Электрон меҳнат шартномаларини тузиш мажбурий бўлдими

Ўзбекистондаги иш берувчилар меҳнат муносабатларини, шу жумладан электрон меҳнат шартномаларини «ЯММТ» ИДАКда рўйхатдан ўтказишлари шарт. Бу 27.12. 2024 йилдаги ВМҚ-891-сон қарорда назарда тутилган.

Иш берувчилар меҳнат шартномаларини айнан электрон шаклда тузишлари шартми? Buxgalter.uz бу масалани «Norma» юристларидан аниқлаштирди:

ЯММТда электрон меҳнат шартномаларини тузиш, меҳнат шартномаларини рўйхатдан ўтказиш, электрон меҳнат дафтарчаларини шакллантириш ва юритиш тартиби тўғрисидаги Низом «Электрон меҳнат шартномасини тузиш» деган янги боб билан тўлдирилди 27.12.2024 й. ВМҚ-891-сон. Янгилик 4 январдан кучга кирди.

Иш берувчи билан ходим ўртасидаги электрон меҳнат шартномалари «ЯММТ» ИДАКда тузилади. Шартномани иш берувчи меҳнат тўғрисидаги қонунчиликка мувофиқ шакллантиради, кейин ўзаро келишувдан сўнг уни ходим ва иш берувчи ЭРИси ёрдамида имзолайдилар. Ходим ўзининг электрон меҳнат шартномасини ЯИДХПдаги шахсий кабинети орқали юклаб олиши мумкин.

«ЯММТ» ИДАКдан фойдаланиш меҳнат муносабатларини рўйхатга олишда ташкилий-ҳуқуқий шакли ва идоравий бўйсунувидан қатъи назар, барча иш берувчилар учун мажбурийдир. Шу жумладан:

• электрон меҳнат шартномаларини тузиш;
• уларни бекор қилиш;
• уларга ўзгартириш ва қўшимчалар киритиш,

шунингдек:

• қоғоз шаклида тузилган меҳнат шартномаларини рўйхатга олиш;
• уларни бекор қилиш;
• уларга ўзгартириш ва қўшимчалар киритиш.

Бу қоидадан ягона истисно – давлат хавфсизлиги соҳасидаги иш берувчилар ва штат жадвали махфий бўлган иш берувчилар. Тегишли ўзгартириш Низомнинг 3-бандига киритилган.

Меҳнат шартномаларини электрон шаклда тузиш мажбурийми?

Қоғоз меҳнат шартномалари ЯММТда электрон меҳнат шартномаларини тузиш, меҳнат шартномаларини рўйхатга олиш, электрон меҳнат дафтарчаларини шакллантириш ва юритиш тартиби тўғрисидаги Низомдан чиқарилмаган. Матн бўйича «электрон» шаклга алмаштирилмаган, фойдаланишда қолмоқда. Уларни ҳам ЯММТда рўйхатдан ўтказиш керак.

Меҳнат шартномасини тузиш шакли (қоғозда ёки электрон шаклда) шартнома тарафларининг хоҳишига боғлиқ, деган хулоса қилиш мумкин.