2024 yil uchun moliyaviy hisobotni qaysi qoidalar boʻyicha tuzish kerak

Yangi 1-son BHMS «Moliyaviy hisobotni taqdim etish va hisob siyosati» 2025 yil 1 yanvardan kuchga kiradi. Savollar tugʻilmoqda: 2024 yil uchun moliyaviy hisobotni tuzishda qaysi BHMSga amal qilish kerak – 2024 yilda qabul qilingangami yoki eskisigami? 2024 yil uchun moliyaviy hisobotni qaysi muddatlarda taqdim etish kerak?

Vaziyatni buxgalter.uz iltimosiga koʻra soliq maslahatchisi Gulnora ERGAShEVA sharhlab berdi:

– 2024 yil uchun moliyaviy hisobotni 2025 yil 1 yanvardan kuchga kiradigan 1-sonli BHMS qoidalari boʻyicha topshirish kerak. Ushbu standart yangi Moliyaviy hisobot shakllarini tasdiqlash va moliyaviy hisobotni taqdim etish muddatlari toʻgʻrisidagi nizomga asoslanadi (04.11.2024 y. AV roʻyхat raqami 3567-son).

BHMS asosida tuzilgan yillik moliyaviy hisobot shakllari quyidagilarni oʻz ichiga oladi:

• Balans;
• Moliyaviy natijalar toʻgʻrisidagi hisobot;
• Xususiy kapital toʻgʻrisidagi hisobot;
• Pul mablagʻlari harakati toʻgʻrisidagi hisobot;
• Izohlar, hisob-kitoblar va tushuntirishlar.

Mikrofirmalar va kichik korхonalarning yillik moliyaviy hisoboti balans va moliyaviy natijalar toʻgʻrisidagi hisobotni oʻz ichiga oladi.

MHXSga muvofiq tuziladigan yillik moliyaviy hisobot shakllari quyidagilarni oʻz ichiga oladi:

• Moliyaviy holat toʻgʻrisidagi hisobot;
• Foyda yoki zarar va boshqa umumiy daromad toʻgʻrisidagi hisobot;
• Xususiy kapitaldagi oʻzgarishlar toʻgʻrisidagi hisobot;
• Pul mablagʻlari harakati toʻgʻrisidagi hisobot (bilvosita usul);
• Hisob siyosatining muhim qoidalari va boshqa tushuntirish ma’lumotlarini oʻz ichiga olgan izohlar (moliyaviy hisobotga izohlar).

BHMS boʻyicha tuzilgan yillik moliyaviy hisobot hisobot yilidan keyingi yilning 1 martidan kechiktirmay taqdim etiladi.

MHXS boʻyicha tuzilgan yillik moliyaviy hisobot hisobot yilidan keyingi yilning 1 mayidan kechiktirmay taqdim etiladi.

Yangi qoidalarda 10.11.2022 yildagi PQ-419-son qarorga muvofiq moliyaviy hisobot topshirishdan ozod qilingan, qat’iy miqdorda aylanmadan olinadigan soliq toʻlovchilar borligi hisobga olinmagan. Soliq maslahatchisining fikrini «Kimlar 2024 yil uchun moliyaviy hisobotni 2025 yil 1 martgacha topshirmasligi mumkin» maqolasida oʻqishingiz mumkin.