Сизга апрель ойида қуйидагилар керак бўлиши мумкин:
2021 йил 21 апрел куни Президент томонидан тадбиркорликни қўллаб-қувватлашга қаратилган ПҚ-5087-сон қарор имзоланди. Унинг қабул қилиниши билан нима ўзгариши ҳақида buxgalter.uz шарҳида ўқинг:
1. 2021 йил 1 майдан бошлаб:
- Чет элдан хорижий валютадаги тушум тушиши кечиктирилишига йўл қўйган экспорт қилувчилар ва "эркин муомалага чиқариш" божхона режимида товарларни республикага олиб кириш ва расмийлаштиришни, ишларни бажариш ёки хизматлар кўрсатишни ўз вақтида таъминламаган импорт қилувчилар учун қонунчиликда белгиланган жарима миқдорлари 2 бараварга камайтирилади.
- 2021 йил 1 май ҳолатига шаклланган ташқи савдо операциялари бўйича муддати ўтган дебитор қарздорлик учун жарималар қўллаш тўхтатилади. Дебитор қарздорлик вужудга келиш муддатлари 2021 йил 1 майдан бошлаб янгидан ҳисобланади.
- Якка тартибдаги тадбиркорлар Тадбиркорлик фаолиятини қўллаб-қувватлаш давлат жамғармасининг компенсация ва кафилликларидан фойдаланиш ҳуқуқига эга бўлишди.
- МБ асосий ставкасининг 1,75 бараваридан ошмаган миқдордаги фоиз ставкаси билан кичик тадбиркорлик субъектларига миллий валютада бериладиган кредитлар бўйича фоиз харажатларини қоплаш учун компенсация, унинг белгиланган миқдорларини сақлаб қолган ҳолда, тақдим этилади.
- Ижтимоий ҳимоя “ягона реестри" ахборот тизимида рўйхатга олинган фуқаролар тадбиркорлик ташаббусларини амалга ошириш учун кредит миқдорининг 75%игача (бироқ БҲМнинг 150 бараваридан ортиқ бўлмаган миқдорда) тижорат банклари кредитлари бўйича кафиллик олишлари мумкин.
- Тадбиркорлик субъектларига банк кредитлари бўйича компенсация ва кафилликлар кредит шартномалари сонидан қатъи назар берилади. Бунда, компенсациялар тақдим этилаётган кредитларнинг умумий суммаси 10 млрд сўмдан, кафилликларнинг умумий суммаси эса - 8 млрд сўмдан, бироқ умумий кредит суммасининг 50%идан ошмаслиги лозим.
- халқ депутатлари туман (шаҳар) Кенгашларига олис ва чекка ҳудудларда жойлашган ер участкасидан доимий фойдаланиш ҳуқуқини аукционга қўйишда уларнинг бошланғич нархини 50%гача камайтириш ваколатига эга бўлишди.
2. 2021 йил 1 июндан бошлаб:
- Саноат ва хизмат кўрсатиш объектларини барпо этиш учун инвесторлар "E-IJRO AUKSION" савдо майдончаси орқали унумдорлиги паст, фойдаланишда бўлмаган қишлоқ хўжалиги ерларини олишлари мумкин.
- 3 йилдан ортиқ вақтдан буён фаолият кўрсатаётган ҳамда ҳисобланган солиқларни муддатида тўлаб келган, лекин молиявий аҳволига кўра солиқ қарзини тўлаш имкониятига эга бўлмаётган солиқ тўловчиларга солиқларни бўлиб-бўлиб тўлаш тақдим этилади.
Шунингдек, 3 йилдан ортиқ вақтдан буён товарларни импорт қилиш билан шуғулланаётган, божхона тўловлари бўйича мажбуриятларини бажариб келган, лекин молиявий аҳволига кўра тўловларни белгиланган муддатда тўлаш имкониятига эга бўлмаётган ТИФ иштирокчиларига божхона тўловларини бўлиб-бўлиб тўлаш ҳуқуқи берилади.
Бунда, гаровсиз бўлиб-бўлиб тўланадиган солиқ ёки тўловлар суммаси тадбиркорлик субъекти томонидан охирги 3 йил давомида тўланган солиқ ёки божхона тўловлари суммасининг 50%идан ошмаслиги лозим.
3. 2021 йил 1 октябрдан бошлаб ижро ишини юритиш доирасида қарздордан ундирилган пул суммалари ижро ҳужжатлари бўйича барча талабларни қаноатлантириш учун етарли бўлмаган тақдирда, бюджетга тўловлар бўйича талаблар, кредиторларнинг қарздор мол-мулки билан таъминланмаган талаблари, шу жумладан қарздорнинг мажбуриятлари бажарилишининг таъминоти сифатида турган мол-мулкни реализация қилишдан тушган сумма етарли бўлмаганлиги туфайли қаноатлантирилмаган талаблари бир навбатда (тўртинчи навбатда) қаноатлантирилади.
4. Андижон, Наманган, Фарғона, Самарқанд шаҳарлари, Ургут ва Ғиждувон туманларида замонавий савдо ва саноат ҳудудларини ташкил этиш, уларда савдо-ишлаб чиқариш объектларини қуриш ва сотиш учун инфратузилма мавжуд бўлган (камида 20 гектар майдондан) ер участкаларини тадбиркорлик субъектларига аукцион орқали тўловни бўлиб-бўлиб тўлаш шарти билан тақдим этиш бошланади.
Савдо ва саноат ҳудудларини ташкил этишнинг асосий шарти - биноларнинг биринчи қаватида савдо ва хизмат кўрсатиш объектлари, юқори қаватларида ишлаб чиқариш объектларини жойлаштириш.
5. 2021-2022 йиллар давомида 2-3 қаватли бино қурилиши билан камида 500 та маҳалла фуқаро йиғинлари ташкил этилади. Бу ерда тадбиркорлик субъектларига кичик ишлаб чиқариш, савдо ва маиший хизмат кўрсатиш объектлари, ишсиз хотин-қизлар ва ёшларни касб-ҳунарга ўқитиш марказларини ташкил қилиш учун текин фойдаланиш асосида 30 йилга 2 ва 3-қаватлари майдонлари тақдим этилади.
Шунингдек, ҳужжат тегишли идораларга кўрсатмаларни ўз ичига олган:
1) жисмоний ва юридик шахсларга "YERELEKTRON" АТга ер участкаси ва режалаштирилаётган қурилиш объекти тўғрисидаги маълумотларни мустақил равишда киритиш имконини берувчи мобиль иловани ишга тушириш;
2) кўп қаватли уйларнинг ертўлаларидан тадбиркорлик мақсадида фойдаланиш, турар жойни нотурар жой тоифасига ўтказишга рухсат этиш тартиб-таомилларини соддалаштириш;
3) енгил конструкцияли хизмат кўрсатиш шохобчаларини аукцион савдолари орқали жойлаштириш тартибини жорий этиш.
Саида ЖОНИЗОҚОВА тайёрлади
