Ноябрь ойидаги бухгалтер учун фойдали ахборот:
Корхонада меҳнат шартномасига асосан чет эллик-норезидент ишлайди. Унинг даромадларидан 20% ставка бўйича ЖШДС ушлаб қолинади. Ўзбекистонда 183 кун бўлгандан кейин у солиқ резидентига айланади ва унинг иш ҳақига 12% ставка бўйича ЖШДС солинади. Бунда у чет элда ҳам даромад олади. У Ўзбекистонда жами даромади тўғрисида декларация топшириши керакми? Buxgalter.uz илтимосига биноан вазиятни «Assistance In Tax» солиқ маслаҳатчилари ташкилоти директори Радмила КАРИМОВА тушунтирди:
- “Қуйидагилар ЖШДС тўловчиси деб тан олинади 
:
1) Ўзбекистоннинг резидентлари бўлган жисмоний шахслар;
2) Ўзбекистондаги манбалардан даромад олувчи Ўзбекистоннинг норезиденти бўлган жисмоний шахслар.
Қуйидагилар ЖШДС бўйича солиқ базаси ҳисобланади :
1) резидентлар бўлган жисмоний шахслар учун - СКда назарда тутилган солиқ имтиёзлари қўлланган ҳолдаги жами даромадлари;
2) норезидентлар бўлган жисмоний шахслар учун - СКда назарда тутилган солиқ имтиёзлари қўлланмаган ҳолдаги жами даромадлари.
Жами даромад солиқ тўловчи томонидан ҳисобот (солиқ) даври давомида олинган қуйидаги даромадлардан ташкил топади :
1) резидентлар учун - Ўзбекистондаги ва унинг ташқарисидаги манбалардан олинган даромадлардан;
2) норезидентлар учун - Ўзбекистондаги манбалардан олинган даромадлардан.
Шу тариқа, агар чет эллик ходим Ўзбекистоннинг резидентига айланса, у томондан тегишли давр мобайнида Ўзбекистондаги ва унинг ташқарисидаги манбалардан олинган бутун даромадига солиқ солиниши лозим. Бундай ходим ҳисобот йилидан кейинги йилнинг 1 апрелидан кечиктирмай жами йиллик даромади тўғрисида декларацияни тақдим этиши шарт.
Эътибор беринг
Агар чет эллик жисмоний шахс жорий йилнинг 1 апрелига қадар резидентга айланган бўлса, у олдинги солиқ даври учун жами йиллик даромади тўғрисида декларация топширади .
