Хорижий компанияга суғурта хизматлари учун тўлов қилишда ҚҚС ушлаб қолинадими

«Суғурта компанияси суғурта, биргаликда суғурта қилиш ва қайта суғурта қилиш шартномалари бўйича хизматлар кўрсатади. Ушбу айланма СКнинг 245-м. 1-қ. 1-б. 2-хатбошисига мувофиқ ҚҚСдан озод қилинган. Компания хорижий контрагент билан қайта суғурталаш бўйича шартнома тузган, унинг хизматлари учун чет эл валютасида тўлов амалга оширади. Суғурта компанияси контрагентга тўловлардан ҚҚСни ушлаб қолиши ва бюджетга тўлаши керакми?»

Саволга «Норма»нинг эксперти, «Жавоб берамиз!» хизматининг мутахассиси Азизахон ТОШХЎЖАЕВА жавоб берди:

– Ҳаётни суғурта қилиш ва СКнинг 245-моддасида назарда тутилган бошқа суғурта хизматларини кўрсатиш бўйича айланма ҚҚСдан озод қилинган . Товарлар (хизматлар)ни реализация қилиш айланмаси, агар фаолият лицензияланадиган ёки қонун ҳужжатларига мувофиқ рухсат берувчи ҳужжатлар талаб этиладиган бўлса, солиқ тўловчида тегишли лицензиялар ва бошқа рухсат берувчи ҳужжатлар мавжуд бўлган тақдирда солиқ солишдан озод қилинади .

Агар реализация қилиш жойи Ўзбекистон бўлган товарлар (хизматлар)ни Ўзбекистонда солиқ ҳисобида турмаган хорижий шахслар реализация қилса, ҚҚС бўйича солиқ базасини солиқ агентлари белгилайди. Солиқ агенти солиқни ҳисоблаб чиқариши, уни солиқ тўловчидан ушлаб қолиши ва бюджетга тўлаши шарт . Бироқ СКнинг 255-моддаси қоидалари норезидентлар томонидан СКнинг 243-245-моддаларида кўрсатилган товарлар (хизматлар)ни реализация қилишда қўлланилмайди .

Тегишли равишда, СКнинг 245-моддасига мувофиқ суғурта хизматларини реализация қилиш айланмаларини ҚҚСдан озод қилиш норезидентларга ҳам татбиқ этилади. Бундай хизматларни сотиб олишда солиқ агенти уларга ҚҚС солмаслиги ва солиқни бюджетга тўламаслиги керак.