Норезидентга даромад тўланганидан кейин қонунийлаштирилган резидентлик сертификатини қўллаш мумкинми

«2025 йил январь ойида ташкилот норезидентнинг хизматларига тўловни амалга оширди ва икки томонлама солиққа тортишнинг олдини олиш бўйича халқаро шартномани қўллади. Резидентлик сертификати 01.01.2025 йилдан 31.12.2025 йилгача бўлган муддатга берилган ва тўлов санасигача тақдим этилган. Бироқ, сертификатга апостиль норезидентга тўлов санасидан кечроқ қўйилган. Солиқ идораси сертификат апостиль санасидан олдин қўлланилиши мумкин эмаслигини таъкидлаб, ҳисоботни қайта топширишни ва норезидентнинг даромад солиғини тўлашни талаб қилмоқда. Солиқ хизматининг талаби қонунийми?

Buxgalter.уз илтимосига биноан обуначининг саволига «Assistance In Tax» солиқ маслаҳатчилари ташкилоти директори Радмила КАРИМОВА жавоб берди:

– Мазкур ҳолатда солиқ органларининг позицияси асосли бўлиб, Солиқ кодексининг 358-моддаси талабларига мос келади.

Апостиль – бу шунчаки расмиятчилик эмас, балки чет эл ҳужжатини қонунийлаштиришнинг мажбурий элементи бўлиб, унинг ҳақиқийлиги ва Ўзбекистон ҳудудида қонуний кучга эга эканлигини тасдиқлайди. Апостилсиз ҳужжат тўғри расмийлаштирилган деб ҳисобланмайди, ҳатто унда резидентлик даври тўғри кўрсатилган бўлса ҳам.

Солиқ кодексининг 357-моддаси 3-қисмига мувофиқ контрагентнинг резидентлигини тасдиқловчи ҳужжат даромадни тўлаш санасидан кечиктирмай тақдим этилиши керак. Бу шуни англатадики, тўлиқ апостилли ҳужжат тўлов пайтигача сизда бўлиши керак.

Бухгалтерларга тавсиялар:

• Апостиль қўйилган резидентлик сертификатини олмагунча норезидентларга тўловларни амалга оширманг.
• Агар тўлов муҳим бўлса, солиқни тўлиқ ставкада ушлаб қолинг ва тўғри расмийлаштирилган сертификатни олгандан сўнг СК 357-моддасининг 6-қисмига мувофиқ ортиқча тўланган солиқни қайтариш учун ариза топширинг.

Ҳозирги вазиятда сиз солиқ хизмати талабини бажаришингиз ва солиқ тўлашингизга тўғри келади, чунки даромадни хорижлик шерикка тўлаш пайтида сиз иккиёқлама солиқ солишдан қочиш тўғрисидаги халқаро шартноманинг солиқ имтиёзларини қўллаш ҳуқуқига эга бўлмагансиз.

Резидентлик сертификатига қўйиладиган талаблар ҳақида батафсил маълумотни тавсияномада ўқинг.

Buxgalter.uz тавсия қилади:

 

• Чек-лист: норезидентга даромад тўлашдан олдин бухгалтер нимани текшириши керак;
• Норезидентларнинг даромадларидан тўлов манбаида фойда солиғини тўлаш;
• Норезидентларнинг даромадларидан олинадиган фойда солиғини тўлаш ва солиқ ҳисоботини тақдим этиш тартиби;
• Чет эл валютасига сотиб олинган товарлар (хизматлар)ни бўнак тўлови билан ҳисобга олиш тартиби.