Получите быстрые ответы, проверенные экспертами:
Солиқ ставкалари оширилди, солиқ имтиёзларини қўллаш учун шартлар жорий этилди, иссиқхона хўжаликлари қишлоқ хўжалиги ерлари учун ставкалар бўйича солиқ тўлайдилар...
Иқтисодиёт ва молия вазирлиги солиқ-божхона сиёсати бошқармаси бошлиғи Ашрафхон САЛОҲИДДИНОВ ЎРҚ-1108-сон Қонун бўйича Солиқ кодексига киритилган ўзгартиришларни санаб ўтди:
Қонунчиликдаги муҳим ўзгаришларни ўтказиб юбормаслик учун бизнинг Телеграм-каналимизга обуна бўлинг.
Юридик шахслар учун:
1. Қишлоқ хўжалигига мўлжалланмаган ерлар бўйича солиқ ставкалари – ўртача 7%га оширилди 
.
2. Айрим тоифадаги ерлар бўйича солиқ ставкаларига нисбатан коэффициент 0,45 дан 0,48 гача оширилди. Хусусан – электр узатиш линиялари, умумдавлат алоқа линиялари, умумий фойдаланишдаги темир йўллар ва бошқалар эгаллаган ерлар бўйича .
3. Қорақалпоғистон Жўқорғи Кенгеси, халқ депутатлари вилоятлар ва Тошкент шаҳар Кенгашлари қишлоқ хўжалигига мўлжалланган ерлар учун солиқ ставкаларига 0,5 дан 1,2 гача камайтирувчи ва оширувчи коэффициентларни қўллаш ҳуқуқига эга бўлдилар .
4. Иссиқхона хўжаликлари эгаллаган ерлар учун солиқ ер участкаларининг норматив қийматидан келиб чиққан ҳолда қишлоқ хўжалигига мўлжалланган ерлар учун белгиланган ставкалар бўйича тўланади .
5. Солиқ имтиёзлари ўтган календарь йил якунлари бўйича бир вақтнинг ўзида қуйидаги шартлари бажарилганда қўлланилади :
- товарларни (хизматларни) реализация қилишдан олинган жами даромад мол-мулк солиғи ва (ёки) ер солиғи бўйича фойдаланилган имтиёз суммасидан ошса;
- ҳар бир ходимга ходимларнинг ўртача йиллик сони 3 нафардан кам бўлмаганда МҲТЭКМнинг 2 бараваридан кам бўлмаган миқдорда ҳар ойлик иш ҳақи ҳисобланади.
Ушбу шартларни белгилашда қуйидагилар ҳисобга олинади:
- тақдим этилган аниқлаштирилган солиқ ҳисоботи;
- охирги 12 ой учун товарларни (хизматларни) реализация қилиш бўйича айланма (агар календарь йил якунлари бўйича ҳисобот тақдим этиш муддати келмаган бўлса).
Эътибор беринг
Календарь йил давомида янгидан ташкил этилган ташкилотларга ва янги имтиёзларга нисбатан ушбу шартлар кейинги календарь йил якунлари бўйича қўлланилади (қайта ташкил этилган юридик шахслардан ташқари).
Мазкур шартлар қуйидагиларга нисбатан татбиқ этилмайди:
- тўғридан-тўғри хусусий хорижий инвестициялар иштирокидаги юридик шахсларга;
- маҳсулот тақсимоти тўғрисидаги битим иштирокчиларига;
- нотижорат ташкилотларга;
- бюджет ташкилотларига;
- ягона иштирокчилари ногиронлиги бўлган шахсларнинг жамоат бирлашмалари бўлган, ходимларининг умумий сонида ногиронлиги бўлган шахслар камида 50 фоизни, ногиронлиги бўлган шахслар меҳнатига ҳақ тўлаш фонди эса – умумий меҳнатга ҳақ тўлаш фондининг камида 50 фоизини ташкил этадиган юридик шахсларга;
- 2026 йил 1 январга қадар махсус иқтисодий зона иштирокчиси мақомини олган юридик шахсларга.
Санаб ўтилган қоидаларни қўллаш тартибини Вазирлар Маҳкамаси белгилайди. У 2026 йил якунлари бўйича 2027 йилдан бошлаб қўлланилади (25.12.2025 й. ЎРҚ-1108-сон 9-м. 3-қ.).
Эътибор беринг
Юридик шахслардан олинадиган ер солиғи бўйича ҳисоботлар солиқ органлари томонидан уларнинг ахборот тизимида мавжуд бўлган ва солиқ тўловчи (солиқ агенти) томонидан шахсий кабинетдаги интерактив хизматга киритилган маълумотлар асосида проактив тарзда – электрон шаклда шакллантирилади.
Агар солиқ органлари томонидан шакллантирилган ҳисобот маълумотлари солиқ тўловчининг (солиқ агентининг) ҳисобга олиш ҳужжатларидан фарқ қилса, солиқ тўловчи (солиқ агенти) ҳисоботни 5 кун ичида, лекин уни топшириш муддатидан кечиктирмай тузатади ва тақдим этади.
Ушбу муддатда солиқ органлари томонидан шакллантирилган ҳисоботга тузатишлар киритилмаганлиги солиқ тўловчининг (солиқ агентининг) унга розилигини билдиради. Ҳисобот солиқ органлари томонидан қандай шаклда тузилган бўлса, шундай тақдим этилган ҳисобланади.
Ҳисобот тақдим этиш тартибини қўшимча равишда Вазирлар Маҳкамаси белгилайди .
Жисмоний шахслар учун:
1. Қишлоқ хўжалигига мўлжалланмаган ерлар бўйича солиқ ставкалари – ўртача 7%га оширилди .
2. Қорақалпоғистон Жўқорғи Кенгеси, халқ депутатлари вилоятлар ва Тошкент шаҳар Кенгашлари қишлоқ хўжалигига мўлжалланган ерлар учун солиқ ставкаларига 0,5 дан 1,2 гача камайтирувчи ва оширувчи коэффициентларни қўллаш ҳуқуқига эга бўлдилар .
3. Иссиқхона хўжаликлари эгаллаган ерлар учун солиқ ер участкаларининг норматив қийматидан келиб чиққан ҳолда, қишлоқ хўжалигига мўлжалланган ерлар учун белгиланган ставкалар бўйича тўланади .
