Кимга ва қанча муддатга «Яшил сертификат» берилади

2025 йил 1 октябрдан атроф-муҳитга таъсир кўрсатиш даражаси I ва II тоифадаги (хавфли ва ўртача хавфли) фаолият турлари бўлган корхоналарнинг технологик жараёнлари амалдаги «Яшил сертификат»га эга бўлиши шарт (15.04.2025 й. 230-сон ВМҚ). Тафсилотларни norma.uz портали тақдим этмоқда.

Бундай сертификатни қанча вақтда олиш керак ва буни қандай қилиш мумкинлигини қуйидаги шарҳда ўқинг:

Маҳсулот ишлаб чиқариш ва хизмат кўрсатиш жараёнида технологик жараёнларни экологик сертификатлаш тартиби махсус Низом билан тартибга солинади (15.04.2025 й. 230-сон ВМҚга илова).

Амалдаги «Яшил сертификат»сиз атроф-муҳитга таъсир кўрсатиш даражаси I ва II тоифадаги корхоналар (Рўйхатга қаранг) 1 октябрдан ўз маҳсулотлари учун мувофиқлик сертификатини ололмайдилар.

«Яшил сертификат»ни қандай олиш мумкин

Экологик сертификатлашни тегишли аккредитацияга эга бўлган юридик шахслар ўтказадилар.

«Яшил сертификат» олиш учун хўжалик юритувчи субъект сертификатлаштирувчи органга бу ҳақда ариза тақдим этади ва бу орган бир иш куни ичида ишларни ўтказиш тўғрисида қарор қабул қилиши керак. Шундан сўнг томонлар экологик сертификатлаш тўғрисида шартнома тузадилар.

2026 йил июлгача бундай шартномалар тузган хўжалик юритувчи субъектлар учун экосертификатлаш ишлари бепул амалга оширилади.

Шартнома тузилгандан сўнг сертификатлаштирувчи орган қуйидагиларни ўз ичига олган мувофиқлик баҳолашни ўтказади:

• камерал текшириш;
• технологик жараёнлар аудити;
• атроф-муҳитга чиқиндилар ўлчовлари.

Бунда:

• камерал текшириш жараёнида хўжалик юритувчи субъектнинг техник тартибга солиш, атроф-муҳитни муҳофаза қилиш ва табиий ресурслардан оқилона фойдаланиш соҳасидаги НҲҲлар талабларини бажариши, экологик сертификатлаш органи сўрови асосида ҳужжатларни текширилади;
• технологик жараён аудити жойга чиқиб вазиятни ўрганишни назарда тутади.

Ижобий хулоса берилган тақдирда «Яшил сертификат» берилади, унинг маълумотлари махсус реестрга киритилади. Сертификатнинг амал қилиш муддати – 5 йил.

Манбага қаранг.