Солиқ имтиёзлари бериш ва солиқ текширувларидан озод қилиш тартиби белгиланди

“20 минг тадбиркор - 500 минг малакали мутахассис” дастури доирасида Ижтимоий ҳимоя ягона реестрига киритилган фуқароларни иш билан таъминлайдиган тадбиркорлар солиқ имтиёзлари ва преференцияларига эга бўлишди. Вазирлар Маҳкамаси томонидан тегишли Низом тасдиқланди .

Имтиёзлардан ходимлари умумий сонининг 20 фоизини Ижтимоий ҳимоя ягона реестрига киритилган ва камида 1 йил ишлаган фуқаролар ташкил қиладиган тадбиркорлар фойдаланиши мумкин.

Мол-мулк солиғи ва ер солиғи бўйича имтиёзлар

Қуйидагилар:

• 51 тадан 100 тагача янги иш ўрни яратадиган тадбиркорлар мол-мулк солиғи ва ер солиғи бўйича ставкаларни 50 фоизгача пасайтиришга ҳақли;
• 101 тадан 200 тагача янги иш ўрни яратадиган тадбиркорлар ушбу солиқлар ставкаларини 75 фоизга пасайтиришга ҳақли;
• 200 тадан ортиқ иш ўрни яратадиган тадбиркорлар мазкур солиқларни тўлашдан озод этилади.

Солиқларни бўлиб-бўлиб тўлаш мумкин

Дастурда иштирок этувчи тадбиркорлар барча солиқларни (бундан ҚҚС ва солиқ агентлари сифатида тўланадиган солиқлар мустасно) гаровсиз ва фоизларсиз қуйидаги муддатларда бўлиб-бўлиб тўлаш ҳуқуқига эга бўлишди:

• 51 тадан 100 тагача янги иш ўрни яратилганлиги учун – 3 ой;
• 101 тадан 200 тагача янги иш ўрни яратилганлиги учун – 6 ой;
• 200 та иш ўрни яратилганлиги учун – 12 ой.

Солиқ текширувларидан озод қилиш

Янги иш ўринлари яратилган тақдирда қуйидаги тартибда солиқ текширувлари ўтказилмайди:

• 51 тадан 200 тагача янги иш ўрни яратадиган тадбиркорларга нисбатан солиқ аудити ўтказилмайди;
• 200 тадан ортиқ иш ўрни яратадиган тадбиркорларга нисбатан солиқ текширувларининг барча турлари ўтказилмайди.

Божхона“Яшил йўлак”  режими

Ундан дастур иштирокчилари фойдаланиши мумкин.