Саноат зоналарининг собиқ иштирокчиларига инвестицияларни қоплаш масаласи қандай ҳал этилади

Саноат зоналари иштирокчилари томонидан тугалланмаган лойиҳаларни янги инвесторларга реализация қилишда амалга оширилган инвестицияларни баҳолаш ва қоплаш тартиби тўғрисидаги вақтинчалик низом тасдиқланди ва кучга кирди.

Ушбу ҳужжатни кўриб чиқамиз:

Тугалланмаган саноат лойиҳаларига инвестицияларни баҳолаш тартиби тўғрисидаги вақтинчалик низом 19.12.2025 йилдаги 803-сон ВМҚ билан тасдиқланган.

Вақтинчалик низом доирасида:

• тугалланмаган лойиҳа – саноат зонасида амалга оширилиши режалаштирилган, аммо инвестор инвестиция шартномаси бўйича мажбуриятларни ўз вақтида бажара олмаган лойиҳа;
• саноат зонаси – саноат ва ишлаб чиқариш корхоналарини бир жойда жойлаштириш, инфратузилма объектларидан оқилона фойдаланиш ва аҳоли бандлигини таъминлаш мақсадида ўз ҳудудида хизмат кўрсатиш инфратузилмаси ва аниқ белгиланган чегараларга эга бўлган, қонунчилик билан маълум бир мақом берилган аҳоли пункти ҳудудининг бир қисми.

Тугалланмаган лойиҳаларга инвестицияларни баҳолаш инвесторга у саноат зонаси иштирокчиси мақомини йўқотганидан кейин лойиҳа доирасида сарфланган харажатларни қоплаш мақсадида амалга оширилади.

Бунда саноат зонасининг собиқ иштирокчиси ва унинг Дирекцияси ўртасида битим тузилади. Унга кўра, саноат зонасининг собиқ иштирокчиси Дирекцияга қурилиши бошланган ва тугалланмаган объектларни топширади. Дирекция эса уларнинг қурилишига сарфланган харажатларни қоплайди.

Қурилиши тугалланмаган объектларни баҳолаш харажатларини қоплаш ва баҳолаш натижалари бўйича иккала томоннинг розилигини тасдиқлаш масалалари ҳам битимда акс эттирилади.

Сарфланган харажатлар инвесторга қандай қайтарилади

1. Инвесторнинг саноат зонасидаги иштироки тўхтатилгандан кейин ер участкаси қурилиши тугалланмаган объект билан бирга Дирекцияга қайтарилади.

2. Дирекция ўз навбатида:

• 2 ҳафта муддатда – қурилиши тугалланмаган объектни белгиланган тартибда давлат рўйхатидан ўтказади;
• 1 ой  муддатда – ушбу объектни ваколатли ташкилот ёрдамида баҳолашдан ўтказади.

3. Дирекция объект баҳолангандан сўнг 3 кун муддатда ер участкасини қурилиши тугалланмаган объект билан бирга онлайн-аукционга чиқаради. Ёки – объект қурилиши тугаллангандан ва ундан фойдаланишга рухсат олингандан сўнг – уни янги инвестиция лойиҳаси сифатида реализация қилишнинг белгиланган тартибига мувофиқ аукционга қўяди.

4. Электрон онлайн-аукцион ғолиби тўловни амалга оширганидан сўнг, аукцион оператори маблағларни Дирекцияга ўтказади. Дирекция эса 1 кун ичида қурилиши тугалланмаган объектнинг баҳоланган қийматини собиқ инвесторнинг банк ҳисоб рақамига ўтказади. Бунда инвестиция шартномасида янги саноат зонаси иштирокчиси компенсация тўлаш бўйича мажбуриятни ўз зиммасига олганда баҳолаш ҳисоботи билан таништирилиши ва ҳисоботнинг нусхаси шартномага илова қилиниши лозим.

5. Электрон онлайн-аукциондан олинган, қурилиши тугалланмаган объектнинг баҳолаш қийматидан ортиқча маблағлар Дирекция тасарруфида қолади.

Buxgalter.uz тавсия қилади

 

• Давлат кўчмас мулкини қандай ижарага олиш мумкин;
• МИЗ иштирокчилари учун имтиёзлар.