кирди. Собиқ давлат унитар корхонасининг молиявий барқарорлигини мустаҳкамлаш мақсадида хусусий тадбиркорларга метрога кириш жойлари ва станцияларда ижара асосида «хавфсиз фаолият турлари»ни амалга оширишга рухсат берилади...

15.05.2026 йилдаги ПҚ-191-сон қарорни buxgalter.uz сайтида кўриб чиқамиз:

Ҳужжатда қуйидагилар назарда тутилган (ПҚ-191-сон қарорнинг 11-бандига қаранг):

• метрополитенда реклама ва медиа фаолиятини ривожлантириш, платформа ва вагонларга рақамли экранлар ўрнатиш учун реклама майдонларини аукцион асосида хусусий медиа компанияларга ижарага бериш;
• йўловчиларнинг хавфсизлигини таъминлаш шарти билан метро бекатларига кириш жойларида ва бекатлар ўртасидаги ўтиш жойларида (аукцион савдолари орқали) савдо аппаратлари ва кичик кўчма савдо объектларини жойлаштириш;

• метро бекатлари олдида автотураргоҳлар ташкил этиш орқали «Park & Ride» тизимини йўлга қўйиш. Тизим қуйидагиларни назарда тутади:

– автотураргоҳлардан фойдаланувчиларга чипталарга чегирмалар тақдим этиш;

– метро чиптаси орқали тўхташ жойи учун тўлов;

• хусусий тадбиркорларга туннеллар ва метро бекатларида хавфсиз фаолият турлари билан шуғулланишга рухсат бериш (кимошди савдоси орқали ижара асосида);
• метрополитенга тегишли бўш турган бино ва хоналарни коворкинг марказлари ва кичик офислар сифатида фойдаланиш учун хусусий тадбиркорларга (аукцион орқали) ижарага бериш.

Бундан ташқари, Транспорт вазирлигига Иқтисодиёт ва молия вазирлиги, «Тошкент метрополитени» АЖ ва Тошкент шаҳар ҳокимлиги билан биргаликда 2027 йил 1 январдан бошлаб метрополитенда йўл ҳақини тўлашнинг янги тизимини жорий этиш тартибини ишлаб чиқиш топширилди, унда қуйидагилар назарда тутилган:

1) масофага қараб ҳақ тўлаш;

2) аҳолининг айрим тоифаларига имтиёзлар бериш;

3) кунлик, ҳафталик ва ойлик абонементлар тизимини жорий этиш.

Buxgalter.uz тавсия этади

 

• Давлат кўчмас мулкини қандай ижарага олиш мумкин;
• Кўчмас мулк ижара шартномаси солиқ органларида қандай ҳисобга қўйилади.