Қишлоқ хўжалиги учун мўлжалланган участкалар бўйича солиқ ҳисоботида мураккабликлар бўлса

Солиқ қўмитаси қишлоқ хўжалиги ерлари мавжуд бўлган ва уларни солиқ ҳисоботида акс эттиришда қийинчиликларга дуч келган корхоналарнинг саволларига жавоб берди.

Эътиборга оламиз! Тафсилотлар buxgalter.uz материалида:

 

1. Агар корхонада қишлоқ хўжалиги ерлари мавжуд бўлса ва улар солиқ ҳисоботида автоматик равишда шаклланмаса, нима қилиш керак?

– Агар солиқ ҳисоботида корхонанинг қишлоқ хўжалиги ерлари автоматик равишда шаклланмаса, ер участкаларининг норматив қийматларини баҳолаш учун Қишлоқ хўжалиги вазирлиги ҳузуридаги «O'zdavyerloyiha» ДИЛҚИ (Давлат илмий лойиҳалаштириш қидирув институти)га мурожаат қилиш керак.

Шунингдек, солиқ тўловчи солиқ ҳисоботининг 020-сатрига маълумотларни мустақил киритиш имкониятига эга.

Бунда ер участкасининг норматив қиймати туман (шаҳар) бўйича аниқланадиган қишлоқ хўжалиги ерларининг ўртача норматив қиймати миқдорида белгиланади.

 

2. Қайси тоифадаги ерлар қишлоқ хўжалигига мўлжалланган ерлар ҳисобланади?

– Қишлоқ хўжалиги эҳтиёжлари учун берилган ёки ана шу мақсадга мўлжалланган ерлар қишлоқ хўжалигига мўлжалланган ерлар деб эътироф этилади.

Қишлоқ хўжалигига мўлжалланган ерлар суғориладиган ва суғорилмайдиган (лалмикор) ерлар, ҳайдаладиган ерлар, пичанзорлар, яйловлар, кўп йиллик мевали дов-дарахтлар ва токзорлар эгаллаган ерларга бўлинади .

 

3. СК 429-моддасига киритилган ўзгартиришларга мувофиқ, қишлоқ хўжалиги корхоналари балансида бўлган, қишлоқ хўжалиги маҳсулотларини етиштириш ва сақлаш учун фойдаланиладиган бинолар ва иншоотлар жойлашган ерларга нисбатан солиқ ставкасига 0,2 коэффициент қандай қўлланилади?

– Ушбу тоифадаги ер участкалари учун солиқ ҳисоботида пасайтирувчи 0,2 коэффициент автоматик равишда ҳисобланади. Бунда ер участкалари Кадастр агентлигининг «Узкад» тизимида рўйхатга олинган бўлиши керак. Асосий фаолият тури қишлоқ хўжалиги бўлиши, ер участкаларидан фойдаланишнинг рухсат этилган тури ҳам қишлоқ хўжалиги бўлиши керак.

Ер участкалари ва капитал қурилиш объектларидан фойдаланишнинг рухсат этилган турларининг ягона классификатори 30.09.2024 йилдаги 614-сон қарорига 1-илова билан тасдиқланган.

 

4. Компания солиқ имтиёзини олган, лекин уни солиқ ҳисоботида акс эттирмаган. Бу вазиятда нима қилиш керак?

– Ҳисоботда корхонанинг солиқ имтиёзини акс эттириш учун Ҳисоб-китобнинг 9-устунидаги керакли кўк катакчаларни мустақил равишда тўлдириш керак.

 

5. Агар қишлоқ хўжалигига мўлжалланмаган ерлар бўйича ер солиғи декларациясида (53-код) корхонанинг қишлоқ хўжалигига мўлжалланган ерлари кўрсатилган бўлса, нима қилиш керак?

– Агар корхонанинг барча ерлари қишлоқ хўжалигига мўлжалланган тоифасига киритилган бўлса, қишлоқ хўжалигига мўлжалланмаган ерлар (53-код) тоифаси бўйича солиқ декларациясини топшириш мажбурияти юзага келмайди. Агар корхонада бир вақтнинг ўзида иккала тоифадаги ер участкалари мавжуд бўлса, бу ҳолда my3.soliq.uz порталидаги «Солиқнинг алоҳида ставкалари билан солиқ солинадиган кўчмас мулк объектлари ва ер участкалари» интерактив хизматининг «Қишлоқ хўжалигига мўлжалланган ер участкалари учун» бўлими орқали солиқ органларига хабар бериш керак.

Тақдим этилган аризаларни ҳудудий солиқ органларининг масъул ходимлари белгиланган тартибда кўриб чиқадилар.

 

 

1 ва 2-манбага қаранг.