Креатив индустрия парки резидентлари қандай имтиёзларга эга бўлади

2025 йил 1 майдан 2031 йил 1 январга қадар Креатив индустрия парки резидентлари учун имтиёзли солиқ режими қўлланилади (26.03.2025 й. ПФ-61-сон 3-б.).

Тафсилотлар – buxgalter.uz шарҳида:

Ўзбекистонда Креатив индустрия парки – ҳудудларда филиаллари билан ташкил этилмоқда.

Креатив индустрия соҳаларига қуйидагилар киради: адабий ижод, амалий санъат ва ҳунармандчилик, архитектура, лойиҳалаш ва урбанистика, тасвирий санъат ва креатив маҳсулотни яратиш, ишлаб чиқариш, сақлаш, тарқатиш ва илгари суриш билан боғлиқ бошқа турдаги ижодий фаолият 03.10.2024 й. ЎРҚ-970-сон 3-м. 03.10.2024 й. ЎРҚ-970-сон 10-м..

Креатив индустрия парки резидентлари учун имтиёзли солиқ режими қуйидагиларни ўз ичига олади:

• ижтимоий солиқ ва жисмоний шахслардан олинадиган даромад солиғи ставкасини 50 фоизга камайтириш;
• товарлар ёки хизматларни реализация қилишдан олинган даромад миқдоридан қатъи назар айланмадан олинадиган солиқ тўловчилар тоифасига киритиш. Бунда парк резидентлари ўз истагига биноан умумбелгиланган солиқ солиш тартибига ўтишлари мумкин.

Санаб ўтилган имтиёзларни амалда қўллаш мумкин бўлиши учун Солиқ кодексига тегишли ўзгартиришлар киритилиши керак бўлади.

Шунингдек, ПФ-61-сон Фармон муайян шартларга риоя қилинганда парк резидентлари учун фоизсиз ссудалар ва грантларни назарда тутади.