E-ijara тизимида ижара шартномаси рўйхатдан ўтказилганлиги тўғрисида гувоҳномага ўзгартиришлар киритиш

Ijara.soliq.uz сайтида ижара шартномаси рўйхатдан ўтказилгандан сўнг унга ўзгартиришлар киритиш зарурияти пайдо бўлиши мумкин. Масалан, хатоларни тузатиш ёки қўшимча шартларни кўрсатиш.

Буни қандай тўғри амалга ошириш керак эканлигини тушунтирамиз:

 

Кўп учрайдиган хатолар

– Кўпинча ijara.soliq.uz тизимига ахборот киритишда қуйидаги йўл қўйилган хатоларни тузатиш зарурияти туғилади:

• ижара бошланиши ёки тугаш санаси нотўғри киритилган;
• ижарага бериладиган майдон нотўғри кўрсатилган;
• тўлов ҳисобланадиган миқдор нотўғри танланган (сўм ёки БҲМ);
• ойлик тўлов суммаси нотўғри киритилган.

Шунингдек, баъзан рўйхатдан ўтказишда мулкдорлар субижарага қарши эмаслигини кўрсатишни унутишади. Эҳтимол, ijara.soliq.uz сайтида шартномани тузиш ва рўйхатдан ўтказиш пайтида ҳеч ким субижара ҳақида ўйламаган бўлиши мумкин. Кейинчалик эса ижарага олувчи ижарага олинган майдоннинг бир қисмини учинчи шахсларга ижарага беришга қарор қилади ва мулкдор бунга қарши бўлмайди. Ижарага олувчи билан субижарага олувчи ўртасидаги шартномани ijara.soliq.uz тизимида рўйхатдан ўтказиш мумкин бўлиши учун, кўчмас мулк мулкдори шартнома ҳақидаги ахборотда субижарага қарши эмаслигини белгилаши керак.

E-ijara тизимига шартнома маълумотларини киритишда хатоларни қандай тузатиш керак

Хатоларни кўчмас мулк мулкдори (ижарага берувчи) тузатади. Тавсия этиладиган ҳаракатлар кетма-кетлиги:

1. Ўзингизнинг ЭРИ билан ijara.soliq.uz сайтига киринг.

2. «Ижара шартномалари рўйхати» тугмасини, сўнгра «Тасдиқланган» тугмасини босинг. Тақдим этилган рўйхатда ўзгартириш киритиш керак бўлган шартнома рўйхатдан ўтказилганлиги ҳақидаги ёзувни топинг. «Ҳужжатлар» устунида «Кўриш» тугмасини босинг. Экранда Шартнома рўйхатдан ўтказилганлиги тўғрисида гувоҳнома очилади, унинг остида «Ўзгартириш» тугмаси бўлади.

3. «Ўзгартириш» тугмасини босинг. Очилган шаклда керакли ўзгартиришларни киритинг.
«Тасдиқлаш»ни босинг.

4. Ижарага олувчи ўз ЭРИси ёрдамида ўзгартиришларни имзолагандан сўнг, шартнома «тасдиқланган» мақомини олади.

Агар ижара (субижара) шартномасига қўшимча келишув тузилган бўлса

Қўшимча келишувни ижарага берувчи рўйхатдан ўтказиши керак:

1. Ўзингизнинг ЭРИ билан ijara.soliq.uz сайтига киринг.

2. «Ижара шартномалари рўйхати» тугмасини, сўнгра «Тасдиқланган» тугмасини босинг. Тақдим этилган рўйхатда ўзгартириш киритиш керак бўлган шартнома рўйхатдан ўтказилганлиги ҳақидаги ёзувни топинг. «Ҳужжатлар» устунида «Кўриш» тугмасини босинг. Экранда Шартнома рўйхатдан ўтказилганлиги тўғрисида гувоҳнома очилади.

3. Гувоҳнома остидаги «Қўшимча келишув» тугмасини босинг. Очилган шаклда маълумотларни ўзгартиринг:

• «Ижара бошланиши санаси» майдонига қўшимча келишув кучга кирадиган санани кўрсатинг;
• «Ижара тугаш санаси» майдонига – ижара шартномаси амал қиладиган санани;
• «Ижарага бериладиган майдон» майдонига – қўшимча келишувни ҳисобга олган ҳолда ижарага бериладиган майдонни;
• «Тўлов тури» устунининг чиқиб келадиган тавсиясидан «БҲМ» ёки «UZS»ни танланг;
• «Олдинги сумма» майдонида қўшимча келишув тузилишидан олдинги шартнома суммаси автоматик акс этади;
• «Ойлик тўлов» майдонига қўшимча келишувни ҳисобга олган ҳолда ойлик ижара ҳақи суммасини кўрсатинг;
• «Умумий тўлов суммаси» майдонида қўшимча келишувни ҳисобга олиб ҳисобланган шартнома суммаси автоматик акс этади;
• «Эслатмада» қўшимча келишув тузиш сабабини қўшимча кўрсатишингиз мумкин.

4. «Тасдиқлаш» тугмасини босинг.

Ижарага олувчи ЭРИ ёрдамида киритилган ўзгартиришларни имзолаши керак, шундан сўнг қўшимча келишув «тасдиқланган» мақомини олади. Ва шу пайтдан бошлаб солиқ органлари ахборот тизимлари қўшимча келишувни ҳисобга олган ҳолда ижара шартномасини ҳисоб-китобларда қабул қилади.

Агар сизда бошқа вазият бўлса...

Масалан, кўчмас мулк ижара шартномасини томонларнинг келишуви бўйича муддатидан илгари бекор қилингда ёки қонунчиликда белгиланган тартибда уни ҳақиқий эмас деб тан олингда уни ҳисобдан олиб ташлаш керак. Ёки сиз янги шартнома рўйхатдан ўтказяпсиз ва сизнинг ижарага олувчингиз резидент эмас. Ёки кўп квартирали уйнинг чордоқ, ертўла ва бошқа ноистиқомат ҳоналарини ижарага бериш ҳақида гап кетмоқда...

Сизга ёрдам учун – «Норма» экспертлари ва Солиқ қўмитаси мутахассисларининг биргаликдаги тавсияси, унда мазкур ва E-ijara билан боғлиқ бошқа масалалар батафсил ёзилган:

• Кўчмас мулк ижара шартномасини солиқ органларида қандай ҳисобга олиш.