Xorijiy tashkilot tomonidan Oʻzbekistondan tashqarida koʻrsatilgan xizmatlarga QQS solinadimi

2020 yil 9 noyabr

Oʻzbekistonda doimiy muassasaga ega boʻlmagan xorijiy tashkilot Oʻzbekiston korxonasiga marketing va maslahat xizmatlari, shuningdek Oʻzbekiston tashqarisida mijozlarni izlash boʻyicha xizmatlar koʻrsatdi. Oʻzbekiston korxonasi QQS toʻlashi zarurmi?

Ushbu savolga javob berishni buxgalter.uz “Norma” eksperti Oleg SOYdan iltimos qildi:

- Agar xizmatlarni realizatsiya qilish joyi Oʻzbekiston hisoblansa, xizmatlarni realizatsiya qilish boʻyicha aylanma QQS solish ob’yekti hisoblanadi .

Umumiy qoidaga koʻra, basharti xizmatlarning xaridori Oʻzbekiston hududida faoliyatni amalga oshirsa yoki tursa, Oʻzbekiston xizmatlarni realizatsiya qilish joyi deb e’tirof etiladi . Ayrim xizmat turlari uchun realizatsiya qilish joyi alohida qoidalar boʻyicha aniqlanadi .

E’tibor bering

Agar xizmatlar koʻrsatish asosiy xizmatlarni realizatsiya qilishga nisbatan yordamchi xususiyatga ega boʻlsa, bunday realizatsiya qilish joyi deb asosiy xizmatlar realizatsiya qilingan joy e’tirof etiladi

SKning 241-moddasi uchinchi qismi 1-10-bandlarida marketing xizmatlari ham, maslahat xizmatlari ham, mijozlarni izlash boʻyicha xizmatlar ham koʻrsatilmagan. Xizmatlar xaridori – Oʻzbekiston rezidenti boʻlganligi bois, ushbu xizmatlarga QQS solinadi.

Oʻzbekiston korxonasi soliq agenti sifatida u QQS toʻlovchisi ekanligi yoki toʻlovchisi emasligidan qat’i nazar soliq summasini hisoblab chiqarishi va chet ellik shaxsdan uni ushlab qolishi va byudjetga oʻtkazishi shart .

E’tibor bering

SKning 243-245-moddalarida keltirilgan xizmatlarga QQS solinmaydi.

Agar shartnoma shartlariga muvofiq xorijiy hamkor xizmatlarni QQSsiz koʻrsatsa, soliq agenti ular boʻyicha soliq bazasini soliqni inobatga olmagan holda koʻrsatilgan xizmatlar qiymatidan kelib chiqib aniqlaydi. Bu holda soliq agenti mustaqil ravishda QQS summasini hisoblab chiqarishi va uni byudjetga oʻtkazishi shart .

Misol

Norezidentlarning xizmatlari boʻyicha QQS summasini aniqlash

1. Chet ellik shaxs tomonidan koʻrsatilgan marketing xizmatlarining shartnoma qiymati - $11 500, shu jumladan QQS - $1 500. Oʻzbekiston korxonasi xorijiy hamkorga $10 000 oʻtkazadi va byudjetga QQS – MB kursi boʻyicha soʻmda $1 500 toʻlaydi.

2. Chet ellik shaxs tomonidan koʻrsatilgan mijozlarni izlash boʻyicha xizmatlarning shartnoma qiymati - $10 000 QQSsiz. Oʻzbekiston korxonasi xorijiy hamkorga $10 000 oʻtkazadi va byudjetga QQSni oʻz mablagʻlari hisobidan – MB kursi boʻyicha soʻmda $1 500 toʻlaydi.

E’tibor bering

QQS toʻlanganligini tasdiqlovchi toʻlov hujjati toʻlangan soliq summasini hisobga olish huquqini beradi .

Soliq agentlari soliq hisobotini taqdim etadilar:

QQS toʻlovchilar - oʻtgan oydan keyingi oyning 20 kunidan kechiktirilmagan muddatda (xorijiy yuridik shaxslardan sotib olingan tovarlar (xizmatlar) boʻyicha alohida QQS hisob-kitobi) ;
QQS toʻlovchi boʻlmaganlar - soliq toʻlash amalga oshirilgan oydan keyingi oyning 20 kunidan kechiktirmay .