Онлайн-НКМ солиқ органларида рўйхатдан ўтказилганлиги қандай ҳужжат билан тасдиқланади ва инкассация хизмати билан шартнома мажбурийми

Фискал хотирали НКМ рўйхатдан ўтказиш карточкалари, фискал хотирали НКМдан фойдаланиш учун турғун шохобчанинг мавжудлиги, шунингдек банк билан инкассация қилиш тўғрисидаги шартноманинг мавжудлиги талаби 2022 йил 1 июлдан айрим талаб ва шартлари бекор қилинаётган лицензиялар ва рухсат этиш хусусиятига эга ҳужжатлар рўйхатига кирди .

Айрим тадбиркорлар ушбу ҳолатни онлайн-НКМни рўйхатдан ўтказиш талаб қилинмайди деб тушунишмоқда. Ушбу ўзгартиришлар аслида нимани англатишини buxgalter.uz ўқувчилари учун солиқ маслаҳатчиси “Ergasheva tax protection” СМТ директори Гулнора ЭРГАШЕВА тушунтиради:

– 2022 йилда фискал хотирали НКМ учун рўйхатдан ўтказиш карточкалари ва талаблар бекор қилинди. Ушбу қурилмалар интернетга кириш имкониятига эга бўлмаган, касса чеклари эса назорат-касса машинасининг фискал хотирасида сақланган. Ушбу технология ўрнига реал вақт режимида фискал маълумотларни солиқ органларига узатадиган онлайн-НКМ келди. 2022 йилда онлайн-НКМга ўтиш якунланди. Шундай экан, эскирган кассаларга тааллуқли талаблар ва ҳужжатларнинг бекор қилиниши қонуний бўлди.

Фискал хотирали НКМ қўлланилган вақтда солиқ органлари томонидан қоғозда, НКМни рўйхатдан ўтказган мансабдор шахснинг имзоси билан, солиқ органининг муҳри билан тасдиқланган – рўйхатдан ўтказиш карточкалари расмийлаштирилган.

Ҳозир фақат онлайн-НКМдан фойдаланилаётган вақтда рўйхатдан ўтказиш карточкалари электрон маълумотлар билан алмаштирилди: солиқ органи томонидан онлайн-НКМ ёки виртуал касса рўйхатдан ўтказилганлиги тўғрисидаги ахборот солиқ тўловчининг шахсий кабинетида акс эттирилади.

Касса солиқ органида рўйхатдан ўтказилганлигига қандай ишонч ҳосил қилиш мумкин:

1. My3.soliq.uzдаги шахсий кабинетга киринг.
2. “Онлайн назорат-касса техникасига доир ахборот” интерактив хизматини танланг.
3. “Чеклар тўғрисида ахборот” сатрида чиқиб келадиган тавсиядан “Кассалар ва ТХКМ рўйхати”ни танланг.
4. “Кассалар рўйхати” қўшимча саҳифасини очинг.
5. Сизга керакли онлайн-НКМни танланг ва “Маълумотнома” устунида у рўйхатдан ўтказилганлиги тўғрисида ҳужжатни юклаб олинг. Ҳужжатнинг ҳақиқийлигини QR-код бўйича текшириш мумкин – уни сканерлаш ҳужжатнинг электрон версиясига кириш имкониятини очади.

Инкассацияга келсак: онлайн-НКТни қўллайдиган тадбиркорлик субъектлари кунлик ўртача нақд пул тушуми миқдоридан қатъи назар, нақд пулни банк кассасига қандай топширишни танлашлари мумкин :

• инкассация хизматлари орқали – тадбиркорлик субъекти белгилаган даврларда;
• мустақил равишда – банкка шахсан топшириш.

Агар сиз нақд пулни банкка мустақил равишда олиб боришни афзал кўрсангиз, инкассация хизмати билан шартнома тузиш керак эмас.

НКМ ҳақида барчаси бизнинг Buхgalter Pro эксперт-маълумотнома тизимимизда

 

• Назорат касса техникасини кимлар қўллаши керак
• Онлайн-НКТни қандай танлаш ва уни солиқ органида қандай рўйхатдан ўтказиш керак
• Онлайн-НКМ (виртуал касса) билан қандай манзил бўйича ишлаш керак
• Онлайн-НКМ ёки виртуал кассанинг узлуксиз ишлаши қандай таъминланади

Buxgalter Pro ҳақида қўпроқ билиш

 

 

Олег ГАЕВОЙ тайёрлади