ДУК фойдасидан қандай фойдаланилади

Давлат унитар корхонасида йил якунида солиқларни тўлагандан кейин тақсимланмаган фойда қолди. Уни қандай мақсадлар учун ва қандай шартларда фойдаланишни buxgalter.uz илтимосига биноан юрист Икром АБДУЛҚОДИРОВ тушунтирди:

- Давлат корхонасининг даромадларини тақсимлаш тартиби унинг мол-мулки мулкдори томонидан белгиланади .

ДУКнинг солиқлар  тўлангандан сўнг, соф фойдасидан Давлат бюджетига ва муассисга ажратмалардан кейин  соф фойдаси - корхона ихтиёрида қолади ва ундан муассиснинг қарорига биноан фойдаланилади . Хусусан, у ДУКнинг устав фондига ўтказилиши мумкин .

Муассис давлат корхонасининг молиявий йил якунлангач 6 ойдан кеч бўлмаган муддатда тақсимланадиган соф фойдасининг бир қисмини - Давлат бюджетига соф фойданинг 30%и миқдорида ажратмаларни ҳисобга олган ҳолда олиш ҳуқуқига эга.

Эътибор беринг!

Давлат корхоналари ҳамда устав капиталида 50% ва ундан ортиқ давлат улуши мавжуд бўлган юридик шахслар томонидан 2021 йилнинг 1 июлига қадар 2020 йил якунлари бўйича ўз соф фойдасининг 50%идан кам бўлмаган миқдорда Давлат бюджетига тегишли равишда ажратмалар ва давлат улуши бўйича дивидендларни 2021 йилнинг 1 сентябридан кечиктирмасдан тегишли даражадаги бюджетларга ўтказилади .

Юқорида баён этилганларни инобатга олган ҳолда, корхона ихтиёрида қоладиган тақсимланмаган фойдадан у ёки бошқа мақсадлар учун фойдаланиш тўғрисидаги қарорни унинг муассиси қабул қилади. Бунда, бундай фойдадан фойдаланиш мақсадлари ушбу давлат корхонаси фаолиятининг мақсадлари ва мол-мулкнинг мақсадига зид келмаслиги керак .