2022 yilda foyda soligʻini kimlar va qanday tartibda toʻlaydilar

Foyda soligʻini toʻlovchilar kutilayotgan foyda summasidan kelib chiqqan holda foyda soligʻi boʻyicha boʻnak toʻlovlarini toʻlash huquqiga ega . Ushbu masala yuzasidan 2022 yilda qanday jihatlar hisobga olinishi lozimligini    Moliya vazirligi Soliq-bojхona siyosati va daromadlarni prognozlashtirish departamenti direktori Irodaхon ABBOSXONOVA tushuntirib berdi:

Boʻnak toʻlovlari qanday toʻlanadi?  

Foyda soligʻini toʻlovchilar I chorak uchun boʻnak toʻlovlarini 2021 yilning IV choragi uchun boʻnak toʻlovlari summasidan kelib chiqqan holda toʻlaydilar. II–IV choraklarda esa avvalgi chorak uchun Hisob-kitob boʻyicha hisoblangan soliq summasidan kelib chiqib toʻlaydilar . Bunda soliq toʻlovchi boʻnak toʻlovlari toʻgʻrisidagi ma’lumotnomani taqdim etmagan taqdirda, boʻnak toʻlovlari summasi soliq organi tomonidan hisoblab chiqariladi. Soliq toʻlovchi kelgusi chorak birinchi oyining 10-sanasiga qadar joriy chorakda kutilayotgan foyda summasidan kelib chiqqan holda toʻlovni amalga oshirishi mumkin.

Masalan, 2021 yil IV chorakda korхona har oyda 25 mln soʻm miqdorida boʻnak toʻlovlarini toʻlagan. Bu shubhasiz, 2022 yilning I choragida ham хuddi shunday summada boʻnak toʻlovlari toʻlanishi kerakligini anglatadi.

Biroq, agar siz foydani oshirish yoki kamaytirishni moʻljal qilayotgan boʻlsangiz, soliq organlariga I chorak uchun boʻnak toʻlovlari toʻgʻrisidagi ma’lumotnomani taqdim etishingiz mumkin. Sizdagi ma’lumotlar boʻnak toʻlovlarini toʻlash uchun asos boʻladi. Faqat quyidagini hisobga oling: kutilayotgan foyda summasi asossiz kamaytirib koʻrsatilgan taqdirda soliq organlari soliq toʻlovchilar tomonidan taqdim etiladigan soliq boʻyicha boʻnak toʻlovlari summasi toʻgʻrisidagi ma’lumotnomaga oʻzgartirishlar kiritishga haqli , bunda penya ham hisoblanadi . Bunday holatda umumiy qoida amal qiladi: hisob-kitob oʻzgartirilgan taqdirda (toʻlanmagan toʻlovlar aniqlanganda), penyalar, agar SKda boshqacha qoida nazarda tutilmagan boʻlsa, soliq toʻgʻrisidagi qonun hujjatlarida belgilangan soliqni toʻlash kunidan keyingi kundan boshlab soliqni toʻlash boʻyicha majburiyatni bajarish kechiktirilgan har bir kalendar kun uchun avtomatik tarzda hisoblanadi.

Ma’lumotnoma qanday taqdim etiladi?

Ma’lumotnoma chorak birinchi oyining 10-sanasiga qadar , ya’ni:

• I chorak uchun – 9 yanvar dam olish kuniga toʻgʻri kelganligini hisobga olgan holda, 10 yanvardan kechiktirmay .
• II chorak uchun – 11 apreldan kechiktirmay;
• III chorak uchun – 11 iyuldan kechiktirmay;
• IV chorak uchun – 10 oktyabrdan kechiktirmay taqdim etiladi.

Siz ma’lumotnomani taqdim etsangiz, avvalgi chorak yakunlari boʻyicha boʻnak toʻlovlari hisoblanmaydi.

Foyda soligʻini toʻlovchilarning hammasi ma’lumotnomani taqdim etishi lozimmi

Yoʻq, hammasi emas.

Birinchidan, barcha soliq toʻlovchilar boʻnak toʻlovlarini toʻlovchilar hisoblanmaydi. Boʻnak toʻlovlarini faqat jami daromadi 2021 yildagi yoki 2022 yil mobaynida kiritilgan tuzatishlar hisobga olingan holda 5 mlrd soʻmdan oshadigan soliq toʻlovchilargina toʻlaydilar .

Jami daromadi hajmi 5 mlrd soʻmdan oshmaydigan korхonalar foyda soligʻini hisob-kitobga asosan chorak yakunlari boʻyicha toʻlaydilar.

Ikkinchidan, foyda soligʻi boʻyicha boʻnak toʻlovlarini toʻlovchilar uchun ma’lumotnomani taqdim etish bu majburiyati emas, balki huquqi hisoblanadi.

Agar siz boʻnak toʻlovlari toʻgʻrisidagi ma’lumotnomani taqdim etmagan boʻlsangiz, toʻlovlarni avvalgi chorak koʻrsatkichlari boʻyicha toʻlashingiz lozim. Mazkur holatda sizning oylik boʻnak toʻlovingiz soliq organlari tomonidan hisoblab chiqariladi.

Boʻnak toʻlovlarini (ma’lumotnoma yoki avvalgi chorak yakunlari boʻyicha) toʻlash muddatlari – har oyning 23-sanasidan kechiktirmay.

E’tibor bering

Qarzni undirish choralariga oʻzgartirishlar kiritilmadi. Agar soliq toʻlovchida toʻlanmagan soliq qarzi mavjud boʻlsa, soliq organi unga soliqlarni toʻlash muddati oʻtganidan keyin 3 kundan kechiktirmay soliq qarzini uzish toʻgʻrisida talabnoma yuboradi .

Boʻnak toʻlovlarini toʻlovchi ma’lumotnomani oʻz vaqtida taqdim etmagan, foyda esa kamaygan boʻlsa, nima qilish kerak?

Mazkur holatda siz boʻnak toʻlovlarini 2021 yilning IV choragi yakunlari boʻyicha toʻlaysiz.

I chorak yakunlari boʻyicha Hisob-kitobda foydaning haqiqiy summasini koʻrsating. Agar ushbu summa prognoz qilinganidan kam boʻlsa, boʻnak toʻlovlari hisob-kitobdagi soliq summasidan ortiq boʻladi. Ortiqcha toʻlangan soliq summasi soliq toʻlovchining arizasiga koʻra :

• foyda soligʻi yoki boshqa soliqlar boʻyicha kelgusi toʻlovlar hisobiga hisobga olinishi;
• soliq toʻlovchiga toʻliq yoki qisman qaytarilishi lozim.

II chorakda boʻnak toʻlovlari summasi I chorak yakunlari boʻyicha yoki ma’lumotnomaga asosan aniqlanadi, ma’lumotnoma 10 aprelga qadar (10 aprel dam olish kuniga toʻgʻri kelganligi sababli11 apreldan kechiktirmay) taqdim etilishi lozim.

“Nol” qiymatdagi boʻnak toʻlovlari toʻgʻrisidagi ma’lumotnomani taqdim etish mumkinmi?

Hisobot davridagi soliq solinadigan foyda summasi nolga tengligiga ishonchingiz komil boʻlsa, shunday ma’lumotnomani taqdim etish mumkin.

Biroq shuni hisobga olish lozimki, soliq organlari foyda soligʻi boʻyicha boʻnak toʻlovlari summasi toʻgʻrisidagi ma’lumotnomaga oʻzgartirishlar kiritishga haqli . Shu boisdan sizga berilgan huquqni suiiste’mol qilmang.

2021 yil yakunlari boʻyicha zarar koʻrilgan boʻlsa, 2022 yilda boʻnak toʻlovlari toʻlanishi lozimmi?

2021 yilda jami daromad hajmi 5 mlrd soʻmdan oshgan boʻlsa, boʻnak toʻlovlari toʻlanadi. Mazkur holatda 2022 yilda siz foyda soligʻi boʻyicha boʻnak toʻlovlarini toʻlovchisi boʻlasiz.

Bunda I chorakda siz boʻnak toʻlovlarini 2021 yil IV chorakdagi miqdor darajasida toʻlashingiz lozim. IV chorakda boʻnak toʻlovlari nolga teng boʻlgan taqdirda, 2022 yil I chorakda ham toʻlov toʻlanmaydi.

II chorakdan boshlab boʻnak toʻlovlari avvalgi chorak yakunlari boʻyicha yoki boʻnak toʻlovlari toʻgʻrisidagi ma’lumotnomaga asosan toʻlanadi».

E’tibor bering

2022 yilgi foydani 2021 yildagi zarar summasiga faqat 2022 yil yakunlari boʻyicha kamaytirishingiz mumkin .

Eslatib oʻtamiz

2022 yildan boshlab zarar summalarini kelgusi davrlarga koʻchirish boʻyicha cheklovlar olib tashlandi .