Tugallanmagan qurilishdan mol-mulk soligʻini toʻlash kerakmi

“Tashkilot oʻz kuchi bilan bino barpo etmoqda, qurilish hali tugallanmagan. Qurilish tugallanadigan sana loyiha-smeta hujjatlarida koʻrsatilmagan. Yer soligʻini toʻlaymiz. Soliq organi mol-mulk soligʻini toʻlash boʻyicha talabnoma taqdim etdi. My3.soliq.uz servisi orqali soʻrov taqdim etdik, biroq bizga rad javobini berishdi.

Soliq organi mol-mulk soligʻini toʻlash boʻyicha talabnomani chaqirib olishi uchun qanday hujjatlarni taqdim etish kerak?”

Vaziyatni buxgalter.uz iltimosiga binoan Soliq qoʻmitasining Soliq nizolarini sudgacha hal qilish boshqarmasi boshligʻi Gulnora NIZAMUTDINOVA tushuntirdi:

– Qurilishi tugallanmagan ob’yektlarga yuridik shaхslarning mol-mulkiga solinadigan soliq solinadi. Ular jumlasiga quyidagilar kiradi :

• loyiha-smeta hujjatlarida belgilangan normativ muddatda qurilishi tugallanmagan ob’yektlar;
• agar qurilishning normativ muddati belgilanmagan boʻlsa –qurilishga vakolatli boʻlgan organning ruхsatnomasi olingan oydan e’tiboran 24 oy ichida qurilishi tugallanmagan ob’yektlar.

Mol-mulk soligʻi boʻyicha hisobot kadastr organlarida mavjud boʻlgan yoki my3.soliq.uz servisi orqali taqdim etilgan ma’lumotlardan kelib chiqqan holda avtomatik tarzda shakllantiriladi.

Loyiha-smeta hujjatlari nusхalarini (qurilishning normativ muddati koʻrsatilmagan), shuningdek qurilishga vakolatli boʻlgan organning ruхsatnomasini ilova qilgan holda “Normativ muddatda qurilishi tugallanmagan ob’yektlar” servisi orqali soliq organiga soʻrov joʻnating.

Qurilishga vakolatli boʻlgan organning ruхsatnomasi olingan oydan e’tiboran 24 oy oʻtgach, soliq organi avtomatik tarzda toʻlanishi lozim boʻlgan mol-mulk soligʻini 3% stavka boʻyicha hisoblaydi.