Yillik inventarizatsiya – 2026: tartib va hujjatlar
Iqtisodiyot va moliya vazirligi 2027–2029 yillar uchun Fiskal strategiyani e’lon qildi. Buxgalter.uz soliq siyosati va ma’murchiligida rejalashtirilayotgan oʻzgarishlar sharhini tayyorladi:
Muhim yangiliklarni oʻtkazib yubormaslik uchun Telegram-kanalimizga obuna boʻling.
Soliq siyosatining asosiy yoʻnalishlari
|
T/r |
Yoʻnalish |
Rejalashtirilayotgan chora-tadbirlar |
|
1 |
Daromaddan olinadigan soliqlar |
Foyda soligʻida ayrim chiqimlar boʻyicha xarajatlarni chegirish va koʻrilgan zararlarni oʻtkazish tartibini takomillashtirish; foyda soligʻi va JShDS boʻyicha ayrim imtiyozlarni qayta koʻrib chiqish; yuridik va jismoniy shaxslar oʻrtasidagi qarz operatsiyalariga soliq solishni bir xillashtirish. |
|
2 |
QQS |
QQS zanjirining yaxlitligini va uzluksizligini ta’minlash uchun imtiyozlarni optimallashtirish; QQSni qaytarish mexanizmlarini takomillashtirish. |
|
3 |
Aksiz soligʻi va ekologiya |
Aksiz soligʻini hisoblash tartibini takomillashtirish va stavkalarni inflyatsiya darajasini inobatga olgan holda indeksatsiya qilish; «yashil soliqqa tortish» tamoyillari va elementlarini ishlab chiqish. |
|
4 |
Resurs soliqlari va mol-mulk soligʻi |
Koʻchmas mulkni ommaviy baholash natijasida aniqlangan bozor bahosiga nisbatan soliq solish tizimini takomillashtirish; resurs soliqlari va mol-mulk soligʻi stavkalarini inflyatsiya darajasida oshirib borish. |
|
5 |
Soliq imtiyozlari |
Xalqaro tashkilotlar hamkorligida «soliq xarajati»ni baholash boʻyicha metodologiya ishlab chiqish; imtiyozlardan foydalanishda majburiy qoʻllaniladigan shartlarni ishlab chiqish. |
|
6 |
Boj tarif siyosati |
Bojxona boji stavkalarini belgilash hamda bojxona boji boʻyicha imtiyozlarni taqdim etish tartibini takomillashtirish. |
Yashirin iqtisodiyotni qisqartirish
Fiskal strategiyada ta’kidlanishicha, dastlabki hisob-kitoblarga koʻra, kuzatilmaydigan iqtisodiyot darajasi 2019 yildagi 50 foizdan 2025 yilga kelib 25 foiz atrofigacha kamaydi.
Prezidentning 2025 yil 10 dekabrdagi PF-246-son Farmoni bilan quyidagi maqsadli koʻrsatkichlar belgilangan: 2030 yilgacha kuzatilmaydigan iqtisodiyotning YaIMdagi ulushini 1,3 baravarga qisqartirish, aholining naqd pulsiz toʻlovlari ulushini 75 foizga yetkazish hamda rasmiy bandlikni kengaytirish.
Kuzatilmaydigan iqtisodiyot ulushini yanada qisqartirishning asosiy yoʻnalishlari:
1) Rasmiy faoliyat yuritish uchun sharoit yaratish:
- faoliyatni amalga oshirish uchun qulay va soddalashtirilgan shart-sharoitlar yaratish orqali tadbirkorlik sub’yektlari va oʻzini oʻzi band qilgan shaxslarni iqtisodiyotning norasmiy sektoridan rasmiy sektorga oʻtishini ragʻbatlantirish;
- soliq solishning soddalashtirilgan rejimidan umumbelgilangan tartibga oʻtish shartlarini kengaytirish, tadbirkorlarning yiriklashishi uchun toʻsiqlarni kamaytirish;
- faoliyatni kengaytirish va jozibadorlikni oshirish uchun buxgalterlar va soliq maslahatchilarini jalb qilish boʻyicha qoʻshimcha yengilliklar berish;
- intizomli soliq toʻlovchilarga nazoratni kamaytirish;
- aholi va tadbirkorlarda soliq toʻlash madaniyatini oshirishga qaratilgan chora-tadbirlarni amalga oshirish, ularga qonuniy faoliyat yuritishning afzalliklarini yetkazish orqali soliq toʻlash madaniyatini yanada oshirish.
2) Soliq va bojxona ma’murchiligini raqamlashtirish:
- soliq va bojxona organlari tomonidan taqdim etiladigan raqamli xizmatlar hamda davlat organlari tomonidan soliq toʻlovchilarga koʻrsatiladigan boshqa xizmatlarni kengaytirish;
- davlat organlari va tashkilotlari bilan integratsiyani kengaytirish orqali elektron hisobvaraq-fakturalar, onlayn nazorat kassa mashinalari cheklari, raqamli markirovka va boshqa ma’lumotlarni tahlil qilish va qayta ishlash boʻyicha amaliy koʻnikmalarni oshirish;
- naqd pulli hisob-kitoblar darajasi yuqori va kuzatuvchanlik yetarli boʻlmagan sektorlarga alohida e’tibor qaratish (chakana savdo, umumiy ovqatlanish, qurilish, koʻchmas mulk ijarasi, qishloq xoʻjaligi, yoʻlovchi va yuk tashish);
- biznesni sun’iy ravishda boʻlish, aylanmani yashirish va soliqlardan qochishning boshqa sxemalari, norasmiy bandlikning oldini olish va ularga qarshi kurashish;
- hududlarning soliq salohiyatini va yashirin iqtisodiyotni qisqartirish boʻyicha koʻrilayotgan chora-tadbirlar natijadorligini baholash tizimini yaratish.
3) Naqd pulsiz toʻlovlardan foydalanishni ragʻbatlantirish orqali ularni kengaytirish:
- bank kartalari, QR-toʻlovlar, mobil pul oʻtkazmalari va elektron toʻlov tizimlaridan foydalanishda qoʻshimcha ragʻbatlantirishni joriy etish orqali naqd pulsiz hisob-kitoblarni rivojlantirish;
- marketpleyslarni rivojlantirishni ragʻbatlantirish, ulardagi sotuvchilarga qoʻyiladigan talablarni joriy etish, shuningdek elektron toʻlovlarni qoʻllashni kengaytirish va soliqqa tortish tizimini takomillashtirish;
- aholi uchun naqd pulsiz toʻlovlarni amalga oshirishda, ayniqsa aylanmalar yashirilishi xavfi yuqori boʻlgan sohalarda yangi ragʻbatlarni joriy etish;
4) Bandlikni rasmiylashtirish:
- mehnat qonunchiligini yanada takomillashtirish, xodimlarni ishga qabul qilish, boshqa ishga oʻtkazish va ular bilan mehnat munosabatlarini bekor qilish tartib-taomillarini soddalashtirish;
- rasmiy ishga joylashish uchun ragʻbatlarni, shu jumladan rasman band boʻlganlarga kreditlar, ipoteka, ijtimoiy toʻlovlar va mehnat muhofazasidan foydalanish imkoniyatlarini kengaytirish;
- xodimlarni ixtiyoriy ravishda legallashtirishda ish beruvchilar uchun qoʻshimcha ragʻbatlantirish choralarini joriy etish;
- norasmiy bandlarni, ayniqsa, qurilish, savdo, umumiy ovqatlanish, qishloq xoʻjaligi, transport kabi sohalarda aniqlash uchun tahlil va monitoring oʻtkazish;
5) Xavflarga yoʻnaltirilgan nazorat:
- moʻljallanayotgan xarajatlar va kutilayotgan natijalar nisbati asosida faoliyat yoʻnalishlarini ustuvorlashtirishni nazarda tutgan holda mavjud resurslardan, shu jumladan inson resurslaridan foydalanish samaradorligini oshirish. Bunda e’tibor bir vaqtning oʻzida qonunbuzarlik ehtimoli va byudjetning potensial yoʻqotishlari yuqori boʻlgan sektorlarga qaratiladi;
- soliq qonunchiligiga ixtiyoriy rioya qilish, soliqqa oid xatoliklarni oldini olish va resurslarni eng kam sarflagan holda iqtisodiy faollikning muhim ulushini qamrab olish darajasini oshirish;
- ilgari hisobga olinmagan xoʻjalik faoliyatini aniqlash, hisobga olish va rasmiy iqtisodiy aylanmaga jalb etish yoʻli bilan soliq solinadigan bazani kengaytirish;
- xalqaro «TADAT» metodologiyasi asosida soliq nazorati jarayonlarini qayta koʻrib chiqish va raqamlashtirish;
- soliq-bojxona ma’murchiligini yuqori daromadli mamlakatlar tajribalari asosida takomillashtirib borish.
![]()