Ветеринария клиникалари ва оптика салонларини ҚҚСга ўтказиш асослими

2025 йил 1 апрелдан бошлаб фармацевтика маҳсулотлари савдоси билан шуғулланувчи ёки тиббий хизмат кўрсатувчи юридик шахслар СКда тегишли ўзгартиришлар бўлмаса-да, ҚҚС тўловчиларига айландилар 27.12.2024 й. ПФ-229-сон 3-б.. Улардан ташқари, ветеринария клиникалари ва кўзойнакларни тайёрлаш ва сотиш бўйича салонлар ҳам солиқ органларидан шундай талабни олдилар.

Бундай фаолиятни тартибга солувчи норматив-ҳуқуқий ҳужжатлар нуқтаи назаридан бу қанчалик қонуний эканлиги тўғрисида buxgalter.uz илтимосига кўра солиқ маслаҳатчиси Гулнора ЭРГАШЕВА тушунтирди:

 

Ветеринария клиникалари

– Ветеринария клиникалари ҚҚСга ўтиш ҳақида талабнома олдилар, ҳолбуки ПФ-229-сон Фармоннинг 3-бандида фақат фармацевтика маҳсулотлари савдоси билан шуғулланувчи ёки тиббий хизмат кўрсатувчи ташкилотлар ҳақида айтилган.

Қуйидагиларни тушуниш муҳим:

1) ветеринария фаолияти «Ветеринария тўғрисида»ги Қонун билан тартибга солинади;

2) ушбу фаолиятга рухсатномани Соғлиқни сақлаш вазирлиги эмас, балки Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси беради;

3) ветеринария тиббиёти юридик жиҳатдан соғлиқни сақлашдан фарқ қиладиган алоҳида соҳа ҳисобланади.

«Фуқаролар соғлиғини сақлаш тўғрисида»ги Қонуннинг «Тиббиёт ва фармацевтика фаолиятини лицензиялаш» 11-моддасига кўра тиббий фаолият юридик шахслар томонидан, фармацевтика фаолияти эса тегишли лицензияга эга бўлган юридик ва жисмоний шахслар томонидан амалга оширилиши мумкин.

Тиббиёт ва фармацевтика фаолиятини амалга ошириш учун лицензиялар бериш тартиби ҳамда шартларини Вазирлар Маҳкамаси белгилайди.

21.06.2017 йилдаги 405-сон ВМҚда Соғлиқни сақлаш вазирлигига тиббиёт фаолияти амалга ошириладиган тиббий ихтисосликлар турларининг номенклатурасини тасдиқлаш тўғрисида кўрсатма берилган. Дастлаб бундай номенклатура соғлиқни сақлаш вазирининг 2017 йил 25 июлдаги 98-сон буйруғи билан тасдиқланган. Кейинчалик у янгиланди (АВ рўйхат рақами 3303-сон). Янги номенклатура тиббий ихтисосликлар рўйхатини долзарблаштирди ва кенгайтирди.

Шундай қилиб, фуқароларга тиббий ёрдам кўрсатиш бир норматив-ҳуқуқий ҳужжатлар билан, ҳайвонларга ветеринария ёрдами кўрсатиш эса бутунлай бошқача норматив-ҳуқуқий ҳужжатлар билан тартибга солинади.

Юқорида санаб ўтилган барча сабабларга кўра, Президентнинг тиббиёт ташкилотларини ушбу солиқни тўлашга ўтказиш тўғрисидаги Фармони асосида ветеринария клиникаларини ҚҚСга ўтказиш ҳақидаги солиқ органларининг талаби асоссиз ва солиқ органлари ваколатларидан ошиб кетган деб ҳисоблайман.

 

Кўзойнак сотиш ва тайёрлаш бўйича салонлар

Кўзойнакларни тайёрлаш ва сотиш билан шуғулланувчи ташкилотлар ҳам ҚҚСга ўтиш талабини олдилар.

Худди шундай тарзда:

1) кўзойнакларни тайёрлаш ва сотиш (оптика салонлари фаолияти) анъанавий равишда ҳеч қачон тиббий хизматлар тоифасига кирмаган;

2) оптика салонлари дорихона эмас ва фармацевтика фаолиятини амалга оширмайди;

3) бу фаолият тури тиббий хизмат сифатида тартибга солинмайди.

Соғлиқни сақлаш вазирининг буйруғи билан Тиббий мақсадлар учун мўлжалланган буюмлар рўйхати 12.07.2016 йилдаги 2809-сонли буйруқ билан тасдиқланган. Ушбу рўйхатда кўзойнаклар ёки кўзойнаклар учун линзалар йўқ.

Шундай қилиб, Президентнинг ПФ-229-сон Фармони тиббиёт ва фармацевтика ташкилотларига қўйиладиган талабларини оптикаларга тарқатиш асоссиздир.

 

Солиқ тўловчилар нима қилиши керак

Қуйидаги чораларни тавсия қила оламан:

1. Солиқ органларига ўз талабларини асослаб бериш ва ветеринария клиникалари ва оптика салонларига тааллуқли бўлган Президент Фармонининг аниқ бандини кўрсатиш илтимоси билан ёзма равишда мурожаат қилинг. Ушбу мурожаатда ҳуқуқий тартибга солиш ва тармоқ тегишлилигидаги фарқларни кўрсатинг.

2. Юқори турувчи органларга ва Бизнес-омбудсманга мурожаат қилинг. Ветеринария фаолияти алоҳида қонун билан тартибга солиниши ва Қишлоқ хўжалиги вазирлиги тасарруфида эканлиги, шунинг учун тиббий фаолиятга тааллуқли эмаслиги ҳолатининг юридик асосини тайёрланг. Фаолиятингиз таснифи тўғрисида тармоқ регуляторларининг расмий тушунтиришларини тўпланг.

3. Шундай муаммога дуч келган бошқа ветеринария клиникалари ва оптика салонлари билан бирлашинг ва давлат ҳокимияти органларига жамоавий мурожаат тайёрланг.

Солиқ органлари солиқ тушумларини кўпайтириш учун норматив ҳужжатларни кенгайтириб талқин қилишга ҳаракат қилаётгани аниқ. Бу ҳуқуқий аниқлик тамойилига зид ва бизнес учун қўшимча асоссиз юк яратади.

 

Юлия ТАРШИЛОВА тайёрлади