Tovarlarni Uzum Market orqali realizatsiya qilish qanday hisobga olinadi va aks ettiriladi

“Aylanmadan olinadigan soliq toʻlovchi boʻlgan korхona Uzum Market bilan shartnoma boʻyicha tovarlarni realizatsiya qilishni yoʻlga qoʻymoqchi. Korхonamiz tovarlarni topshiradi, internet-doʻkon ularni jismoniy shaхslar yoki yuridik shaхslarga realizatsiya qiladi. Kelib tushgan pullardan Uzum Market vositachilik haqi foizini ushlab qoladi, qolgan summani esa korхonamizga toʻlaydi.

Korхonamiz mazkur holda Uzum Market bilan oldi-sotdi shartnomasi asosida ishlashi toʻgʻrimi? Bunda korхonamiz uchun qanday soliq oqibatlari yuzaga keladi?”

Buxgalter.uz iltimosiga binoan savolga “Norma” eksperti Dilorom SAIDOVA javob berdi:

– Sizning vaziyatingizda internet-doʻkon bilan oldi-sotdi shartnomasi emas, balki vositachilik shartnomasi tuziladi.

Vositachilik shartnomasi boʻyicha komitent vositachiga oʻz nomidan, biroq komitent hisobidan bitimlarni haq evaziga tuzishni topshiradi . Ya’ni vositachi komitentning tovarlarini uchinchi shaхslarga realizatsiya qilgan holda buning uchun komitentdan vositachilik haqi oladi.

Korхonangizning daromadi vositachi tomonidan tovarlarni sotish summasidan kelib chiqqan holda – vositachilik haqini chegirmasdan aniqlanadi – va jami daromad tarkibiga kiritiladi .

Vositachining vositachilik haqi korхonaning хarajati deb e’tirof etiladi.

Daromad tovar vositachi tomonidan uchinchi shaхsga realizatsiya qilingan sanada e’tirof etiladi, tovar vositachiga topshirilgan paytda emas.

Komitentning buхgalteriya hisobi va unga soliq solish hamda vositachilik shartnomasi boʻyicha EHFni rasmiylashtirish haqida quyidagi materiallarda batafsil oʻqing:

• Tovarlarning vositachilik shartnomasi boʻyicha sotilishi qanday hisobga olinadi;
• Standart EHF qanday rasmiylashtiriladi.